1 ޖުލައި 2025 ގައި މިނިސްޓަރު މުއްތަލިބު ވިދާޅުވީ މުޅި ބްރިޖް މަޝްރޫއުގެ 60.84 ޕަސެންޓްގެ މަސައްކަތް ނިމިފައިވާ ކަމަށް
ތިލަމާލެ ބްރިޖުގެ މަސައްކަތް ކުރިއަށްދަނީ
ތިލަމާލޭ ބްރިޖުން މިހާތަނަށް 67 ޕަސެންޓްގެ މަސައްކަތް ނިމިފައިވާ ކަމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ބުނެފި އެވެ.
ބުރާސްފަތި ދުވަހު އެ މިނިސްޓްރީން ބުނީ، ތިލަމާލެ ބްރިޖުގެ މަސައްކަތް ތާވަލްއާ އެއްގޮތަށް ކުރިއަށް ދާ ކަމަށާއި، މިހާތަނަށް 67.4 ޕަސެންޓްގެ މަސައްކަތް ނިމިފައިވާ ކަމަށެވެ.
67.4 ޕަސެންޓްގެ މަސައްކަތް ނިމިފައިވާ ކަމަށް މިނިސްޓްރީން ބުނެފައިވާއިރު، 1 ޖުލައި 2025 ގައި މިނިސްޓަރު، ޑރ އަބްދުﷲ މުއްތަލިބު ވިދާޅުވީ މުޅި ބްރިޖް މަޝްރޫއުގެ 60.84 ޕަސެންޓްގެ މަސައްކަތް އެއްކޮށް ނިމިފައިވާ ކަމަށެވެ. އަދި 30 މެއި 2024 ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު މުއްތަލިބު ވިދާޅުވީ މާލެއިން ވިލިމާލެ އަށް 31 ޑިސެންބަރު 2025ށް، މާލެއިން ގުޅިފަޅަށް 31 މާރިޗް 2026ށް، ގުޅީފަޅުން ތިލަފުއްޓަށް 30 ސެޕްޓެމްބަރު 2026ށް ނިންމަން އަމާޒު ހިފައިވާ ކަމަށެވެ.
މިސަރުކާރުގައި ތަރައްގީގެ މަޝްރޫއުތައް ހުއްޓުވާފައިވާއިރު، ބްރިޖުގެ މަސައްކަތުގެ ސްޕީޑް ވަރަށް ދަށް ކަމަށް ގިނަ ބަޔަކު ދަނީ ބުނަމުންނެވެ.
ކުރީގެ ރައީސް އިބްރާހީމް މުހައްމަދު ސާލިހުގެ ވެރިކަމުގައި މަސައްކަތް ފެށި މި ބްރިޖަކީ މުޅި ދުނިޔޭގައި ވެސް އެންމެ އުސްކޮށް ހަދާ ޕްރީކާސްޓް ސެގްމަންޓުތައް ހުންނަ ބްރިޖުގައި ކަމަށް، ރާއްޖޭގައި ހުންނަ އިންޑިއާ ހައި ކޮމިޝަނުން މީގެ ކުރިން ބުނެފައިވެ އެވެ. އެގޮތުން، ތިލަމާލެ ބްރިޖުގެ ސުޕަރ ސްޓްރަކްޗަރގެ ޕްރީކާސްޓް ސެގްމަންޓްތަކުގެ އުސްމިނުގައި 8.177 މީޓަރު ހުންނާނެކަމަށް އެ ކޮމިޝަނުން އޭރު ބުންޏެވެ.
މި މަޝްރޫއުގެ ދަށުން 3 ބްރިޖާއި ކޯޒުވޭ، އަދި މަގުތަކުގެ ނެޓްވޯރކް ހަދާއިރު ދިގުމިނުގައި 6.7 ކިލޯމީޓަރު ހުންނާނެއެވެ. މީގެއިތުރަށް ގުޅާލާ ކޮންމެ ރަށަކަށް އަރައި ފޭބުމަށްޓަކައި އިންޓަރޗޭންޖް ޕޮއިންޓްތަކާއި ޕާކިންގ ސަރަހައްދުތައް ވެސް މި މަޝްރޫއުގެ ދަށުން ހަދާނެ އެވެ.
މުޅި މި މަޝްރޫއަށް 500 މިލިއަން ޑޮލަރު ހޭދަވެ އެވެ. މި މަޝްރޫއު ކުރިއަށްގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. ތިލަމާލެ ބްރިޖްގެ މަޝްރޫއަކީ ރާއްޖޭގައި ހިންގާ އުމްރާނީ އެންމެ ބޮޑު އެއް މަޝްރޫއު ކަމަށް ވާއިރު، އެ މަސައްކަތް ސަރުކާރުން ހަވާލުކޮށްފައިވަނީ އިންޑިއާގެ އެފްކޮންސް އިންފްރާސްޓްރަކްޗަރާ އެވެ.
