ޓޮޓެންހަމް އަތުން ޔުނައިޓެޑު ބަލިވެއްޖެ

އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު ބަލިވެއްޖެ އެވެ.

ޓޮޓެންހަމްގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗުގައި އެ ޓީމުން ވަނީ 1-0 އިން ޔުނައިޓެޑުގެ މައްޗަށް ކުރި ހޯދައިފަ އެވެ. މެޗުގައި ޓޮޓެންހަމުން ލަނޑު ޖެހީ ވެސް ފުރަތަމަ ހާފުގަ އެވެ.

މެޗު ފަށައިގެން ކުރީ ކޮޅު ޔުނައިޓެޑުގެ ރަސްމުސް ހޮލުންޑް ފޮނުވާލި ބޯޅަ ޓޮޓެންހަމްގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން ލިބުނު ބޯޅަ އަނެއްކާ ވެސް ހޮލުންޑް ފޮނުވާލިއިރު، ޓޮޓެންހަމްގެ ކީޕަރުގެ އަތުގައި ޖެހިފައި ރީބައުންސަށް އައި ވަގުތު، ޑިއޭގޯ ޑަލޮޓް ފޮނުވާލި ނަމަވެސް، ޓޮޓެންހަމްގެ ކުޅުންތެރިޔަކު ވަނީ އެ ބޯޅަ ބްލޮކު ކޮށްފަ އެވެ.

އޭގެ ފަހުން މެޗުގެ 13 ވަނަ މިނެޓުގައި ޓޮޓެންހަމަށް ލީޑު ނަގައިދިނީ ޖޭމްސް މެޑިސަން އެވެ. އެއީ ޔުނައިޓެޑުގެ އޭރިޔާ ތެރެއިން ލޫކަސް ބާގްވެލް ފޮނުވާލި ބޯޅަ ޔުނައިޓެޑުގެ ކީޕަރުގެ އަތުގައި ޖެހި ރީބައުންސަށް އައި ވަގުތު، އެ ބޯޅަ ގޯލަށް ވައްދާލައިގެން މެޑިސަން ޖެހި ލަނޑެކެވެ.

އޭގެ ފަހުން ޔުނައިޓެޑަށް ނަތީޖާ ހަމަހަމަ ކޮށްދޭން އަލެހާންދްރޯ ގާނާޗޯ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ. އޭގެ ފަހުން މެޗުގެ ދެ ވަނަ ހާފުގައި ޑަލޮޓް އަށް ލިބުނު ފުރުސަތެއްގައި އޭނާ ފޮނުވާލި ބޯޅަ ވެސް ޓޮޓެންހަމްގެ ކީޕަރު ވަނީ ސަލާމަތްކޮށްފަ އެވެ.

ޓޮޓެންހަމް އަތުން ވީ ބައްޔަކީ މި ސީޒަންގެ ލީގުގައި ޔުނައިޓެޑުގެ 12 ވަނަ ބައްޔެވެ. މިހާތަނަށް ކުޅެފައިވާ 25 މެޗުން 29 ޕޮއިންޓާ އެކު ޔުނައިޓެޑު އޮތީ 15 ވަނައިގަ އެވެ. ޔުނައިޓެޑު އަތުން މޮޅުވި ޓޮޓެންހަމް އޮތީ 30 ޕޮއިންޓާ އެކު 12 ވަނައިގަ އެވެ.