ފީފާ ވޯލްޑް ކަޕްގެ ޓްރޮފީ ގާނާ އަށް ގެންގޮސްފިއެވެ.

ދުނިޔޭގެ ފުޓުބޯޅައިގެ ޤައުމުތަކުގެ މެދުގައި ކުޅެވޭ އެންމެ ޝަރަފުވެރި މުބާރާތުގެ ޓްރޮފީ ގާނާ އަށް ގެންގޮސްފައިވަނީ ދެ ދުވަހަށެވެ. ޓްރޮފީ ގާނާއަށް ގެންގޮސްފައިވަނީ ފްރާންސްއާއެކު 1998 ވަނަ އަހަރުގެ ވޯލްޑް ކަޕް އުފުލާލި ޑޭވިޑް ޓްރެޒްގުއެޓްއާއެކުއެވެ. އޭނާ އަކީ މިހާރު ފީފާގެ އެމްބެސެޑަރެކެވެ.

މުބާރާތުގެ ޓްރޮފީ ގާނާއަށް ގެނައުމާއެކު، ޑެލިގޭޝަނުންނަށް ކޮޓޮކޯ އިންޓަނޭޝަނަލް އެއާޕޯޓުން މަރުޙަބާ ދަންނަވާފައިވަނީ އެ ޤައުމުގެ ކުޅިވަރު މިނިސްޓަރު މުސްތަފާ ޔޫސިފް އާއި ފުޓުބޯޅަ އެސޯސިއޭޝަންގެ ރައީސް ކާޓް އޮކްރަކޫއެވެ. ހައި ސެކިޔުރިޓީއާއެކު ގާނާ އަށް މުބާރާތުގެ ޓްރޮފީ ގެންގޮސްފައިވާއިރު، ޓްރޮފީއާއެކު ފޮޓޯ ނެގުމުގެ ފުރުސަތު އާންމުންނަށް ވަނީ ހުޅުވާލާފައެވެ.

މުބާރާތުގެ ޓްރޮފީ ގާނާއަށް ގެނައުމާއެކު އެ ގައުމުގެ ފުޓުބޯޅަ އެސޯސިއޭޝަންގެ ރައީސް ވިދާޅުވީ، އެއީ އޭނާއަށް ނުހަނު ބޮޑު އުފަލެއް ލިބުނު ކަމެއް ކަމަށެވެ. މީގެ އިތުރުން އޭނާ ބުނީ މުބާރާތުގެ ކުރިން ޓްރޮފީ އެ ގައުމަށް ގެނައުމަކީ ވެސް ޚާއްސަ ކަމެއް ކަމަށެވެ. އޭނާ ފާހަގަކުރި ގޮތުގައި އެކަމުގެ ސަބަބުން މުބާރާތުގައި ވާދަކުރާ ގާނާގެ ކުޅުންތެރިންނަށް އިތުރު ހިތްވަރެއް ލިބޭނެއެވެ.

ނޮވެމްބަރު މަހު ޤަތަރުގައި ފަށާ ވޯލްޑް ކަޕްގައި ގާނާ ހިމެނިފައިވަނީ ވަރުގަދަ ޓީމުތަކަކާއެކު ގްރޫޕް އެޗްގައެވެ. ގާނާގެ އިތުރުން މި ގްރޫޕްގައި ދެން ހިމެނެނީ ޕޯޗުގަލް، އުރުގުއާއި އަދި ކޮރެއާ ރިޕަބްލިކްއެވެ.