މިއަހަރުގެ ފަހުކޮޅު ގަތަރުގައި އޮންނަ ފީފާ ވޯލްޑް ކަޕްގައި ފްރާންސްގެ މިޑްފީލްޑަރު ޕައުލް ޕޮގްބާއަށް ނުކުޅެވިދާނެކަމަށް، ރިޕޯޓުތައް ބުނެފިއެވެ.
ޕޮގްބާއަށް މުބާރާތް ކުޅެވިދާނެކަމާމެދު ސުވާލު އުފެދުނީ އޭނާގެ ކަކުލަށް ލިބިފައިވާ އަނިޔާއިން ސަލާމަތްވުމަށް އޮޕަރޭޝަނެއް ކުރަން ޖެހުމުންނެވެ. ޕޮގްބާ ކުޅެމުން އަންނަ ޔުވެންޓަސްގެ ކޯޗު މަސިމިލިއާނޯ އަލެގްރީ ބުނީ، ހޯމަ ދުވަހުގެ ހެނދުނު ކުރިއަށްގެންދިޔަ ފަރިތަކުރުންތަކުގައި ޕޮގްބާ ބައިވެރިވިކަމަށެވެ. ނަމަވެސް ފަރިތަކުރުމުގެ ވަކި ހިސާބަކުން ކުރިއަށްނުގެންދެވި ހުއްޓާލަން ޖެހުނުކަމަށްވެސް މަސިމިލިއާނޯ ބުންޏެވެ.
މިދިޔަ ޖުލައި މަހު ލިބުނު އަނިޔާއިން ސަލާމަތްވުމަށްޓަކައި އޮޕަރޭޝަން ނުކޮށް ޕޮގްބާ މަޑުކުރީ ވޯލްޑް ކަޕްގައި ނުކުޅެވިދާނެތީއެވެ. ނަމަވެސް މިހާރު އޭނާ ވަނީ އޮޕަރޭޝަން ކުރުމަށް ނިންމާފައެވެ. ކޯޗު މަސިމިލިއާނޯ އަންދާޒާކުރާގޮތުގައި ޕޮގްބާއަށް އެނބުރި ކުޅުމުގެ ތެރެއަށް ވަދެވޭނީ އަންނަ އަހަރުގެ ޖެނުއަރީ މަހުއެވެ.
ވޯލްޑް ކަޕްގައި ފްރާންސްގެ ފުރަތަމަ މެޗު އޮތީ ނޮވެމްބަރު 22 ވަނަ ދުވަހު އޮސްޓްރޭލިޔާއާ ދެކޮޅަށެވެ. ވޯލްޑް ކަޕް ފެށެންވާއިރަށް ޕޮގްބާ ފިޓްވާނެތޯ ކުރެވުނު ސުވާލެއްގެ ޖަވާބުގައި މަސިމިލިއާނޯ ބުނީ، ވޯލްޑް ކަޕްގައި ޕޮގްބާއަށް ކުޅެވޭނެތޯ ބެލުން އެއީ އޭނާއަށް މުހިންމުކަމެއް ނޫންކަމަށެވެ.
ޕޮގްބާ ވަނީ 2018 ވަނަ އަހަރުގެ ވޯލްޑް ކަޕްގައި ފްރާންސް ޓީމުގައި މޮޅު ކުޅުމެއް ދައްކާފައެވެ. އެމުބާރާތުގެ ފައިނަލްގައި 4-1ން ކްރޮއޭޝިޔާ ބަލިކޮށް ފްރާންސް ތަށި އުފުލާލިއިރު، ޕޮގްބާ ވަނީ އެ މެޗުގައިވެސް ލަނޑު ޖަހާފައެވެ.
