ރޮނާލްޑޯއަށް ރަތްކާޑު ހައްގެއް ނޫން: ޒިދާން

ސްޕެނިޝް ސުޕާކަޕްގައި ބާސެލޯނާއާއި ރެއާލް މެޑްރިޑް ބައްދަލުކުރި މެޗުގައި ކްރިސްޓިއާނޯ ރޮނާލްޑޯއަށް ދެއްކި ރަތްކާޑަކީ ހައްގު ކާޑެއް ނޫން ކަމަށް ރެއާލްގެ ކޯޗު ޒައިނުއްދީން ޒިދާން ބުނެފިއެވެ.

އާދިއްތަ ދުވަހުގެ ރޭ ކުޅުނު މެޗުގެ 82 ވަނަ މިނުޓުގައި ރޮނާލްޑޯއަށް ވަނީ ދެވަނަ ރީނދޫ ކާޑަކާއިއެކު ރަތް ކާޑެއް ދައްކައި ދަނޑުން ފޮނުވާލާފައެވެ.

ރޮނާލްޑޯއަށް ފުރަތަމަ ރީނދޫ ކާޑު ދައްކާފައިވަނީ މެޗުގެ 80 ވަނަ މިނުޓުގައި އޭނާ ރެއާލްއަށް ކާމިޔަބުކޮށްދިން ގޯލަށް ފަހު ޖާޒީ ބޭލުމުންނެވެ. އޭގެ ދެ މިނިޓު ފަހުން އޭނާ ޑައިވް ކުރިކަމަށް ބަލައި ރެފްރީވަނީ ދެވަނަ ރީނދޫ ކާޑަކާއެކީ ރަތްކާޑު އޭނާއަށް ދައްކާފައެވެ.

މެޗަށް ފަހު ވާހަކަ ދައްކަމުން ރެއާލްގެ ކޯޗު ޒިދާން ބުނީ ރެފްރީގެ ނިންމުންތަކުގެ ވާހަކަ ދެއްކުމަކީ އޭނާ ކުރާހިތްވާ ކަމެއް ނޫން ކަމަށެވެ. އެހެން ނަމަވެސް މެޗުގައި ބާސާއަށް ޕެނަލްޓީ ހައްގުވާނަމަ، ރޮނާލްޑޯއަށް ރަތްކާޑު ހައްގު ނޫންކަމަށެވެ. އަދި ކާޑު އެޕީލް ކުރާނެ ކަމަށާއި ބުދަ ދުވަހުގެ ރޭ ކުޅޭ މެޗުގައި ރޮނާލްޑޯއަށް ކުޅެވޭނެ ގޮތް ހެދުމަށް ކުރެވެން އޮތް ހުރިހާ ކަމެއް ކުރާނެކަމަށެވެ.

މީގެއިތުރުންވެސް ޒިދާންވަނީ 10 މީހުންނާ އެކީ ކުޅެ ރެއާލްއިން މެޗު ކާމިޔާބުކުރުމަށް އޭނާގެ ކުޅުންތެރިން ކުރި މަސައްކަތަށް ތައުރީފްކޮށްފައެވެ. އޭނާވަނީ ވަކިން ހާއްސަކޮށް އިސްކޯއާއި އަސެންސިއޯގެ ކުޅުން ފާހަގަކޮށްފައެވެ.

ދެވަނަ ލެގަށް ނުކުންނައިރު ރެއާލްއިން ވަނީ 1-3 ގެ ލީޑެއް ބާސާގެ މައްޗަށް ނަގާފައެވެ. ދެވަނަ ލެގު ކުޅުމަށް ހަމަޖެހިފައިވަނީ އޮގަސްޓް މަހުގެ 17 ވަނަ ދުވަހުއެވެ.