މޫސުމީ ވިއްސާރައާއެކު ޕާކިސްތާނުގެ 3 ބައިކުޅަ 1 ބައި ޣަރަޤުވިއެވެ. ބޮޑުވި ފެންގަނޑުން ލިބުނު ގެއްލުންތަކުގެ ހަގީގީ ކުލަވަރު އަދި ކިރިޔާ ފެންނަން ފެށީއެވެ. ބައެއް ސަރަހައްދުތަކުން ހިސާބަކަށް ފެންގަނޑު ހިނދެންފެށުމުންނެވެ. ހަމަޖެހުމުގެ ނޭވާއެއް ލެވޭނެ ދުވަހެއް އަދި ބުނާކަށް ނޭނގެއެވެ. ބޮޑުވި ފެންގަނޑު ހިނދެންފެށިއިރު، މިއަދު އުޅެން ޖެހިފައިވަނީ ބޯ ކިސަޑުގަނޑުތަކުގެ ތެރޭގައެވެ.
ޚައިބަރު ޕަޚްތުންޚްވާގެ ޖަނިކޫރު އަވަށުގެ ރަށްވެހިންނަކީ، މި ފަހަރު ހިނގި ފެންބޮޑުވުމުގެ ހާދިސާތަކުގައި އެންމެ ބޮޑު ގެއްލުމަކާ ކުރިމަތިލީ ބައެކެވެ.
އާންމު ގޮތެއްގަ މި ސަރަހައްދުގަ މާ ބޮޑަކަށް ފެންގަނޑު ބޮޑެއް ނުވާނެ. އެހެންވެ، އަހަރެމެންވެސް ތިބީ ކޮންމެވެސް ވަރެއްގެ ހަމަޖެހުމެއްގަ. އެތެރޭގަ ތިބީވެސް. އެކަމަކު ހަވީރުވީއިރު ފެންގަނޑު ފިސާރި ބޮޑުވެއްޖެ. ގެއިން ނުކުންނަން ޖެހުނީވެސް ފަތާފަ. އަހަރަމެންނަށް ހަމަ ކިރިއާ އަމިއްލަ ފުރާނައާ ބައެއް ކަހަލަ ޖަނަވާރުތައް ސަލާމަތްކުރެވޭވަރުވީ. ގޭތެރޭގެ ހުރިހާ ސަމާނެއް ވާނީ ދޫކޮށްލާފަ. ކޮޓަރީގަ ހުރި ހުރިހާ އެއްޗެއް ތިހިރީ ފެންނަން. ހަލާކުވެފަ.ޚާން ގުލް؛ ޕާކިސްތާނުގެ ރަށްވެއްސެއް
ހުސް ބިންތަކާއި މަގުތައް މިއަދު ފުރިފައި އޮތީ ކިސަޑުންނެވެ. ފެންގަނޑެއްގެ ތެރޭގައި އުޅުމަށްފަހު، ބޯވެފައިވާ ޗަކަ ކިސަޑުގަނޑުގެ ތެރޭގައި އުޅުމަކީ މާ އުނދަގޫ ކަމެކެވެ. ނުތާހިރުކަންވެސް އިންތިހާއަށް އިހުސާސްކުރުވާކަމެކެވެ.
އަހަރަމެން ދިރިއުޅޭ ގެ ދޫކޮށްލެވޭކަށް ނެތް. ޖަނަވާރުތައް ދޫކޮށްލެވޭކަށް ނެތް. އަހަރަމެންނަށް ބޭނުންވާ ކާބޯތަކެއްޗާ، ނާމްސޫތްޕާ ޖަނަވާރުތަކަށް ހުއިކޮޅެއްނަމަވެސް އެބަ ޖެހޭ ހޯދަން. އެކަމަކު، ބިންގަނޑު މިއޮތީ ކިސަޑުން ތަތްތެޅިފަ. މިތާ ފޫ ހަރާލައިގެން އިށީނދެލެވޭކަށްވެސް ނެތް. އަހަރެމެންވެސް ބޯ ހިޔާވަހިކޮށްލާނެ ޓެންޓެއް ޖަހަން ބޭނުން ކޮންމެވެސް ދިމާލެއްގަ. ބައިވަރު މައްސަލަތައް އެބަހުރި.ޖަހާން ޒީބް؛ ޕާކިސްތާނުގެ ރަށްވެއްސެއް
ތާރީޚު ނުދެކޭފަދަ މޫސުމީ ގަދަ ވިއްސާރައިގެ އިތުރުން، އުތުރުގެ ފަރުބަދަމަތީ ސަރަހައްދުގެ ގަނޑުފެނުގެ ކޯރުތައް ނުވަތަ ގްލޭޝިއަރތައް ވިރުމުގެ ސަބަބުން ޕާކިސްތާނުގައި ހިނގި ފެންބޮޑުވުމުގެ ހިތާމަވެރި ކާރިސާގައި މަރުވި މީހުންގެ އަދަދު 1200ށްވުރެ މައްޗަށް ވަނީ އަރާފައެވެ. އޭގެ ތެރޭގައި 416 ކުޑަކުދިންވެސް ހިމެނޭކަމަށް، ޕާކިސްތާނުގެ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ވަނީ ބުނެފައެވެ.
ޕާކިސްތާނަށް މިއަދު ކުރިމަތިލާންޖެހިފައިވާ ކާރިސާގެ އަސްލަކީ މޫސުމީ ނޭދެވޭ ބަދަލުތައްކަމަށް ގިނަ ބަޔަކު އިއްތިފާގުވާއިރު، ޕާކިސްތާނަކީ މޫސުމީ ނޭދެވޭ ބަދަލުތަކަށް މަގުފަހިކުރާ އެންމެ މައިގަނޑު އެއް މަސްދަރު ކަމަށްވާ، ޖައްވު ހޫނުކުރާ ވިހަ ގޭސް ބޭރުކުރާ ގައުމުތަކުގެ ލިސްޓުގައި މާ ބޮޑު ހިއްސާއެއް އޮންނަ ގައުމެއް ނޫންކަން، އެ ގައުމުގެ ކަމާބެހޭ ފަރާތްތަކުން ފާހަގަކުރައްވައެވެ. ނަމަވެސް، މިއަދު ޕާކިސްތާނަކީ މޫސުމީ ނޭދެވޭ ބަދަލުތަކުގެ ހަގީގީ ތަކުލީފު ތަސްވީރުކޮށްދޭ "ގްރައުންޑް ޒީރޯ"ކަމަށް ޕާކިސްތާނުން ދަނީ ސިފަ ކުރަމުންނެވެ.
މި ހާލަތުގައިވެސް ޕާކިސްތާނުގެ ރައްޔިތުން، އެމީހުންގެ އީމާންތެރިކަމަށް ކުޑަނަމަވެސް ހީނަރުކަމެއް އަޔަކު ނުދެއެވެ. ބޮޑުވެފައި ވާ ކިސަޑު ފެންގަނޑު ހުރަސްކޮށް، ހުކުރު ދުވަހުގެ އެންމެ ޚާއްސަ އަޅުކަން އަދާކުރުމަށްޓަކައި، ހުކުރު ނަމާދުގެ ޖަމާއަތަށް ދިޔަ މީހުންގެ އަދަދުވެސް މަދެއްނޫނެވެ.
އެންމެ ފަހުން މި ކުރިމަތިލާން ޖެހުނު ފެންބޮޑުވުމުގެ ކާރިސާއަކީ މާތްﷲ އަހަރަމެންނަށް ފޮނުއްވި އިމްތިހާނެއް. މި ހުކުރު ދުވަހު، އަޅުކަމަށް އައި އެންމެންވެސް ވަނީ، ފެންބޮޑުވުމުގެ އަސަރުކުރި މީހުންގެ ހައްގުގަ ޚާއްސަ ދުއާއެއް ކޮށްފަ. ފެންބޮޑުވުމުގެ އަސަރުކުރި މީހުން، މި މުސީބާތުން ދިންނަވާތޯ ދުއާކުރި. އަދި ދިރިއުޅުމަށް އުޖާލާކަން ލިބުމަށް އެދި ދުއާކުރި. އަދި މާތްﷲގެ ރަހުމަތްފުޅު، އަޅުތަކުންގެ މައްޗަށް ތަނަސްކޮށްދެއްވުން އަދައިގެން ދުއާކުރި.ޙާފިޒް ޢަލީ ޙަސަން؛ މިސްކިތުގެ އިމާމް
މި ފެށުނު ސެޕްޓެމްބަރ މަހަކީ ޕާކިސްތާނަށް އަދިވެސް ގަދައަށް ވިއްސާރަކޮށް، ފެންބޮޑުވުމުގެ ހާދިސާތަކާ ކުރިމަތިލާންޖެހޭނެ ދުވަސްތަކެއްކަމަށް، މޫސުމާބެހޭ އޮފިޝަލުން ވަނީ ލަފާކުރައްވާފައެވެ. ޕާކިސްތާނުގެ ދެކުނުގެ ސަރަހައްދުތައް މިހާރު ހުށިޔާރުވެ އޮތީ އިންޑަސް ކޯރުގެ ފެންގަނޑު ފުރި ބަންޑުންވެގެން ހިނގައިދާނެ ވަގުތަކަށެވެ.
