ޑޯޓްމަންޑްގެ އަކަންޖީ ހޯދުމަށް ސިޓީން މަސައްކަތް ކުރަނީ

ބޮރޫޝިޔާ ޑޯޓްމަންޑަށް ކުޅެމުން އަންނަ މެނުއެލް އަކަންޖީ ހޯދުމުގެ މަސައްކަތް މެންޗެސްޓަރ ސިޓީން ފަށައިފިއެވެ.

ރިޕޯޓުތައް ބުނާ ގޮތުން ސްވިޒަލެންޑުގެ ޑިފެންޑަރު ހޯދުމަށް ދެކްލަބުގެ ދެމެދުގައި މިހާރު މަޝްވަރާތައް ވަނީ ފަށާފައެވެ. ނަމަވެސް މިހާތަނަށް އަކަންޖީ ސިޓީއަށް ބަދލުވާނެކަމުގެ ޔަގީންކަމެއް އެއްވެސް ކްލަބަކުން ދީފައެއް ނުވެއެވެ. ރިޕޯޓުތައް ބުނާ ގޮތުން ޑޯޓްމަންޑުން އަކަންޖީ ދޫކުރާނީ 15 މިލިއަން ޔޫރޯގެ އަގަކަށެވެ.

އުމުރުން 27 އަހަރުގެ ޑިފެންޑަރު ޑޯޓްމަންޑާއި ގުޅުނީ 2018 ވަނަ އަހަރުއެވެ. އަކަންޖީ ހޯދުމަށް ސިޓީން މަސައްކަތްކުރާއިރު، މިއީ ޑޯޓްމަންޑުގައި އޭނާ ހަދާފައިވާ އެއްބަސްވުމުގެ ފަހު އަހަރެވެ.

މި ސަމަރ ޓްރާންސްފަރގައި ސިޓީން އަންނަނީ ޑިފެންޑަރެއް ހޯދުމަށް ވަރަށް ބޮޑަށް މަސައްކަތް ކުރަމުންނެވެ. ޗެލްސީން ކުކުރޭލާ ހޯދީވެސް ސިޓީން އޭނާ ހޯދުމަށް މަސައްކަތްކުރަމުން ދަނިކޮށެވެ.

ސިޓީން ވަނީ މި ޓްރާންސްފަރ މާކެޓުގައި ޑޯޓްމަންޑުގެ ތަރި އާލިން ހާލަންޑުގެ ސޮއިވެސް ހޯދާފައެވެ.