އޮސްޓްރިއާގެ ކަލައިޒިޗް ވުލްވްސްއަށް

އޮސްޓްރިއާގެ ސްޓްރައިކަރު ސާސާ ކަލައިޒިޗް އިނގިރޭސިވިލަތުގެ ވުލްވްސްއަށް ސޮއިކޮށްފިއެވެ.

މީގެ ކުރިން ކަލައިޒިޗް ކުޅުނީ ބުންޑެސްލީގާގެ ކްލަބު ސްޓުޓްގާޓަށެވެ. އެޓީމުގައި އޭނާ ވަނީ 57 މެޗު ކުޅެ 23 ލަނޑު ޖަހާފައެވެ. އޮސްޓްރިއާގެ ގައުމީ ފުޓްބޯޅަ ޓީމަށް ކަލައިޒިޗް ކުޅެންފެށި 2020 ވަނަ އަހަރުއެވެ. އޭގެ ފަހުން ގައުމީ ޓީމަށް 15 މެޗު ކުޅެދީ، ކަލައިޒިޗް ވަނީ ހަތަރު ލަނޑު ޖަހާފައެވެ.

ކަލައިޒިޗް ވުލްވްސްއަށް ބަދަލުވީ ފަސް އަހަރުގެ އެއްބަސްވުމެއްގައެވެ. އަދި އިތުރު 12 މަހުގެ މުއްދަތަކަށް އެއްބަސްވުން ދިގުދަމާލުމުގެ އިޚްތިޔާރުވެސް ކޮންޓްރެކްޓްގައި ހިމަނާފައިވެއެވެ.

ކަލައިޒިޗް ވުލްވްސްއަށް ބަދަލުވި އަގު މިހާތަނަށް އެކްލަބުން ހާމަކޮށްފައެއްނުވެއެވެ. ނަމަވެސް ރިޕޯޓުތައް ބުނާގޮތުން އޭނާ ވުލްވްސްއަށް ބަދަލުވީ 18 މިލިއަން ޔޫރޯގެ އަގަކަށެވެ.

ވުލްވްސްއާއި ގުޅުމަށްފަހު ކަލައިޒިޗް ބުނީ ޓީމުގައި ރަނގަޅު ކާމިޔާބީތަކެއް ހޯދައި ގިނަ ލަނޑުތަކެއް ޖެހުމަށް އުންމީދުކުރާކަމަށެވެ.