ބެލަރޫސްގައި ފުޓްބޯޅަ މެޗުތައް ކުރިއަށް ދިޔުމަކީ ބަލައިގަނެވޭނެ ކަމެއް ނޫން ކަމަށް ފުޓްބޯޅަ ކުޅުންތެރިންގެ ޔޫނިއަން ފިފްޕްރޯގެ ޖެނެރަލް ސެކްރެޓަރީ ޖޯނަސް ވިދާޅުވެއްޖެ އެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ޔޫރަޕްގެ ގަދަ ފަސް ލީގުގެ ކުޅުންވެސް ވަނީ މެދުކަނޑާލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ޖަރުމަން ލީގުގެ އިތުރުން ފްރެންޗް ލީގެވެ. އަދި ޔުއެފާ އިން ވަނީ ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުވެސް ފަސްކޮށްފައެވެ. އަދި ކުރިއަށް އޮތް ހޫނު މޫސުމަށް ތާވަލުކޮށްފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ.

ބެލަރޫސިއަން ޕްރިމިއާ ލީގަކީ މިހާތު ޔޫރަޕްގައި ކުރިއަށްދާ ހަމައެކަނި ފުޓްބޯޅަ ލީގެވެ. އެގޮތުން މި ލީގުގެ މެޗުތައް ސަޕޯޓަރުން ވައްދައިގެން، ހުކުރު، ހޮނިހިރު އަދި އާދީއްތަ ދުވަހު ވަނީ ބާއްވާފައެވެ.

ފުޓްބޯޅަ ކުޅުންތެރިންގެ ޔޫނިއަން ފިފްޕްރޯގެ ޖެނެރަލް ސެކްރެޓަރީ ޖޯނަސް ވިދާޅުވީ މި ދަނޑުވަޅުގައި ބެލަރޫސްގައި ފުޓްބޯޅަ މެޗުތައް ކުރިއަށް ދިޔުމަކީ ބަލައިގަނެވޭނެ ކަމެއް ނޫން ކަމަށާއި ލީގުގެ ކުޅުން ހުއްޓުވުމަށް ހުށަހަޅާނެ ކަމަށެވެ. އަދި މި ދަނޑިވަޅުގައި އާންމު ރައްޔިތުންނާއި ކުޅުންތެރިންގެ ސިއްހަތަށް އިސްކަން ދޭން ޖެހޭނެ ކަމަށްވެސް ވިދާޅުވި އެވެ.

މުޅި ދުނިޔޭގައި ހަލުވިކަމާއެކު ކޮވިޑް-19 ފެތުރެމުން އަންނައިރު، ބެލަރޫސްއން މިހާތަނަށް ވަނީ 163 މީހަކު މި ވައިރަހަށް ޕޮޒިޓިވްވެފައެވެ. އަދި މި ވައިރަސް ޖެހިގެން އެ ގައުމުން 1 މިހާތަނަށް ވަނީ މަރުވެފައެވެ.

ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، މެދުކަނޑާލާފައިވާ ޔޫރަޕްގެ ފުޓްބޯޅަ މުބާރާތްތަށް އަލުން ފަށަން ކަނޑައަޅާފައިވާ ޕްލޭނާ އެއްގޮތަށް ނުގޮސްފިނަމަ ފުޓްބޯޅަ ސީޒަން ގެއްލުމުގެ ބިރު އެބައޮތް ކަމަށް ޔުއެފާ ރައީސް ސްލޮވީނިއާގެ އަލެކްސަންޑަ ސެފެރިން ދާދު ފަހުން ވަނީ ވިދާޅުވެފައެވެ.