މިނިވަން ޗެމްޕިއަންޝިޕް: ހަނިމާދޫ އާއި ހިރިމަރަދޫ އެއްވަރުވިއިރު، ހިއްމަފުށި އަދި މާފުށި އެއްވަރު

މިނިވަން ޗެމްޕިއަންޝިޕްގައި ހދ.ހަނިމާދޫ އާއި ހދ.ހިރިމަރަދޫ ބައްދަލުކުރި މެޗު އެއްވަރުވިއިރު، ހިއްމަފުއްޓާއި މާފުށި ބައްދަލުކުރި މެޗުވެސް އެއްވަރުވެއްޖެ އެވެ.

ހުކުރު ދުވަހު ހަވީރު ކުޅުނު މެޗުން ހަނިމާދޫ އަދި ހިރިމަރަދޫ އެއްވަރުވީ 0-0 ގެ ނަތިޖާއަކުންނެވެ.

ހދ. ކުޅުދުއްފުށީގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ލަނޑު ޖެހުމަށްވެސް ދެޓީމަށް ވަނީ ހުސް ގިނަ ފުރުސަތުތަކެއް ލިބި ބޭކާރުވެފައެވެ.

ދެވަނަ ހާފްގައި ހިރިމަރަދޫ އިން އެޓީމުގެ ކުޅުން ވަރުގަދަކޮށް ހަނިމާދޫގެ ހާފަށް ބާރު ބޮޑުކޮށްފައިވާއިރު، ލީޑު ނެގުމަށްވެސް އެޓީމަށް ވަނީ ފުރުސަތުތަކެއް ލިބިފައެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ ހިރިމަރަދޫގެ އަހުމަދު ޝިހާމް އެވެ.

ހުކުރު ދުވަހު ހަވީރު ކުޅުނު މެޗުން މާފުށި އަދި ހިއްމަފުށި ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ކ.ގުރައިދޫގައި ކުޅުނު މި މެޗުގެ ފުރަތަމަ ހާފްގައި ދެޓީމަށްވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ލިބިފައެވެ. އެހެންނަމަވެސް ހާފް ނިމިފައިވަނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ހިއްމަފުށިގެން އެޓީމުގެ ކުޅުން ރަނގަޅުކޮށް މާފުށީގެ ހާފަށް ބާރުބޮޑުކޮށްފައިވާއިރު، 64 ވަނަ މިނެޓުގައި ހުސެއިން ނާފިޒްގެ ލަނޑުން އެޓީމުން ވަނީ މެޗުގެ ލީޑު ނަގާފައެވެ.

މި ލަނޑަށްފަހުވެސް އެޓީމުންދިޔައީ ލަނޑު ޖެހުމަށް ފުރުސަތު ހޯދަމުންނެވެ. އެހެންނަމަވެސް 80 ވަނަ މިނެޓުގައި އަހުމަދު ނައުފަލް ވަނީ ލަނޑެއް ކާމިޔާބުކޮށް މާފުއްޓަށް މެޗުގެ ނަތީޖާ ހަމަހަމަކޮށްދީފައެވެ.

މި މެޗުގެ މޮޅު ކުޅުންތެރިޔަކަށް ހޮވިފައިވަނީ މާފުށީގެ ހަމައެކަނި ލަނޑު ކާމިޔާބުކޮށްދިން އަހުމަދު ނައުފަލް އެވެ.