މުބާރާތް ފަށާނީ ހުކުރު ދުވަހު
އެމްބީބީއޭން ޔޫތު މިނިސްޓަރު އަދި އައިބީސީއާ ބައްދަލުކުރަނީ: ފޮޓޯ-އެމްބީބީއޭ
އަންނަ ހުކުރު ދުވަހު ރާއްޖޭގައި ފަށާ ވިޒިޓް މޯލްޑިވްސް ޕްރޯގައި މިހާތަނަށް 13 ޤައުމަކުން އެތްލީޓުން ބައިވެރިވެފައިވާކަމަށް ބޮޑީ ބޯޑިންގ އެސޯސިއޭޝަނުން ބުނެފިއެވެ.
ދުނިޔޭގެ އެކި ޤައުމުތަކުން ބޮޑީބޯޑަރުން ވާދަކުރާ މުބާރާތުގައި ބައިވެރިވުމުގެ ފުރުޞަތު އިންޓަރނޭޝަނަލް އެތްލީޓުންނަށް މިމަހުގެ 27 ގެ ނިޔަލަށް އެބައޮތެވެ. މިހާރުވެސް އެތްލީޓުން މުބާރާތުގައި ބައިވެރިވަމުން އަންނަކަމަށް އެސޯސިއޭޝަނުން މައުލޫމާތުދިނެވެ. މިމުބާރާތަކީ އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ބޮޑީބޯޑިން ވޯލްޑް ޓުއާގެ އެއް ލެގެވެ. މުބާރާތް އޮންނާނީ މާލޭގެ ރާޅުގަނޑު ސަރަހައްދުގައެވެ. މުބާރާތަށް އެތަން ތައްޔާރުކުރުމުގެ މަސައްކަތް ރާއްޖޭގެ ބޮޑީބޯޑިންގ އެސޯސިއޭޝަނުން ދަނީ ކުރަމުންނެވެ. އެގޮތުން ސްޓޭޖް ހެދުމާއި, ވީއައިޕީ ސަރަހައްދު ހެދުމާއި, ޖަޖުންނަށް ކަނޑައެޅިފައިވާ ސަރަހައްދު ތައްޔާރުކުރުމުގެ މަސައްކަތް ދަނީ ކުރަމުންނެވެ.
ބޮޑީބޯޑިންގ އެސޯސިއޭޝަނުން މިހާރު މަސައްކަތް ކުރަމުންދަނީ އައިބިސީގެ ޓެކްނިކަލް އޮފިޝަލުންނާއެކުއެވެ. އައިބީސީގެ ޓެކްނިކަލް އޮފިޝަލުން މިހާރު ވަނީ ރާއްޖެ އައިސްފައެވެ. އަދި މުބާރާތުގެ ވާދަކުރާ ބޮޑީބޯޑަރުންވެސް ވަނީ ރާއްޖެ އަންނަން ފަށާފައެވެ. މުބާރާތުގައި ވާދަކުރުމަށް ރާއްޖޭގެ ބޮޑީ ބޯޑަރުންނަށް ޚާއްޞަ ފުރުޞަތުތަކެއްވެސް ވަނީ ފަހިކޮށްދީފައެވެ.
މުބާރާތް އޮންނާނީ މިމަހުގެ 29 ން އަންނަ މަހުގެ 7 ވަނަ ދުވަހުގެ ނިޔަލަށެވެ.
