ސްޕެނިޝް ލީގުގައި ހޮނިހިރު ދުވަހުގެރޭ ޖިރޯނާ އާއި އެތްލެޓިކޯ މެޑްރިޑް ބައްދަލުކުރި މެޗު އެއްވަރުވެގެން ނިމިއްޖެއެވެ.

މި ދެ ޓީމު ބައްދަލުކުރި މި މެޗު އެއްވަރުވެގެން ނިމުނީ 2-2 ގެ ނަތީޖާއަކުންނެވެ.

ސްޕެނިޝް ލީގަށް އަލަށް ޕްރޮމޯޓްވި ޖިރޯނާގެ ފަރާތުން ރޭގެ މެޗުގައި ރަނގަޅު ކުޅުމެއް ފެނިގެން ދިޔައިރު މެޗުގެ ފުރަތަމަ ގޯލް ޖަހާ ލީޑުނެގީވެސް އެޓީމުންނެވެ. އެގޮތުން މެޗުގެ 22 ވަނަ މިނެޓުގައި މި ގޯލް ޖިރޯނާއަށް ކާމިޔާބު ކޮށްދިނީ ކްރިސްޓިއަން ސްޓުއާނީއެވެ.

ސްޓުއާނީ ފުރަތަމަ ގޯލް ޖަހާ މެޗުގެ ލީޑު ޖިރޯނާއަށް ނަގައިދިންތާ 3 މިނެޓު ފަހުން އޭނާ ވަނީ މެޗުގެ ދެވަނަ ގޯލެއްވެސް ކާމިޔާބު ކޮށްދީ ލީޑު ފުޅާކޮށްދީފައެވެ.

ދެ ގޯލުގެ ލީޑަކާއެކު ފުރަތަމަ ހާފް ޖިރޯނާއިން ނިންމާލިއިރު، ފުރަތަމަ ހާފާ ޚިލާފަށް ދެވަނަ ހާފްގައި ރަނގަޅަށް ކުޅެމުންދިޔައީ އެތްލެޓިކޯއިންނެވެ. ނަމަވެސް އެތްލެޓިކޯއަށް މައްސަލަތަކެއް ކުރިމަތިވީ މެޗުގެ 67 ވަނަ މިނެޓްގައި އެޓީމުގެ އިތުބާރު ފޯވާޑު އެންޓޮނީން ގްރިޒްމަންއަށް ދެވަނަ ރީނދޫ ކާޑާއެކީ ރަތް ކާޑު ދައްކާ ދަނޑުން ފޮނުވާލުމުންނެވެ.

ގްރިޒްމަންއަށް ފުރަތަމަ ރީނދޫ ކާޑު ދައްކާފައި ވަނީ ޕެނަލްޓީ ހޯދަން "ޑައިވް" ކުރި ކަމަށް ނިންމާފައެވެ. އަދި ދެ ވަނަ ރީނދޫ ކާޑާއެކު ރަތް ކާޑު ދެއްކީ ރެފްރީއާ ޖަދަލުކޮށް ބުނި ބަހެއްގެ ސަބަބުންނެވެ.

ގްރީޒްނަމަންއަށް ދެއްކި މި ރަތް ކާޑާއެކު މެޗުގެ ބާކީ ބައި ފުރިހަމަ ކޮށްފައިވަނީ 10 ކުޅުންތެރިންނާއެކީގައެވެ. އެހެން ނަމަވެސް އެތްލެޓިކޯއިން ވަނީ ރަނގަޅަށް ކުޅެ ޖިރޯނާގެ ފަހަތަށް ބާރުބޮޑުކޮށް ގޯލަށް ނުރައްކާކޮށްފައެވެ. ނަތީޖާއެއްގެ ގޮތުން އެޓީމުގެ ފުރަތަމަ ގޯލު މެޗުގެ 78 ވަނަ މިނެޓްގައި އެންހެލް ކޮރޭއާ ކާމިޔާބުކޮށްދިންއިރު އެތްލެޓިކޯގެ ދެވަނަ ގޯލް މެޗުގެ 85 ވަނަ މިނެޓުގައި ކާމިޔާބުކޮށްދީ ނަތީޖާ ހަމަހަކޮށްދިނީ ހޯޒޭ ހިމިނޭޒް އެވެ.

މެޗު ނިމެން ދަނިކޮށް ޖިރޯނާއަށް ވަނީ މެޗުގެ ލީޑުނަގަން ރަނގަޅު ފުރުސަތެއް ލިބިގެން ގޮސްފައެވެ. ނަމަވެސް، ކަޔޯދޫ ބޮލުން ފޮނުވާލި އެ ހަމަލާ އެތްލެޓިކޯގެ ކީޕަރު އޮބްލަކް ވަނީ ހުޝިޔާރުކަމާއެކު ދިފާއުކޮށްފައެވެ.

ސްޕެނިޝް ލީގުގައި ރޭ ކުޅުނު އެހެން މެޗުތަކަށް ބަލާއިރު ސެވިއްޔާ އާއި އެސްޕަނިޔޯލް ބައްދަލުކުރި މެޗު 1-1 އިން އެއްވަރުވެގެ ނިމުނުއިރު، ރެއާލް ސޮސިއެޑާޑް އަދި ސެލްޓަވީގޯ ބައްދަލުކުރި މެޗު 2-3 ގެ ނަތީޖާއަކުން މޮޅުވެފައިވަނީ ރެއާލް ސޮސިއެޑާޑްއެވެ.

މި ލީގުގައި މިރޭވެސް ފޯރި ގަދަ މެޗުތަކެއް ކުޅެވޭނެ އެވެ. އެގޮތުން ބާސެލޯނާ އަދި ރެއާލް ބެޓިސް ބައްދަލުކުރާ މެޗުގެ އިތުރުން އެންމެ ފަހުގެ ޗެމްޕިއަން ރެއާލް މެޑްރިޑާއި ޑިޕޯޓިވޯ ލަކަރޫނިޔާ ބައްދަލުކުރާ މެޗުވެސް ކުޅެވޭނެއެވެ. ބާސެލޯނާ ރެއާލް ބެޓިސްގެ މެޗު މިރޭ 11:15 ގައި ކުޅެވޭއިރު ރެއާލް އަދި ޑިޕޯތިވޯ ލަކަރޫނިޔާ ބައްދަލުކުރާ މެޗު ކުޅޭނީ ދަންވަރު ރާއްޖޭ ގަޑިން 01:15 ގައެވެ.