އެރީނާ މާފުށި ޕްރޯ ކައިޓް ސާފިންގެ ގަދަ ތިނެއްގައި ގޮއިދޫ އެތުލީޓުން
29 އޯގަސްޓު 2022 | ހޯމަ 03:26މުބާރާތުގައި ވަނީ ޖުމުލަ 14 އެތުލީޓުން ވާދަކޮށްފައި
މާފުށީގައި ބޭއްވި މުބާރާތުގެ ތެރެއިން
ކ. މާފުށީގައި ކުރިއަށް ގެންދިޔަ ކައިޓް ސާފިން ފްރީސްޓައިލް މުބާރާތުގެ ގަދަ ތިނެއްގައި ބ.ގޮއިދޫއަށް ނިސްބަތްވާ އެތުލީޓުން ހިމެނިއްޖެއެވެ.
މިއީ ނިއު ސްޓަރ ސްޕޯޓްސް ކުލަބުން އިންތިޒާމުކޮށްގެން އެއް ދުވަހަށް ކުރިއަށް ގެންދިޔަ މުބާރާތެކެވެ. މުބާރާތުގައި ވަނީ ޖުމުލަ 14 އެތުލީޓުން ވާދަކޮށްފައެވެ. މުބާރާތުގެ އެއް ވަނަ ހޯދީ ގޮއިދޫ އަށް ނިސްބަތްވާ ހުނަރުވެރި ހަސަން މާހިރު (ހަންޓޭ)އެވެ. ދެ ވަނަ ހޯދީ ރާއިފް ޝަނީޒްއެވެ. އަދި ތިން ވަނަ ހޯދާފައިވަނީ މަމްނޫން ނިޔާޒު (މަންނު)އެވެ.
މުބާރާތުގެ އެއް ވަނަ ހޯދި ހަންޓޭ އަކީ ސްލިންގްޝޮޓް ރާއްޖޭގެ އެމްބެސެޑަރއެވެ. ސްލިންގްޝޮޓްއަކީ އިންޓަރނޭޝަނަލް ބްރޭންޑެކެވެ. ހުނަރުވެރި ހަންޓޭ ވަނީ މީގެ ކުރިން ވެސް އެކިއެކި ކާމިޔާބީތައް ހޯދާފައެވެ. އެގޮތުން މިއަހަރުގެ ފެބްރުއަރީ މަހު މާފުށީގައި ބޭއްވި ރާޅު ގުޑި ކައިޓްބޯޑިން މުބާރާތުގެ ދެ ވަނަ އޭނާ ހޯދިއިރު، މެއި މަހު ގޮއިދޫގައި އޮތް ރެޑްބުލް ވިންގް ރައިޑަރސް ވެސް އޭނާ ވަނީ ކާމިޔާބުކޮށްފައެވެ.
