ޓްރާންސްޕޯޓް މިނިސްޓްރީގެ ޚިދުމަތްތައް ދިނުމުގައި ދަތިތައް އެބަހުރިކަމަށް، މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން، ޢާއިޝަތު ނަޙުލާ ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ، ގައުމީ ސަނަދު ހާސިލްކުރާ ފަރާތްތަކަށް ލައިސަންސް ދިނުމަށް، މިނިސްޓްރީ އޮފް ހަޔަރ އެޑިއުކޭޝަނާ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާ ދެމެދު އެއްބަސްވުމެއްގައި ސޮއިކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
އެގޮތުން އެ ވުޒާރާގެ ބައެއް ޚިދުމަތްތައް ދިނުމުގައި ހުރި ދަތިތަކުގެ ތަފްސީލުތަކަށް މިނިސްޓަރ އަލިއަޅުއްވާލެއްވިއެވެ. އެގޮތުން ޑްރައިވިން ޓެސްޓު ހެދުމަށް ބޭނުންވާ އުޅަނދުތައް ހޯދުމަށްވެސް އެ ވުޒާރާއަށް ދަތިވާކަަމަށާއި، އެ އެމްއޯޔޫގައި ސޮއިކުރުމުގެ ސަބަބުން އެފަދަ ކަންކަން ފަސޭހަވެގެންދާނެކަަމަށް މިނިސްޓަރ ވިދާޅުވިއެވެ. އަދި އެ އެމްއޯޔޫގެ ސަބަބުން ފަންނީ މީހުން ބިނާކުރުމަށް މަގުފަހިވެގެންދާނެކަން މިނިސްޓަރ ފާހަގަކުރެއްވިއެވެ. ނަޙުލާ ވަނީ، ކުރިއަށް އޮތްތަނުގައި މީހުން ބިނާކުރުން އިތުރަށް ފުޅާކުރުމަށް ޓްރާންސްޕޯޓް މިނިސްޓްރީގެ ވިސްނުން ހުރިކަން ފާހަގަކުރައްވާފައެވެ.
ގައުމީ ސަނަދު ހާސިލުކުރާފަރާތްތަކަށް ލައިސަންސް ދޭންފެށުމުން އިތުރު އިމްތިހާނަކާނުލައި، ޓްރާންސްޕޯޓް ދާއިރާގެ އެއްގަމާއި ކަނޑުގެ އުޅަނދުތައް ދުއްވުމުގެ ލައިސަންސް މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީގެ ނޭޝަނަލް ސެޓްފިކެޓް ހާސިލްކުރާ ފަރާތްތަކަށް، ލިބޭނެގޮތް ހަމަޖެހިގެންދާނެއެވެ.
