އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ކުޅުނު މެޗުން ލިބުނީ ފުރިހަމަ މޮޅެއް ކަމަށް، ޗެލްސީގެ ކޯޗު އެންޒޯ މަރެސްކާ ބުނެފި އެވެ.

ޓޮޓެންހަމްގެ އަމިއްލަ ދަނޑުގައި ކުޅުނު މެޗުން މޮޅުވެ، ޗެލްސީން ވަނީ އެ ޓީމުގެ މޮޅުވުމުގެ ސިލްސިލާ ދަމަހައްޓައިފަ އެވެ. އެ މެޗުގައި ޓޮޓެންހަމުން ދެ ލަނޑު ޖަހައި ކުރި ހޯދާފައި ވަނިކޮށް، ޗެލްސީން ވަނީ ފަހަތުން އަރައި ހަތަރު ލަނޑު ޖަހައިގެން މެޗުން މޮޅުވެފަ އެވެ.

އެ މެޗަށްފަހު ވާހަކަ ދައްކަމުން މަރެސްކާ ބުނީ ޓޮޓެންހަމްގެ ދަނޑުގައި އެއްވެސް އުނދަގުލެއް ނެތި މޮޅުވާނެ ކަމަށް ހީކުރުމަކީ ކުށްހީއެއް ކަމަށެވެ. އެ މެޗުން ޗެލްސީ އަށް އެންމެ ފުރިހަމަ ކާމިޔާބެއް ލިބުނީ އެ ހުރިހާ ކަމެއްގެ ތެރެއިން ކަމަށާއި، ޓޮޓެންހަމާ ދެކޮޅަށް ކުޅެން ޖެހުނީ އުނދަގޫ މެޗެއް ކަމަަށް ވެސް އޭނާ ބުންޏެވެ.

މަރެސްކާ ބުނީ ޗެލްސީގެ ކުޅުންތެރިންނަށް އޭނާ ދޭން ބޭނުންވާ މެސެޖަކީ، އެއް ދުވަހުން އަނެއް ދުވަހަށް ކުރިއަށް ދިޔުން ކަމަށެވެ. ޚާއްސަކޮށް އަބަދު ވެސް ކުރިއަށް ޖެހިގެން އޮންނަ މެޗަށް ފޯކަސް ކުރަން އެދޭ ކަމަށާއި، މާޒީ އަށް ބަަލައިގެން ކުރިއަށް ދިޔުމެއް ނޯންނާނެ ކަމަށް ވެސް މަރެސްކާ ވަނީ ބުނެފަ އެވެ. ޚާއްސަކޮށް އެންމެ ފުރިހަމަ ގޮތުގައި ތިބެ މެޗުތަކާ ކުރިމަތިލާން އެންމެ ބޭނުންވާ ކަމަށް މަރެސްކާ ބުންޏެވެ.

މީގެ އިތުރުން މަރެސްކާ ބުނީ މެޗުގައި ޗެލްސީގެ ކުޅުންތެރިން ދެއްކި ކުޅުމާ މެދު އޭނާ ވަރަށް ހިތްހަމަ ޖެހޭ ކަމަށާއި، ކުޅުންތެރިން ކުރި މަސައްކަތް ބަަލައި ގަންނަ ކަމަށެވެ. ޚާއްސަކޮށް އެ މެޗުގައި ދެ ލަނޑު ޖެހި ކޯލް ޕާމާގެ ވާހަކަ މަރެސްކާ ވަނީ ފާހަގަ ކޮށްފަ އެވެ. އޭނާ ބުނީ ޕްރިމިއާ ލީގަކީ ވަރަށް ހުނަރުވެރި އަދި މޮޅެތި ކުޅުންތެރިންގެ މައްޗަށް އެކުލެވިގެންވާ ލީގެއް ކަމަށާއި، އެ ކުޅުންތެރިންގެ ތެރޭގައި ޕާމާ ހިމެނޭނެ ކަމަށެވެ.

ޓޮޓެންހަމް އަތުން ހޯދި މޮޅާ އެކު ޗެލްސީން ވަނީ ލީގު ތާވަލްގެ ދެ ވަނައިގައި ދެ ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 15 މެޗުން އެ ޓީމަށް ލިބެނީ 31 ޕޮއިންޓެވެ. ނުވަ މެޗުން ޗެލްސީ މޮޅުވެފައިވާއިރު، ހަތަރު މެޗުން ވަނީ އެއްވަރުވެފަ އެވެ. އަދި ދެ މެޗުން އެ ޓީމު ވަނީ ބަލިވެފަ އެވެ.