މިޔަންމާގައި ފެންބޮޑުވެ 12އަށް ވުރެ ގިނަ މީހުން މަރުވެއްޖެ
ފެންބޮޑުވުމުގެ ސަބަބުން 130،000 އަށް ވުރެ ގިނަ މީހުން ވަނީ ހާލުގައި ޖެހިފައި
މިޔަންމާއަށް ކުރަމުންދާ ވިއްސާރައިގައި ފެންބޮޑުވުމުގެ ސަބަބުން ރައްކާތެރި ހިސާބަށް ދިއުމަށް މީހަކު މަސައްކަތް ކުރަނީ
މިދިޔަ ބުދަ ދުވަހުން ފެށިގެން މިޔަންމާއަށް ކުރަމުންދާ ވިއްސާރައިގައި 12 އަށް ވުރެ ގިނަ މީހުން މަރުވެ އެތަކެއްހާސް މީހުން ހާލުގައި ޖެހިއްޖެއެވެ.
މަރުވި މީހުންގެ ތެރޭގައި ހިމެނެނީ އާންމުންގެ މީހުންނާއި ތިން ސިފައިންނެވެ. އެގައުމަށް ކުރާ ވިއްސާރައިގައި އިރު ދެކުނުގެ ބޮޑު ބައެއް ވަނީ ފެނުއަޑީގައެވެ.
ޚަބަރުތައް ބުނާގޮތުގައި ފެންބޮޑުވުމުގެ ސަބަބުން 130،000 އަށް ވުރެ ގިނަ މީހުން ވަނީ ހާލުގައި ޖެހިފައެވެ. ބައެއް ޖިފުޓިތަކުގެ ފުރާޅާ ހަމައަށް ފެންގަނޑު ބޮޑުވެފައިވާއިރު ހާލުގައި ޖެހުނު މީހުންނަށް 285 ވަގުތީ ކޭމްޕް ވަނީ ހަދާފައެވެ. އަދި އެމީހުން އެ ކޭމްޕްތަކަށް ގެންދިއުމުގެ މަސައްކަތް ދަނީ ކުރަމުންނެވެ. އަދި ކުރިއަށް އޮތްތާނގައި މިއަދަދު އިތުރު ވުމަކީވެސް އެކަށީގެންވާ ކަމެއްކަމަށް އެގައުމުގެ ކަމާބެހޭ ފަރާތްތަކުން ދަނީ ބުނަމުންނެވެ.
މިޔަންމާގެ މޫސުމާ ބެހޭ ފަރާތްތަކުން ވަނީ އެގައުމަށް ކުރަމުންދާ ވިއްސާރަ ތޫފާނަކަށް ބަދަލުވެދާނެ ކަމުގެ ބިރު އޮތްކަމަށް ވިދާޅުވެފައެވެ. ފެންބޮޑުވެފައިވާ ސަރަހައްދުތަކުގައިވާ ކޯރުތަކުގައި ނުރައްކާތެރި ދަރަޖައަށް ފެންބޮޑުވެ ބަންޑުންވަމުން ދާއިރު މީހުން ސަލާމަތް ކުރާ ޓީމުގެ ލީޑަރ ވިދާޅުވީ ފެންބޮޑުވުމުގެ ސަބަބުން ބައެއް ކޯރުތައް ބަންޑުންވެފައިވާ ކަމަށާއި އިތުރު އަވަށްތަކުގައިވާ ކޯރުތައް ބަންޑުންވެއްޖެނަމަ ނުރައްކާ އިތުރުވެގެން ދާނެކަމަށެވެ.
