ޕާކިސްތާނު އެހީއަށް އެދި ސަލާންޖަހަނީ: މާތްﷲ އަށްޓަކައި އަހަރަމެންނަށް އެހީވެދީ!

ދުނިޔޭގެ އެކި ހިސާބުތަކަށް މިއަދު ކުރިމަތިލާން ޖެހިފައިވާ މޫސުމީ ނޭދެވޭ ބަދަލުތަކުގެ އެންމެ ބޮޑު އެއް އަސްލަކީ ޖައްވު ހޫނު ކުރާ ވިހަ ގޭހެއް ކަމަށް ވާ ކާބަންޑައިއޮކްސައިޑް ބޭރު ކުރާ މިންވަރު އިތުރުވުން ކަމަށް، ދާއިރާގެ ތަޖުރިބާކާރުން އިންޒާރު ދެމުން ދާތާ އަހަރުތަކެއް ފާއިތުވެއްޖެއެވެ. ޖައްވު ހޫނު ކުރާ ވިހަ ގޭސް ބޭރު ކުރުމުގެ ބޮޑު ހިއްސާއެއް އޮންނަނީ ކުރިއަރާފައި ވާ ޤައުމުތަކުގައި ކަމަށް ވީ ނަމަވެސް، މޫސުމީ ނޭދެވޭ ބަދަލުތަކުގެ ސަބަބުން ދިރިއުޅުން އެފުށް މިފުށަށް ޖެހި، އުމުރު ދުވަހުގެ މަސައްކަތް ފެނަށް ޣަރަޤުވެދާ މަންޒަރު ބަލަން މަޖުބޫރުވެފައި ވާ އެންމެ ގިނަ ބަޔަކު ދިރިއުޅެނީ މާލީ ތަނަވަސްކަމުގެ ގޮތުން މާ މުއްސަނދި ނޫން ގައުމުތަކުގެ ރަށްވެހިންނަށެވެ.

މި ފަދަ އެއް މިސާލު، މިހާރު ފެންނަމުން އެ ދަނީ އަވަށްޓެރި ޕާކިސްތާނުގެ މަސްރަހުންނެވެ. 1959 ވަނަ އަހަރުން ފެށިގެން ބަލާ ކަމުގައި ވާ ނަމަ، ކާބަންޑައިއޮކްސައިޑް ބޭރު ކުރި ނިސްބަތުން ޕާކިސްތާން ހިއްސާ ކުރަނީ އެންމެ 0.4 ޕަސެންޓްއެވެ. އެމެރިކާއިން 21.5 ޕަސެންޓް، ޗައިނާއިން 16.5 ޕަސެންޓް އަދި ވިލާތުގެ އިއްތިހާދުން 15 ޕަސެންޓްއެވެ. ނަމަވެސް، މިއަދު ޕާކިސްތާނަށް އުފުލަން ޖެހިފައިވާ ތަކުލީފަކީ އެ ނިސްބަތާ އަޅާ ވަޒަން ކުރެވޭ ވަރަށް ވުރެ ބޮޑު ތަކުލީފެކެވެ. މޫސުމީ ގަދަ ވިއްސާރައިގެ ސަބަބުން، ކޯރުތައް ފުރި ބަންޑުންވެ، ފެންބޮޑުވުމުގެ ބިރުވެރި ކާރިސާތައް ހިނގާ، ފާއިތުވެ މިދިޔަ މަދު ހަފުތާ ކޮޅުގެ ތެރޭގައި އެކަނިވެސް ޕާކިސްތާނުން 1000 އަށް ވުރެ ގިނަ މީހުންގެ ފުރާނަ ގެއްލިއްޖެއެވެ. މިލިއަނަކަށްވުރެ ގިނަ ގެދޮރު ހަލާކުވެފައި ވާ އިރު، އެތައް ލައްކަ ނާމްސޫތްޕެއް މަރުވެއްޖެއެވެ.

ޕާކިސްތާނުގެ ތާރީޚު ނުދެކޭފަދަ ގަދަ ވިއްސާރައާއި ފެންބޮޑުވުމުގެ ހާދިސާގެ އަސަރު، 30 މިލިއަނަށް ވުރެ ގިނަ މީހުން ވަނީ ފޯރާފައެވެ.

ޕާކިސްތާނަށް މިއަދު ތަހައްމަލު ކުރަން ޖެހިފައިވާ ތަކުލީފުތަކަށް އިޝާރާތް ކުރައްވަމުން އެ ޤައުމުގެ މޫސުމީ ބަދަލުތަކާ ބެހޭ ވަޒީރުވެސް ވަނީ، މި ކާރިސާއަކީ މޫސުމީ ނޭދެވޭ ބަދަލުތަކުގެ ސަބަބުން ކުރިމަތިލާން ޖެހިފައި ވާ، ނުބައްދަލު އިންސާނީ ކާރިސާއެއް ކަމަށް ސިފަ ކުރައްވާފައެވެ.

ވެހެމުން ދިޔަ ވާރޭގެ ތެރެއިން ކޯރުގެ ފެންގަނޑު ފުރި، ރަށު ތެރެއަށް ބަންޑުވެ، ބާރު އޮޔާއެކު ރަށު ތެރެއަށް އަރާ، އެ މަގުގައި ހުރި ހުރިހާ އެއްޗެއް ދޮވެލާ މަންޒަރު ބަލާލި ކޮންމެ މީހެއްގެ ހިތަށްވެސް ބިރުވެރިކަން ވައްދައެވެ. މިއީ ޕާކިސްތާނުގެ ގިނަ ރައްޔިތުންވެސް ތައްޔާރުވެ ތިބި ހާލަތެއް ނޫނެވެ.

މޫސުމީ ނޭދެވޭ ބަދަލުތަކާއެކު ޕާކިސްތާނަށް މިއަދު ކުރިމަތިލާން ޖެހިފައިވާ އިންސާނީ ކާރިސާއާ ކުރިމަތިލާން ޖެހިފައި ވަނީ، އިގުތިސޯދީ ގޮތުންވެސް ޤައުމު އިނދަޖެހިފައި ވާ ދަނޑިވަޅެއްގައި ކަން ފާހަގަ ކުރަން ޖެހެއެވެ. ޕާކިސްތާނުން މިހާރު ދަނީ އެހީއަށް އެދި ބައިނަލްއަގުވާމީ މުޖުތަމައުގައި ސަލާން ޖަހަމުންނެވެ.

ޕާކިސްތާނަށް އެހީތެރިކަން ފޯރުކޮށްދިނުމުގެ ކަންކަން ވީހާވެސް ލުއިފަސޭހަ ގޮތެއްގައި ކުރިއަށް ގެންދިއުމަށްޓަކާ އދއިން ވެސް ވަނީ އެހީގެ ފަންޑެއް ހުޅުވާފައެވެ. 160 މިލިއަން ޑޮލަރުގެ އެހީގެ ފަންޑެއް ކަށަވަރު ކުރުމަށް އދއިން ބައިނަލްއަގުވާމީ މުޖުތަމައަށް ގޮވާލާފައި ވާ އިރު، އެ ފައިސާގެ އެހީގައި 5.2 މިލިއަނެއްހާ މީހުންނަށް ކާބޯތަކެއްޗާއި، ފެނާއި ނަރުދަމާގެ އެހީތެރިކަމުގެ އިތުރުން ތައުލީމާއި ސިއްހީ ދާއިރާގެ އެހީތެރިކަން ފޯރުކޮށްދެވޭނެ ކަމަށް މައުލޫމާތު ލިބެއެވެ.