ޕާކިސްތާނު ވިއްސާރަ: ފެންގަނޑު ހިނދުނުއިރު ބޯ ކިސަޑުން ސަލާމަތްނުވެވި ތާށިވެފައި!

މޫސުމީ ވިއްސާރައާއެކު ޕާކިސްތާނުގެ 3 ބައިކުޅަ 1 ބައި ޣަރަޤުވިއެވެ. ބޮޑުވި ފެންގަނޑުން ލިބުނު ގެއްލުންތަކުގެ ހަގީގީ ކުލަވަރު އަދި ކިރިޔާ ފެންނަން ފެށީއެވެ. ބައެއް ސަރަހައްދުތަކުން ހިސާބަކަށް ފެންގަނޑު ހިނދެންފެށުމުންނެވެ. ހަމަޖެހުމުގެ ނޭވާއެއް ލެވޭނެ ދުވަހެއް އަދި ބުނާކަށް ނޭނގެއެވެ. ބޮޑުވި ފެންގަނޑު ހިނދެންފެށިއިރު، މިއަދު އުޅެން ޖެހިފައިވަނީ ބޯ ކިސަޑުގަނޑުތަކުގެ ތެރޭގައެވެ.

ޚައިބަރު ޕަޚްތުންޚްވާގެ ޖަނިކޫރު އަވަށުގެ ރަށްވެހިންނަކީ، މި ފަހަރު ހިނގި ފެންބޮޑުވުމުގެ ހާދިސާތަކުގައި އެންމެ ބޮޑު ގެއްލުމަކާ ކުރިމަތިލީ ބައެކެވެ.

ހުސް ބިންތަކާއި މަގުތައް މިއަދު ފުރިފައި އޮތީ ކިސަޑުންނެވެ. ފެންގަނޑެއްގެ ތެރޭގައި އުޅުމަށްފަހު، ބޯވެފައިވާ ޗަކަ ކިސަޑުގަނޑުގެ ތެރޭގައި އުޅުމަކީ މާ އުނދަގޫ ކަމެކެވެ. ނުތާހިރުކަންވެސް އިންތިހާއަށް އިހުސާސްކުރުވާކަމެކެވެ.

ތާރީޚު ނުދެކޭފަދަ މޫސުމީ ގަދަ ވިއްސާރައިގެ އިތުރުން، އުތުރުގެ ފަރުބަދަމަތީ ސަރަހައްދުގެ ގަނޑުފެނުގެ ކޯރުތައް ނުވަތަ ގްލޭޝިއަރތައް ވިރުމުގެ ސަބަބުން ޕާކިސްތާނުގައި ހިނގި ފެންބޮޑުވުމުގެ ހިތާމަވެރި ކާރިސާގައި މަރުވި މީހުންގެ އަދަދު 1200ށްވުރެ މައްޗަށް ވަނީ އަރާފައެވެ. އޭގެ ތެރޭގައި 416 ކުޑަކުދިންވެސް ހިމެނޭކަމަށް، ޕާކިސްތާނުގެ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ވަނީ ބުނެފައެވެ.

ޕާކިސްތާނަށް މިއަދު ކުރިމަތިލާންޖެހިފައިވާ ކާރިސާގެ އަސްލަކީ މޫސުމީ ނޭދެވޭ ބަދަލުތައްކަމަށް ގިނަ ބަޔަކު އިއްތިފާގުވާއިރު، ޕާކިސްތާނަކީ މޫސުމީ ނޭދެވޭ ބަދަލުތަކަށް މަގުފަހިކުރާ އެންމެ މައިގަނޑު އެއް މަސްދަރު ކަމަށްވާ، ޖައްވު ހޫނުކުރާ ވިހަ ގޭސް ބޭރުކުރާ ގައުމުތަކުގެ ލިސްޓުގައި މާ ބޮޑު ހިއްސާއެއް އޮންނަ ގައުމެއް ނޫންކަން، އެ ގައުމުގެ ކަމާބެހޭ ފަރާތްތަކުން ފާހަގަކުރައްވައެވެ. ނަމަވެސް، މިއަދު ޕާކިސްތާނަކީ މޫސުމީ ނޭދެވޭ ބަދަލުތަކުގެ ހަގީގީ ތަކުލީފު ތަސްވީރުކޮށްދޭ "ގްރައުންޑް ޒީރޯ"ކަމަށް ޕާކިސްތާނުން ދަނީ ސިފަ ކުރަމުންނެވެ.

މި ހާލަތުގައިވެސް ޕާކިސްތާނުގެ ރައްޔިތުން، އެމީހުންގެ އީމާންތެރިކަމަށް ކުޑަނަމަވެސް ހީނަރުކަމެއް އަޔަކު ނުދެއެވެ. ބޮޑުވެފައި ވާ ކިސަޑު ފެންގަނޑު ހުރަސްކޮށް، ހުކުރު ދުވަހުގެ އެންމެ ޚާއްސަ އަޅުކަން އަދާކުރުމަށްޓަކައި، ހުކުރު ނަމާދުގެ ޖަމާއަތަށް ދިޔަ މީހުންގެ އަދަދުވެސް މަދެއްނޫނެވެ.

މި ފެށުނު ސެޕްޓެމްބަރ މަހަކީ ޕާކިސްތާނަށް އަދިވެސް ގަދައަށް ވިއްސާރަކޮށް، ފެންބޮޑުވުމުގެ ހާދިސާތަކާ ކުރިމަތިލާންޖެހޭނެ ދުވަސްތަކެއްކަމަށް، މޫސުމާބެހޭ އޮފިޝަލުން ވަނީ ލަފާކުރައްވާފައެވެ. ޕާކިސްތާނުގެ ދެކުނުގެ ސަރަހައްދުތައް މިހާރު ހުށިޔާރުވެ އޮތީ އިންޑަސް ކޯރުގެ ފެންގަނޑު ފުރި ބަންޑުންވެގެން ހިނގައިދާނެ ވަގުތަކަށެވެ.