ރައީސް ސޯލިހު ސަރުކާރާ ހަވާލުވެވަޑައިގަތްއިރު ފެނަކައިން ހިންގަމުންދިޔައީ އެންމެ 8 ޕްރޮޖެކްޓް: ސައީދު
ރައީސް ސޯލިހު ދެވަނަ ދައުރަކަށް ހޮވުމަށް ދިވެހި ރައްޔިތުން މަސައްކަތްކުރާނެ
ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު
ފެނަކައަކީ ރައީސް ސޯލިހު ސަރުކާރާ ހަވާލުވެވަޑައިގަތްއިރު މުޅި ޖުމުލަ 8 ޕްރޮޖެކްޓް ހިންގަމުންދިޔަ ކުންފުންޏެއްކަމަށް އެ ކުންފުނީގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެއެވެ.
މ. ވޭވަށު އިންޖީނުގެ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ސައީދު ވިދާޅުވީ، ރާއްޖޭގައި މީހުން ދިރިއުޅޭ ރަށްތަކުގެ ތެރެއިން އެންމެ ބޮޑަށް ރައްޔިތުން ތަކުލީފު ތަހައްމަލުކުރަމުންދާ 67 ރަށެއްގެ އިންޖީނުގެ ފާހަގަވެފައިވާކަމަށެވެ. ރައީސުލްޖުމްހޫރިއްޔާގެ ވައުދުފުޅަކަށްވީ އެކަން ހައްލުކުރެއްވުންކަމަށް އޭނާ ވިދާޅުވިއެވެ.
އެގޮތުގެ މަތިން އެ ވައުދުފުޅު ފުއްދަވައިދެއްވާފައިވާކަމަށް އޭނާ ވިދާޅުވިއެވެ.
ސައީދު ވިދާޅުވީ، މުޅި ދުނިޔެ ކޮވިޑް-19 ފަދަ އާލަމީ ވަބާއެއްގައި އޮތް އިރުވެސް، ރައްޔިތުންނަށް ފޯރުކޮށްދެމުންދާ އަސާސީ އެއްވެސް ޚިދުމަތަކަށް ހުއްޓުމެއް އައިސްފައިނުވާ ކަމަށެވެ. އެކަމަށްޓަކައި ރައީސަށް ޝުކުރު ދަންނަވާކަމަށް އޭނާ ވިދާޅުވިއެވެ.
މިއަދު ދިވެހިރާއްޖޭގެ އެކި ރަށްރަށުގައި މި ޚިދުމަތް ދެމުންދާއިރު، ފެނަކައަކީ ރައީސް ސޯލިހު، ސަރުކާރާ ހަވާލުވެވަޑައިގަތްއިރު މުޅި ޖުމުލަ 8 ޕްރޮޖެކްޓް ހިންގަމުން ދިޔަ ކުންފުންޏެއްކަމަށް ސައީދު ވިދާޅުވިއެވެ. އޭގެ ތެރެއިންވެސް 5 ޕްރޮޖެކްޓުގެ މަސައްކަތް ނިންމާފައިވަނީ މި ސަރުކާރުންކަމަށް އޭނާ ވިދާޅުވިއެވެ.
އޭގެ އިތުރުން، ދިވެހި ރައްޔިތުންގެ އަސާސީ ޚިދުމަތްތައް ފުރިހަމަކުރުމަށް ސަރުކާރުން ކުރަމުންދާ މަސައްކަތްވެސް ސައީދުގެ ވާހަކައިގައި ފާހަގަކުރައްވާފައިވެއެވެ.
ސައީދު ވަނީ ރައީސް ސޯލިހު ދެވަނަ ދައުރަކަށް ހޮވުމަށް ދިވެހި ރައްޔިތުން މަސައްކަތްކުރާނެ ކަމަށްވެސް ވިދާޅުވެފައެވެ. އޭގެ ސަބަބެއްގެގޮތުގައި ވިދާޅުވީ، މާޒީ އިޔާދަވުން ރައްޔިތުން ނޭދޭކަމެވެ.
ވެރިކަމުގެ ބާރަށް އަންނައިރު، އެތައް ވާހަކައެއް އެންމެންވެސް ދައްކާ ކަމަށާއި، ނަަމަވެސް ހަގީގަތުގައި ރައްޔިތުންގެ އިހުސާސްތައް ދަންނަނީ މަދު ބައެއްކަމަށް ސައީދު ވިދާޅުވިއެވެ. ރައީސް ސޯލިހަކީ އޭގެ މިސާލެއްކަން އޭނާ ފާހަގަކުރެއްވިއެވެ.
