ޕާކިސްތާން މާޔޫސްކަމުގައި: ބޮޑުވި ފެންގަނޑު ތެރޭ ޣަރަޤުވިނަމަ މާ ރަނގަޅުވީސް!

ދުނިޔެއަށް މިއަދު ކުރިމަތިލާން ޖެހިފައިވާ މޫސުމީ ނޭދެވޭ ބަދަލުތަކުގެ ސަބަބުން މިވަގުތު އެންމެ ބޮޑު ތަކުލީފެއް އުފުލަމުންދާ ޕާކިސްތާނުގެ ރައްޔިތުންގެ ތެރެއިން، އެންމެ ދަތި ހާލުގައި ދިރިއުޅެމުންދާ އެއް ބަޔަކީ ވަގުތީ ހިޔާތަކުގައި ދިރިއުޅެމުންދާ މީހުންނެވެ. ވާރޭވެހި، ކޯރުތައް ފުރި ބަންޑުންވެސް، އަމިއްލަ ގެދޮރު ޣަރަޤުވެ ދިއުމުގެ ސަބަބުން، ވަގުތީ ހިޔާތުގައި ދިރިއުޅުމަށް މަޖުބޫރުވެފައިވާއިރު، އެ ހިޔާތަކަކީ، އިންސާނުން ދިރިއުޅުމަށް އެކަށީގެންވާ ވަރުގެ ތަންތަން ނޫން ކަމަށް، އެ ހިޔާތަކަށް ބަދަލު ކޮށްފައިވާ މީހުން ދަނީ ބުނަމުންނެވެ.

މޫސުމީ ގަދަ ވިއްސާރައިގެ ސަބަބުން ޕާކިސްތާނުގެ 3 ބައިކުޅަ 1 ބައި ސަރަހައްދު މިހާރު އޮތީ ފެނު އަޑީގައެވެ. މަރުވި މީހުންގެ އަދަދު 1100 އަށް ވުރެ މައްޗަށް އަރާފައިވާ އިރު، ގަދަ ވިއްސާރައިގެ އަސަރު ކުރި މީހުންގެ އަދަދު، 33 މިލިއަންއަށް ވަނީ އަރާފައެވެ. މޫސުމީ ވިއްސާރައިގެ ސަބަބުން އެންމެ ބޮޑު ތަކުލީފެއް އުފުލަން ޖެހިފައިވާ އެއް ސަރަހައްދަކީ 50 މިލިއަނެއްހާ މީހުންގެ އާބާދީއެއް އޮތް ދެކުނު ސިންދު ޕްރޮވިންސްއެވެ. ފާއިތުވީ 30 އަހަރު ދުވަހުގެ އެވަރޭޖް ރެކޯޑަށް ވުރެ، 466 ޕަސެންޓް އިތުރަށް، އެ ސަރަހައްދަށް ވާރޭވެހުނު ކަމަށް ތަފާސް ހިސާބުތަކުން ދައްކައެވެ.

ސިންދުގެ އެންމެ ބޮޑު ސިޓީތަކުގެ ތެރޭގައި ގުނާލެވޭ ޔަޢުޤޫބުއާބާދުން ގެދޮރު ގެއްލުނު މުޙައްމަދު ޖާވިދު ވަގުތީ ހިޔާވަހިކަން ހޯދަމުން ދަނީ ސްކޫލް އިމާރާތެއްގައެވެ. މަދިރި ހާއްޔެއް ފަދަ ވަގުތީ ހިޔަލުގައި ވަގުތުތައް ގުނަމުންދާ ޖާވިދު މިއަދު ވަނީ އިންތިހާ މާޔޫސްކަމުގެ ތެރޭގައެވެ.

ޢާއިލާތަކަށް ކާންބޯންދޭނެ އިންތިޒާމެއް ހަމަޖެހިފައި ނެތުމަކީ، ވަގުތީ ހިޔަލުގައި ތިބި އެހެން ރަށްވެހިންގެ ޝަކުވާއެކެވެ.

ޕާކިސްތާނުގެ އާންމު ސިއްހީ ހާލަތުވެސް މިވަގުތު އިންތިހާއަށް ގޯހެވެ. ސަރަހައްދީ ހޮސްޕިޓަލެއްގައި މަސައްކަތް ކުރައްވާ ޑޮކްޓަރަކު ވިދާޅުވި ގޮތުގައި، ޕޭޝަންޓުންގެ އަދަދު ބޮޑުތަނުން ވަނީ އިތުރުވެފައެވެ. އެންމެ ގިނައީ ބަނޑުގެ ބަލިތަކުގެ މީހުންނެވެ. އޭގެ ތެރޭގައި ބޭރަށް ހިންގުން ނުވަތަ ޑައެރިއާ ފަދަ ބަލިތައް ތަހައްމަލު ކުރާ ޕޭޝަންޓުންގެ އަދަދު ގިނައެވެ. ސަބަބެއް ކަމަށް ބެލެވެނީ ފެންބޮޑުވުމުގެ ސަބަބުން ދިރިއުޅެން ޖެހިފައި އޮތް ހާލަތުގެ ސަބަބުން، އާންމު ސާފު ތާހިރުކަމަށް މާ ބޮޑު ސަމާލުކަމެއް ދެވޭނެ ގޮތް ނުވުމެވެ.