މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުން އެންމެ ފަހުގެ ޗެމްޕިއަން ރަޝިޔާގެ ޑަނީލް މެޑްވެޑޭވް ކަޓައިފިއެވެ.

މެޑްވެޑޭވް މުބާރާތުން ކަޓާފައިވަނީ އޮސްޓްރޭލިއާގެ ނިކް ކިރްގިއޯސްއާ ބައްދަލުކުރި މެޗުން ބަލިވުމުންނެވެ. މެޑްވެޑޭވް ބަލިކޮށް ކިރްގިއޯސް ވަނީ މުބާރާތުގެ ކުއާޓާ ފައިނަލުން ޖާގަ ހޯދާފައެވެ.

މެޑްވެޑޭވްގެ މައްޗަށް ކިރްގިއޯސް ކުރި ހޯދާފައިވަނީ ތިން ސެޓު އެއް ސެޓުންނެވެ. މެޗުގެ ސެޓުތައް ގޮސްފައިވަނީ 7-6، 6-3، 3-6، އަދި 6-2 އިންނެވެ. މެޗަށްފަހު ކިރްގިއޯސް ބުނީ، އެއީ ވަރަށް ރަނގަޅަށް ދިޔަ މެޗެއް ކަމަށެވެ. އޭނާ ބުނީ މެޑްވެޑޭވް އަކީ ޑިފެންޑިން ޗެމްޕިއަންއަށްވުމުން އޭނާ އަށް އެތައް ޕްރެޝަރެއް އޮންނާނެ ކަމަށެވެ. ނަމަވެސް ކިރްގިއޯސް ބުނީ މިފަހުން އައިސް އޭނާ އަށް އަންނަނީ ރަނގަޅު ކުޅުމެއް ދެއްކެމުން ކަމަށެވެ.

މުބާރާތުގެ ކުއާޓާ ފައިނަލްގައި ކިރްގިއޯސް ވާދަކުރަން ޖެހޭނީ ރަޝިޔާގެ ކަރެން ހަޗަނޯވްއާއެވެ. މުބާރާތުގެ ކުއާޓާ ފައިނަލުން އޭނާ ޖާގަ ހޯދާފައިވަނީ ޕަބްލޯ ކަރޭނޯ ބުސްޓާގެ މައްޗަށް ކުރި ހޯދައިގެންނެވެ.