ލޯނު އުސޫލުން، ރިގުލޯން އެތުލެޓިކޯއަށް ބަދަލުވެއްޖެ
31 އޯގަސްޓު 2022 | ބުދަ 16:49ރިގުލޯން އެތުލެޓިކޯއަށް ބަދަލުވީ ލޯނު އުސޫލުން، 1 އަހަރުގެ މުއްދަތަށް
ސާޖިއޯ ރިގުލޯން
ޓޮޓެންހަމްގެ ޑިފެންޑަރު ސާޖިއޯ ރިގުލޯން އެތުލެޓިކޯ މެޑްރިޑަށް ބަދަލުވެއްޖެއެވެ.
ރިގުލޯން އެތުލެޓިކޯއަށް ބަދަލުވީ ލޯނު އުސޫލުން އެއް އަހަރުގެ މުއްދަތަށެވެ. ރެއާލް މެޑްރިޑްގެ އެކެޑަމީގައި ޒައިނުއްދީން ޒިދާނުގެ އިރުޝާދުގެ ދަށުން ކުޅުނު ރިގުލޯން ޓޮޓެންހަމާ ގުޅުނީ 2020 ވަނަ އަހަރުއެވެ. ޓޮޓެންހަމްއަށް ބަދަލުވުމުގެކުރިން ރިގުލޯން ވަނީ ލޯނު އުސޫލުން ސެވިއްޔާއަށް ކުޅެ، އެޓީމާއެކު ޔޫރަޕާ ލީގު ކާމިޔާބުކޮށްފައެވެ. އޭގެ ފަހުން ޓޮޓެންހަމްގައި އޭނާ ވަނީ ޓޮޓެންހަމްއަށް 52 މެޗު ކުޅެދީ ދެލަނޑު ޖަހާފައެވެ.
2020 ވަނަ އަހަރުން ފެށިގެން ރިގުލޯން އަންނަނީ ސްޕެއިންގެ ގައުމީ ޓީމަށްވެސް ކުޅެމުންނެވެ. ސްޕެއިން ޓީމުގައި އޭނާ ވަނީ 6 މެޗު ކުޅެފައެވެ.
އެތުލެޓިކޯއިން ރިގުލޯން ހޯދީ އެޓީމުގެ ވާތްފަޅިއަށް ކުޅެމުން އަންނަ ރެނަން ލޯޑި ކްލަބު ދޫކޮށްލުމުން އެތަން ފޫބެއްދުމަށެވެ. ލޯޑީ ވަނީ ލޯނު އުސޫލުން ނޮޓިންހަމް ފޮރެސްޓަށް ބަދަލުވެފައެވެ.
