ވޯލްޑް ކަޕްގެ ވޮލަންޓިއަރުން ތަމްރީނުކުރުން ރަސްމީކޮށް ފަށައިފި

ވޯލްޑް ކަޕްގެ އެކި ކަންކަން އިންތިޒާމުކުރުމުގައި ހަރަކާތްތެރިވާނެ ވޮލަންޓިއަރުން ތަމްރީނުކުރުން ރަސްމީކޮށް ފަށައިފިއެވެ.

ވޮލަންޓިއަރުން ތަމްރީނުކުރުން ފަށާފައިވަނީ ޚައްސަ ރަސްމިއްޔާތަކުންނެވެ. މި ރަސްމިއްޔާތު ކުރިއަށް ގެންގޮސްފައިވަނީ މުބާރާތް ކުޅުމަށް ހަމަޖެހިފައިވާ ސްޓޭޑިއަމްތަކުގެ ތެރެއިން ލުސައިލް ސްޓޭޑިއަމްގައެވެ. މުބާރާތުގައި ވޮލަންޓިއަރުން ބޭނުންކުރާނެ ރަސްމީ ޔުނީފޯމްވެސް މި ރަސްމިއްޔާތުގައި ލޯންޗުކޮށްފައިވެއެވެ.

ވޮލަންޓިއަރުން ތަމްރީނުކުރުން ރަސްމީކޮށް ފެށުމަށް ބޭއްވި މި ރަސްމިއްޔާތިގައި 16،000ށްވުރެ ގިނަ ފަރާތްތަކުން ވަނީ ބައިވެރިވެފައެވެ. މީގެ ތެރޭގައި ވޮލަންޓިއަރުންނާއި ސްޓާފުންގެ އިތުރުން ޚާއްސަ މެހެމާނުން ހިމެނެއެވެ. އަދި މި ރަސްމިއްޔާތުގައި ހާހަކަށްވުރެ ގިނަ ވޮލަންޓިއަރުން އޮންލައިންކޮށް ބައިވެރިވިކަމަށް ފީފާއިން މައުލޫމާތުދެއެވެ.

މި ރަސްމިއްޔާތުގައި ވާހަކަދައްކަވަމުން މުބާރާތުގެ ސުޕްރީމް ކޮމިޓީ ފޯރ ޑެލިވަރީ އެންޑް ލެގަސީގެ ޑިރެކްޓަރ ޖެނެރަލް ޔާސިރު އަލް ޖަމާލް ވަނީ މުބާރާތް ކާމިޔާބުކަމާއެކު ކުރިއަށް ގެންދިއުމަށް ވޮލަންޓިއަރުންދޭ އެއްބާރުލުން ފާހަގަކޮށް ޝުކުރުއަދާކޮށްފައެވެ. ފީފާގެ ޗީފް އޮޕަރޭޓިންގ އޮފިސަރ ކޮލިން ސްމިތު ވަނީ ދުނިޔޭގެ އެކި ކަންކޮޅުތަކުން ވޮލަންޓިއަރުން ހަރަކާތްތެރިވެ، މުބާރާތާއި ފުޓްބޯޅަ ކުރިއަރުވަން މަސައްކަތް ކުރުމަކީ އުފާވެރި މަންޒަރެއްގެ ގޮތުގައި ސިފަކުރައްވާފައެވެ.

ކުލަގަދަކޮށް ކުރިއަށް ގެންދިޔަ މި ރަސްމިއްޔާތުގައި، ވޮލަންޓިއަރުން މުބާރާތުގައި ކުރަންޖެހޭ މަސައްކަތްތަކަށް އަހުލުވެރިކުރުމަށް ގިނަ މައުލޫމާތުތަކެއް ދީފައިވެއެވެ. ވޮލަންޓިއަރުން ބޭނުންކޮށްގެން މުބާރާތުގައި 45 ހަރަކާތެއް ކުރިއަށް ގެންދިއުމަށް ހަމަޖެހިފައިވެއެވެ.