އަފްޣާނިސްތާނަށް އައި ބިންހެލުމެއްގައި 8 މީހަކު މަރުވެއްޖެ
5 ސެޕްޓެމްބަރު 2022 | ހޯމަ 08:01ބިންހެލުން އައިސްފައިވަނީ 5.3 ގެ މެގްނިޓިއުޑްގައި
ބިންހެލުމުގެ ހަލާކުގެ ތެރެއަށް އަފްޣާނިސްތާން
އަފްޣާނިސްތާނަށް އައި ބިންހެލުމެއްގައި 8 މީހަކު މަރުވެއްޖެއެވެ.
ރޮއިޓަރސްގައި ރިޕޯޓު ކޮށްފައިވާ ގޮތުގައި ބިންހެލުން އައިސްފައިވަނީ އަފްޣާނިސްތާނުގެ އުތުރު އިރުމަތީ ހިސާބަކަށެވެ. މި ޙާދިސާގައި މަރުވި މީހުންގެ އަދަދު އިތުރުވާނެ ކަމަށް އަންދާޒާ ކުރެވޭކަމަށް އެ ޤައުމުގެ ދައުލަތުގެ މީޑިއާއާ ޙަވާލާދީ ބޭރުގެ ނޫސްތަކުން ވަނީ ރިޕޯޓު ކޮށްފައެވެ.
ޔުނައިޓެޑް ސްޓޭޓްސް ޖިއޮލޮޖިކަލް ސަރވޭއިން ރިޕޯޓު ކޮށްފައިވާ ގޮތުގައި ބިންހެލުން އައިސްފައިވަނީ 5.3 ގެ މެގްނިޓިއުޑްގައެވެ. އެގޮތުން ބިންހެލުން އައިސްފައިވަނީ ޖަލާލްއާބާދް ސިޓީއަށެވެ.
މި ބިންހެލުމުގެ ސަބަބުން މާލީ ގޮތުންނާއި އިންސާނީ ކާރިސާގެ ގޮތުން ބެލި ނަމަވެސް ބޮޑެތި ގެއްލުންތަކެއް ލިބިފައިވާ ކަމަށާއި، ވަކިން ޚާއްސަކޮށް ކުނާރް ޕްރޮވިންސަށް ބޮޑެތި ގެއްލުންތައް ކުރިމަތިވެފައިވާކަމަށް އެ ޕްރޮވިންސްގެ ގަވަރުނަރުގެ ތަރުޖަމާނު ވިދާޅުވިއެވެ. އަދި އެ ޕްރޮވިންސުން މަރުވި މީހުންގެ އަދަދުތައްވެސް އަދިވެސް އިތުރުވާނެކަމަށް ވަނީ ބެލެވިފައެވެ.
އޭގެ އިތުރުން، މި ބިންހެލުމުގެ ސަބަބުން އެކި ވަރުގެ އަނިޔާތައް ލިބުނު މީހުންގެ އަދަދުވެސް އިތުރުވަމުންދާކަމަށް ބޭރުގެ ނޫސްތަކުން ރިޕޯޓު ކުރެއެވެ. އެކަން އެ ޤައުމުގެ ޑިޒާސްޓަރ މިނިސްޓްރީގެ ތަރުޖަމާނު މުޙައްމަދު ނަސީމް ޙައްޤާނީވެސް ކަށަވަރު ކޮށްދެއްވައެވެ.
އަފްޣާނިސްތާނަށް ޖޫން މަހު އައި ބިންހެލުމުގެ ސަބަބުންވެސް އެ ޤައުމަށް ބޮޑެތި ގެއްލުންތަކެއް ވިއެވެ. އެފަހަރުވެސް ހާހަކަށްވުރެ ގިނަ މީހުން މަރުވިއިރު، ބައެއް ސަހަރުތައްވެސް މުޅިން ސުންނާފަތިވިއެވެ. ރެކްޓާ މިންގަނޑުން 6.1 ގެ ބާރުމިނުގައި އައި އެ ވަރުގަދަ ބިންހެލުމުގައި މަރުވި މީހުންގެ އަދަދު 1000 އިން މައްޗަށް އެރި އިރު، ޒަހަމްވީ މީހުންގެ އަދަދު 3000 އަށް ވުރެ މައްޗަށް އެރިއެވެ. އަދި އިތުރު އެތައް ހާސް ބައެއްގެ އާންމު ދިރިއުޅުން ހުއްޓުމަކަށް ގެނުވިއެވެ.
