ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެފައިވާ "ސެލްފް އެލިވޭޓިންގ ޕްލެޓްފޯމް" (އެސްއީޕީ)، ވިލިމާލެ ފަރަށް އަރާ، އެ ސަރަހައްދަށް ވެއްޓުނު ދަގަނޑުތައް އަދިވެސް ނުނެގޭ ކަމަށާއި، އެ މަސައްކަތް މިހާރު އިނބިލީހުގެ ކައިވެންޏަށް ވެފައިވާ ކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.
އެ ޕްލެޓްފޯމް ފުންކޮށް، ނަގާފައި ވަނީ މިދިޔަ ހަފްތާގެ ހޮނިހިރު ދުވަހުގެ 12:30އެހާއިރު އެވެ. އެއީ އެ ޕްލެޓްފޯމް ނެގުނީ ފަރަށް އެރިތާ 12 ދުވަސް ފަހުންނެވެ. މި މައްސަލަ އާއި ގުޅޭގޮތުން ރާއްޖެ އެމްވީ އާއި ވާހަކަދައްކަވަމުން އީޕީއޭގެ ޑިރެކްޓަރ ޖެނަރަލް އިބްރާހިމް ނައީމް ވިދާޅުވީ ޕްލެޓްފޯމު ފުންކުރުމުގެ މަސައްކަތް ނިމުނު ނަމަވެސް އެ ސަރަހައްދު ސާފުކޮށް، އެ ސަރަހައްދުގައި ހުރި ދަގަނޑުތައް ނެގުމުގެ މަސައްކަތް މިހާތަނަށް އައި އިރުވެސް ނުކުރެވޭ ކަމަށެވެ. އަދި އެ މަސައްކަތް ނިމުނުހާ އަވަހަކަށް ދިރާސާ ކުރުމުގެ މަސައްކަތް ފަށްޓަވާނެ ކަމަށް ނައީމް ވިދާޅުވިއެވެ.
އެ ތަނުގައި ހުރި ދަގަނޑުތައް ނުނެގޭ. މާދަމާ، މާދަމާ ނަގަނީގަ އެދަނީ. އެ އެއްޗެހި ނަގާ އިރު ގެއްލުން ވާނެ އިތުރަށް. އެހެންވީމަ އެ އެއްޗެހި ނެގީމަ ދިރާސާކުރަން ފެށޭނީ. މިހާރު އެ އެއްޗެހި ނެގުން އިނބިލީހުގެ ކައިވެންޏަށް ވެއްޖެއިބްރާހިމް ނައީމް، އީޕީއޭގެ ޑިރެކްޓަރ ޖެނެރަލް
ނައީމު މިފަދައިން ވިދާޅުވެފައި ވާއިރު އާއްމުކޮށް "އިނބިލީހުގެ ކައިވެނި" ކަމަށް ދިވެހިން ބުނެ އުޅެނީ ކަމެއް ކުރާނެ ކަމަށް ބުނާ ތާރީޚު ފަހަނައަޅާ ދާ އިރު އެކަން ނުކުރެވި ތަކުރާރުކޮށް ނުކުރެވި އޮތުމުންނެވެ.
އެ ޕްލެޓްފޯމް ފަރަށް އެރުމާއި ގުޅިގެން ލިބުނު ގެއްލުންތައް ބެލުމަށް ގޮވާާލާ ރައްޔިތުންގެ މަޖިލީހަށް މައްސަލަ އެއްވެސް ވަނީ ހުށަހަޅާފައެވެ. ވިލިމާލެ ދާއިރާގެ މެންބަރު އަހުމަދު އުޝާމް ހުށަހެޅުއްވި އެ މައްސަލައިގައި، އެ ޕްލެޓްފޯމް ފަރަށް އެރުމުގެ ސަބަބުން ވިލިމާލޭގެ ފަރަށް ބޮޑެތި ގެއްލުންތަކެއް ވަމުން ދިޔަކަން ފާހަގަކުރައްވާފައިވެއެވެ. އަދި މިފަދަ ކަންކަން ތަކުރާރުވިޔަ ނުދިނުމަށްޓަކާ ބްރިޖު ޕްރޮޖެކްޓްގެ މަސައްކަތް ކުރަމުންދާ ފެންވަރު ސަރުކާރުގެ ކަމާގުޅުންހުރި އިދާރާތަކުން ވަރަށް ކައިރިން ބަލައި މިހާރުން މިހާރަށް ވެސް މުހިންމު ފިޔަވަޅުތަކެއް އަޅަންޖެހޭކަމަށް ފެންނަ ކަމަށް އޭނާ ވަނީ ވިދާޅުވެފައެވެ.
މީގެކުރިން އެ ޕްލެޓްފޯމް ނަގަން ހަމަޖެއްސި ތާރީހު ފަހަނައަޅާ ދިޔަ އިރުވެސް އެ ޕްލެޓްފޯމު ނެގިފައެއް ނުވެއެވެ. އޭރު އެ މަޝްރޫއު ހިންގަމުން އަންނަ އިންޑިއާގެ އެފްކޮންސް ކުންފުނިން ބުނީ ޕްލެޓްފޯމް ނުނެގި ލަސްވީ މޫސުން ގޯސްވުމުގެ ސަބަބުން ކަމަށެވެ. އެ ކުންފުނިން ވަނީ އެ ޕްލެޓްފޯމް ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑުވުމުގެ ސަބަބުން ކަމަށް ވެސް ބުނެފައެވެ. އަދި އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށްކަމަށް އެ ކުންފުނިން ބުނެފައިވެއެވެ.
