ޕާކިސްތާނުގައި ފެންބޮޑުވުން: ހޮނިހިރު ދުވަހު މަރުވި 57 މީހުންގެ ތެރޭގައި 25 ކުޑަކުދިން
މިހާތަނަށް 441 ކުޑަކުދިން ވަނީ މަރުވެފައި
ޕާކިސްތާނުގައި ފެންބޮޑުވެ އެތައް މިލިއަން ބަޔަކު ވަނީ ހާލުގައި ޖެހިފައި
ޕާކިސްތާނުގައި ފެންބޮޑުވުމުގެ ހާދިސާގައި، ހޮނިހިރު ދުވަހު 57 މީހަކު މަރުވެފައިވާ ކަމަށް ރިޕޯޓްކޮށްފިއެވެ.
ރޮއިޓަރސްގައި ބުނެފައިވަނީ ހޮނިހިރު ދުވަހުގެ ނިޔަލަށް ފެންބޮޑުވެ ހިނގައިދިޔަ ހާދިސާތަކުގައި ހޮނިހިރު ދުވަހު އެކަނިވެސް 57 މީހުން މަރުވެފައިވާ އިރު، މީގެ ތެރޭގައި 25 ކުޑަކުދިން ހިމެނޭ ކަމަށެވެ.
ޕާކިސްތާނަށް ބޯކޮށް ވާރޭވެހި ހިނގައިދިޔަ ހާދިސާތަކުގައި ފެންބޮޑުވެ ގައުމު ވަނީ ނާޒުކު ހާލަތަކަށް ވެއްޓީފައެވެ. އެގައުމުގެ އެތައް މިލިއަން މީހުންނަށް އަވަސް އިންސާނީ އެހީތެރިކަން ބޭނުންވާކަމަށް ބައިނަލްއަގުވާމީ މީޑިއާތަކުގައި ވަނީ ރިޕޯޓްކޮށްފައެވެ.
ގައުމަށް ދިމާވެފައިވާ ކާރިސާއިން އަރައިގަތުމަށް އެހީތެރިކަން ފޯރުކޮށްދިނުމަށް ބޮޑުވަޒީރު ޝެހްބާޒް ޝަރީފްގެ ބެއްލެވުމުގެ ދަށުން މަތީފަންތީގެ ބޮޑީއެއް ވަނީ އުފައްދަވާފައެވެ.
މޫސުމީ ވިއްސާރައާއި، އުތުރު ފަރުބަދަތަކުގައި ހުރި ގަނޑުތައް ވިރުމުގެ ސަބަބުން، ފެންބޮޑުވެ ޕާކިސްތާން ކުރިމަތިލާން ޖެހިފައިވާ ކާރިސާގެ ސީދާ އަސަރު 33 މިލިއަން މީހުންނަށް ވަނީކޮށްފައެވެ. އަދި މި ހާދިސާތަކުގައި މިހާތަނަށް 1265 މީހުން މަރުވެފައިވާ އިރު، މީގެ ތެރޭގައި 441 ކުޑަކުދިން ހިމެނެއެވެ.
މަރުވި ކުޑަކުދިންގެ އަދަދު އިތުރުވަމުން އަންނަ އިރު، މިކަމާއި ގުޅިގެން އަންނަނީ ކަންބޮޑުވުން ފާޅުކުރަމުންނެވެ. ޔުނިސެފުން ހުކުރު ދުވަހު ބުނެފައިވަނީ ފެންބޮޑުވުމާއި ގުޅިގެން ދެން ފެތުރޭ ބަލިތަކާއެކު އިތުރު ކުޑަކުދިން މަރުވުމުގެ ބިރު ބޮޑުކަމަށެވެ.
