ޓޮޓެންހަމުން ބޭނުންވަނީ ކޭން ދިގު މުއްދަތަކަށް ކުލަބުގައި މަޑުކުރުމަށް

ޓޮޓެންހަމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ކުލަބުގައި މަޑުކުރަން ބޭނުންވާކަން އެ ކުލަބުން ހާމަކޮށްފިއެވެ.

ޓޮޓެންހަމްގައި ކޭން އަންނަނީ މޮޅު ކުޅުމެއް ދައްކަމުންނެވެ. މި ސީޒަނުގައި ވެސް އޭނާ އަންނަނީ ޓޮޓެންހަމް މޮޅު ކޮށްދިނުމުގައި އިސް ރޯލެއް އަދާކުރަމުންނެވެ. ކޭން ވަނީ މި ސީޒަންގައި ކުޅުނު ހަތަރު ފުޓުބޯޅަ މެޗުން ހަތަރު ލަނޑު ޖަހާފައެވެ. އަދި މިހާރު އޭނާ އަކީ ޕްރިމިއަރ ލީގުގެ ތާރީޚުގައި ވެސް ތިން ވަނަ އަށް އެންމެ ގިނަ ލަނޑު ޖަހާފައިވާ ކުޅުންތެރިޔާއެވެ.

ކޭންއާ ގުޅޭ ގޮތުން ވާހަކަ ދައްކަމުން ޓޮޓެންހަމްގެ ކޯޗު އެންޓޮނީ ކޮންޓޭ ބުނީ، ކުލަބުގެ ކޮންމެ މީހެއްގެ ވެސް ބޭނުމަކީ ވެސް އަދި އެދުމަކީ ވެސް ކޭން ކުލަބުގައި މަޑުކުރުން ކަމަށެވެ. އަދި އޭނާ ބުނީ ޓޮޓެންހަމާއެކު ކޭން އައު އެއްބަސްވުމެއްގެ ސޮއި ކުރުމަކީ ވެސް ކުލަބުން އެދޭ ގޮތް ކަމަށެވެ.

ސީނިއަރ ކެރިއަރު 2009 ވަނަ އަހަރު ޓޮޓެންހަމުން ފެށި ކޭން ވަނީ ލޯނު އެއްބަސްވުމުގެ ދަށުން ހަތަރު ކުލަބަކަށް ކުޅެދީފައެވެ. ޓޮޓެންހަމާއެކު ހޭދަކުރި 13 އަހަރު ތެރޭގައި އޭނާ ވަނީ އެ ކުލަބަށް ކުޅެދިން 390 މެޗުގައި 252 ލަނޑު ޖަހާފައެވެ. ޓޮޓެންހަމާއެކު ކޭން ވަނީ ޔުއެފާ ޗެމްޕިއަންސް ލީގުގެ ފައިނަލްގައި ވެސް ކުޅެފައެވެ.