ދެ މެޗުން ވެސް މޮޅުވެ އަންހެން ޑިވިޝަންގެ ޗެމްޕިއަންކަން އެމް.އެން.ޔޫއިން ހޯދައިފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން އިންތިޒާމުކޮށްގެން ހަޔަރ އެޑިއުކޭޝަނަށް ބާއްވާ ވޮލީބޯޅަ މުބާރާތުގެ އަންހެން ޑިވިޝަންގެ ޗެމްޕިއަންކަން ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)އިން ހޯދައިފިއެވެ.

ދިވެހިރާއްޖޭގެ ކޮލެޖު، ޔުނިވަރސިޓީ އަދި ހައި ސްކޫލްތަކަށް ހުޅުވާލައިގެން ކުރިއަށް ގެންދިޔަ މުބާރާތުގެ އަންހެން ޑިވިޝަންގައި ބައިވެރިވެފައިވަނީ ދެ ޓީމެވެ. އެއީ އެމް.އެން.ޔޫ އަދި އެވިޑް ކޮލެޖެވެ. އެހެންކަމުން މި ޑިވިޝަންގެ މެޗުތައް ކުޅެފައިވަނީ ބެސްޓް އޮފް ތްރީ (ދެ މެޗުން މޮޅުވާ ޓީމަކީ ޗެމްޕިއަން) އަށެވެ. އެގޮތުން ކުޅުނު ފުރަތަމަ މެޗާއި ދެ ވަނަ މެޗު ކާމިޔާބުކޮށް އެމް.އެން.ޔޫ އިން ވަނީ މުބާރާތުގެ ތަށި އުފުލާލާފައެވެ.

ފުރަތަމަ މެޗުގައި އެމް.އެން.ޔޫ އިން ވަނީ މިދިޔަ ހޮނިހިރު ދުވަހުގެ ރޭ އެވިޑް ކޮލެޖުގެ މައްޗަށް ތިން ސެޓު އެއް ސެޓުން ކުރި ހޯދާފައެވެ. އެ މެޗުގެ މޮޅު ކުޅުންތެރިޔަކަށް ހޮވުނީ އެމް.އެން.ޔޫގެ ނަރީމާ އިދްރީސްއެވެ. ދެ ވަނަ މެޗުގައި އަންގާރަ ދުވަހުގެ ރޭ އެމް.އެން.ޔޫ އިން އެވިޑުގެ މައްޗަށް ކުރި ހޯދީ ވެސް ތިން ސެޓު އެއް ސެޓުންނެވެ.

ފޯރި ގަދަ ކުޅުމެއް ފެނުނު މެޗުގެ ފުރަތަމަ ދެ ސެޓު ކާމިޔާބުކުރީ އެމް.އެން.ޔޫ އިންނެވެ. އެމް.އެން.ޔޫ އިން ފުރަތަމަ ސެޓު 25-20 އިން ކާމިޔާބުކުރިއިރު، ވާދަވެރިކޮށް ދިޔަ ދެ ވަނަ ސެޓު ހޯދީ 25-23 އިންނެވެ. ތިން ވަނަ ސެޓަށް ނިކުމެ އެވިޑުން ވަނީ ރަނގަޅު ކުޅުމެއް ދައްކާފައެވެ. އެމް.އެން.ޔޫ އަށް މި ސެޓުގައި ހެދުނު ގޯސްތަކުގެ ފައިދާ ނަގައި އެވިޑުން ތިން ވަނަ ސެޓު ކާމިޔާބުކުރީ 25-17 އިންނެވެ. ހަތަރު ވަނަ ސެޓުގެ ކުޅުން ވެސް ދިޔައީ ވާދަވެރިކޮށެވެ. މި ސެޓު އެމް.އެން.ޔޫ އިން ކާމިޔާބުކުރީ 25-21 އިންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ އެމް.އެން.ޔޫގެ ފާތިމަތު ޝަމްހާއެވެ.

މުބާރާތުގެ އެންމެ އުންމީދީ ކުޅުންތެރިޔަކަށް ހޮވުނީ އެވިޑް ކޮލެޖުގެ ލައިޝާ މަޖީދުއެވެ. މުބާރާތުގެ އެންމެ މޮޅު ހަ ކުޅުންތެރިންނަކީ، އެވިޑް ކޮލެޖުގެ ފާތިމަތު މާޔާ ހުސެއިން، ޝާނިޔާ އަޙުމަދު، އައިމިނަތު ރުދައިނާ، އެމް.އެން.ޔޫގެ ނަރީމާ އިދުރީސް، ޝަމްހާ ރިޔާާޒް އަދި ފާތިމަތު ޝަމްހާއެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އެމް.އެން.ޔޫގެ ނަރީމާއެވެ.

މި މުބާރާތުގެ ފިރިހެން ޑިވިޝަން ވެސް ކުރިއަށްދާއިރު، މި ޑިވިޝަންގެ ފައިނަލް އޮންނާނީ ބުދަ ދުވަހުގެ ރޭއެވެ. ފިރިހެން ޑިވިޝަންގެ ފައިނަލްގައި ބައްދަލުކުރާނީ އެމް.އެން.ޔޫ އާއި ދިވެހިރާއްޖޭގެ އިސްލާމީ ޔުނިވަރސިޓީ (އައި.ޔޫ.އެމް) އެވެ. މި ދެ ޓީމުގެ އިތުރުން ފިރިހެން ޑިވިޝަންގައި ދެން ވާދަކޮށްފައިވަނީ އެވިޑް ކޮލެޖެވެ.

އެމް.އެން.ޔޫ އިން ފިރިހެން ޑިވިޝަންގެ ފައިނަލަށް ދަތުކުރީ ދެ މެޗުން މޮޅުވެ އެއް ވަނަ ޓީމުގެ ގޮތުގައެވެ. އައި.ޔޫ.އެމް ފައިނަލަށް ދަތުރުކުރީ، ދެ ވަނަ ޓީމާއި ތިން ވަނަ ޓީމާ ދެމެދު ކުޅެވުނު ސެމީ ފައިނަލް މެޗުގައި އަންގާރަ ދުވަހު އެވިޑް ކޮލެޖުގެ މައްޗަށް ތިން ސެޓު ދެ ސެޓުން ކުރި ހޯދައިގެންނެވެ.