ފެންބޮޑުވެ ގިނަބަޔަކު ހާލުގައި ޖެހިފައިވާތީ ޕާކިސްތާނުން ދުނިޔޭގެ އެހީތެރިކަމަށް އެދިއްޖެ

ދެމަހެއްހާ ދުވަސްވަދެން ވިއްސާރަ މޫސުމާއި ކުރިމަތިލާންޖެހުމާއި ގުޅިގެން ބޮޑު ހިސާބެއްގައި ފެންބޮޑުވެ ގިނަ އަދަދެއްގެ ބަޔަކު ހާލުގައި ޖެހިފައިވާތީ ޕާކިސްތާނުން ދުނިޔޭގެ އެހީތެރިކަމަށް ގޮވާލައިފިއެވެ.

މިއާއެކު އެމެރިކާ، އިނގިރޭސި ވިލާތް އަދި ޔުނައިޓަޑް އެމިރޭޓްސް ފަދަ ބައެއް ގައުމުތަކުން ވަނީ އެހީ ފޮނުވާފައެވެ. ނަމަވެސް އަދިވެސް އިތުރު އެހީ ބޭނުން ވާކަމަށް ޕާކިސްތާނު އިންޓީރިއަރ މިނިސްޓްރީގެ އޮފިޝަލެއް ވިދާޅުވި އެވެ.

ފެންބޮޑުވުމުގެ އަސަރު އެންމެ ބޮޑަށް ކޮށްފައިވަނީ އުތުރުގެ ބިންތިރި ހިސާބުތަކަށެވެ. މިދިޔަ ޖޫން މަހުން ފެށިގެން ވާރޭ ވެހެމުން ދިއުމުގެ ސަބަބުން ކޯރުތައް ވަނީ ފުރިފައެވެ. އަދި ގިނަ ހިސާބުތަކެއްގައި ކޯރުތައް ބަންޑުންވެ ފެންބޮޑުވުމުގެ ސަބަބުން އެއްލައްކަ އައްޑިހަ ހާހެއްހާ މީހުން ވަނީ މަޖްބޫރުވެގެން ގެދޮރު ދޫކޮށް ގޮސްފައެވެ. ބޮޑު ކޯރެއް ފުރިގެން ބަންޑުން ގޮސް ފެންގަނޑު ދެމިގެން ދިޔަގޮތުން ބްރިޖަކާއި ބައެއް އިމާރާތްތައް ވަނީ ވެއްޓިފައެވެ. އަދި ފަގީރު އަވަށްތަކުގެ އެތައްހާސް އާދައިގެ ގެތައް ވަނީ ހަލާކުވެ ގޮސްފައެވެ. އަދި އެތައްހާސް ބަޔަކު ބޯހިޔާވަހި ކަމެއް ނެތި ކާނެ އެއްޗެއް ނެތި ދުވަސްތައް ހޭދަކުރަމުން ދާކަމަށް ޚަބަރު ލިބެއެވެ.

ފެންބޮޑުވުމުގެ ސަބަބުން ދިމާވި އެކި ހާދިސާތަކުގައި މިހާތަނަށް 1500 އަށް ވުރެގިނަ މީހުން ވަނީ މަރުވެފައެވެ. މޫސުމީ ވިއްސާރައިގެ ސަބަބުން ވޭތުވެދިޔަ މަހެއްހާ ދުވަހުގެ ތެރޭގައި އެކަމުގެ އަސަރު ޕާކިސްތާނުގެ 33 މިލިއަން މީހުންނަށް ވަނީ އެކިގޮތްގޮތުން ކޮށްފައެވެ. މިއީ އެގައުމުގެ އާބާދީގެ 15 އިންސައްތަ އެވެ. އަދި މިއީ އިންސާނީ ކާރިސާއެއްގެ ގޮތުގައި ކްލައިމެޓް މިނިސްޓަރުވެސް ވަނީ ސިފަކުރައްވާފައެވެ. ސަރުކާރުން އެހީ ފޯރުކޮށް ނުދޭކަމަށްބުނެ އާންމުން ޝަކުވާ ކުރަމުން ދިޔަނަމަވެސް ސަރުކާރުން ބުނަނީ ހާލުގައި ޖެހިފައިވާ މީހުންނަށް އެހީވުމަށް ކުރެވުނު ހުރިހާ މަސައްކަތެއް ކުރަމުން ދާކަމުގައެވެ. ޕާކިސްތާނުގެ އިންޓީރިއަރ މިނިސްޓްރީގެ އިސް އޮފިޝަލެއްކަމަށްވާ ސޫފީ ވިދާޅުވީ މިކަން މިދިމާވީ ޕާކިސްތާނަށް ކުރިމަތިވެފައިވާ ބޮޑެތި އިގްތިސާދީ ގޮންޖެހުންތަކަކުން އަރައިގަތުމަށް މަސައްކަތް ކުރަމުން ދިޔަ ދަނޑިވަޅުގައި ކަމަށެވެ. އެހެންކަމާއެކު ވެސް ތަރައްގީގެ ޕްރޮޖެކްޓުތައް މަޑުޖައްސާލާ އެކަމަށް ކަނޑައަޅާފައިވާ ފައިސާ އިން ނަމަވެސް ދަނީ ހާލުގައި ޖެހުނު ފަރާތްތަކަށް އެހީވުމުގެ ކަންކަން ކުރަމުން ކަމުގައެވެ. އަދި އަސްކަރިއްޔާއިން ވެސް ވަނީ އެހީތެރިކަން ފޯރުކޮށްދިނުމަށް ނެރެފައެވެ.

ޕާކިސްތާންގެ ފެންބޮޑުވުމުގެ ހާލަތު ލޮލުން ދުށް ފަރާތްކާ ހަވާލާދީ ލިބޭ ޚަބަރުތައް ބުނާގޮތުން  މިފަހަރުގެ ވިއްސާރަޔަކީ މިހާރު ތިބި ގިނަ ބަޔަކު ދުވަހަކު ވެސް ނުދެކޭފަދަ ދިގުލާދިޔަ އަދި ބޯ ވިއްސާރަ އެކެވެ. ހެދިފައިވާ ފެންގަނޑު ބޮޑު ކަމުން ބައެއް ހިސާބުތަކުން ފެނުން މައްޗަށް އަރާފަ ހުރީ ހަމަ އެކަނި ގަސްތަކުގެ ކުރި ކަމަށް ބީބީސީ އިން ރިޕޯޓުކޮށްފައިވެއެވެ. އަދި އެހާބޮޑަށް ފެންގަނޑު ބޮޑުވެފައިނުވާ ހިސާބުތަކުގައި ވެސް ފެން ތަޣައްޔަރުވެފައި ވުމުގެ ސަބަބުން އެކި ބަލިމަޑުކަން ދަނީ ބާރަށް ފެތުރެމުންނެވެ. ގިނަ ބަޔަކު ކާނެ އެތިކޮޅަކަށް އެދި އެދި ތިބި އިރު އަނެއް ބަޔަކުދަނީ ބޭރަށް ހިންގުމާއި ހޮޑުލުން ފަދަ ބަލިތަކަށް ފަރުވާއަށް އެދި އާދޭސް ކުރަމުންނެވެ.

ޕާކިސްތާނަށް އެންމެ ފަހުން މިހާ ބޮޑަށް ވިއްސާރަކޮށް ފެންބޮޑުވެފައިވަނީ 2010-2011 ގައެވެ.