ޗައިނާއަށް ބާރުގަދަ ބިންހެލުމެއް އައިސް، 21 މީހުން މަރުވެއްޖެ
5 ސެޕްޓެމްބަރު 2022 | ހޯމަ 18:00ސިޗުއާން ޕްރޮވިންސަށް 2008 ވަނަ އަހަރު ކުރިމަތިވި ބިންހެލުމެއްގައިވެސް 70،000 މީހުން މަރުވެފައިވޭ
ޗައިނާ ސިފައިން - ބިންލެހުމާގުޅިގެން އެހީގެ މަސައްކަތުގައި ހަރަކާތްތެރިވަނީ
ޗައިނާގެ ހުޅަނގު ދެކުނު ފަޅީގައި އޮންނަ ސިޗުއާން ޕްރޮވިންސަށް ބާރުގަދަ ބިންހެލުމެއް އައުމުގެސަބަބުން ދިމާވި ތަފާތު ހާދިސާތަކުގައި މަދުވެގެން 21 މީހުން މަރުވެ އެތައް ގެއްލުންތަކެއް ލިބިއްޖެއެވެ. އެތަނުގެ ގަޑިން ހޯމަ ދުވަހު މެންދުރު 1.00ހާއިރު 6.6ގެ ބާރުމިނުގައި އައި މި ބިންހެލުން ފެށިފައިވަނީ ބިމުގެ 10 ވަރަކަށް ކިލޯމީޓަރު އަޑިންކަމަށް ޚަބަރު ލިބެއެވެ. ބިންހެލުމުގެ ސަބަބުން ޓެލެކޮމިޔުނިކޭޝަން ލައިންތައް ހަލާކުވެފައިވާކަމަށާއި އަދި ފަރުބަދަމަތިން ކިސަޑު ފައިބައި، މަގުތަކާއި ގެތަކަށް ސީރިއަސް ގެއްލުންތަކެއް ލިބިފައިވާކަމަށް، ލޯކަލް މީޑިޔާ ރިޕޯޓްތައް ބުނެއެވެ.
މިކާރިސާ ކުރިމަތިވިއިރު 21 މިލިއަން މީހުންގެ އާބާދީއެއް އޮންނަ ސިޗުއާން އޮތީވެސް ކޮވިޑް 19 ކޭސްތަކެއް ފެންނަމުން ދިއުމާގުޅިގެން، ހުކުރު ދުވަހުންފެށިގެން ލޮކްޑައުންކޮށްފައެވެ.
ބިންހެލުން ފެށިފައިވަނީ ފަރުބަދަ މަތީގެ އަވަށެއްކަމަށްވާ ލުޑިންގއިންނެވެ. މިއީ ޗެންގޑޫއާ 226 ކިލޯމީޓަރު ހުޅަނގު ދެކުނުގައިވާ އަވަށެކެވެ. އެހެންނަމަވެސް ބިންހެލުމުގެ ސަބަބުން ޗެންގޑޫ ކައިރީގައި އޮންނަ މެގަސިޓީއެއް ކަމަށްވާ ޗޮންގގިންގގެ އިމާރާތްތައްވެސް ހެލުނުކަމަށް ރިޕޯޓްތައް ބުނެއެވެ. އަދި 10،000އެއްހާ މީހުންގެ އާބާދީއެއް އޮންނަ ޗޮންގގިންގގެ މުވާސަލާތީ ލައިންތައް ކެނޑި، ބައެއް އިންޖީނުގެތައްވެސް ބަންދުކުރަން ޖެހުނުކަމަށްވެއެވެ.
ބިންހެލުންތައް ގިނަ ސަރަހައްދެއްކަމަށްވާ ސިޗުއާންއަށް މިދިޔަ ޖޫން މަހުވެސް 6.1ގެ ބާރުމިނުގައި ބިންހެލުމެއް އައިސް، ބޮޑެތި ގެއްލުންތަކެއް ވެފައިވެއެވެ. އަދި 2008ގައި ސިޗުއާންއަށް އައި ބިންހެލުމެއްގައި 70،000 މީހުން މަރުވެފައިވެއެވެ.
