ޕާކިސްތާނުގައި ފެންބޮޑުވެ އެތައްހާސް ބަޔަކު ގެދޮރު ދޫކޮށް ދާންޖެހިއްޖެ

އުތުރު ޕާކިސްތާނުގައި ކޯރުތައް ބަންޑުންވެ ފެންބޮޑުވުމުގެ ސަބަބުން އެތައްހާސް ބަޔަކު ގެދޮރުދޫކޮށް ދާންޖެހިއްޖެއެވެ.

ރޮއިޓަރސްގައި ބުނެފައިވަނީ ހޮނިހިރު ދުވަހު ކޯރުތައް ބަންޑުންވުމުގެ ސަބަބުން ބޮޑު ބްރިޖެއް ވެއްޓިފައިވާ އިރު، އެކަމުގެ ސަބަބުން އެތައް ގެއްލުންތަކެއްވަމުން އަންނަ ކަމަށެވެ.

ޕާކިސްތާންުގެ އުތުރު ޕްރޮވިންސެއްކަމަށްވާ ޚައިބަރ ޕަޚްޓުންޚަވާ ސަރަހައްދުގައި އަވަސް މިނެއްގައި ފެންބޮޑުވުމުގެ ސަބަބުން ކާބުލްގެ ކޯރު ބަންޑުންވެ ބޮޑު ބްރިޖެއް ވެއްޓިފައިވާ އިރު، ބިންގަނޑު ކަނޑައިގެން ދިއުމުގެ ސަބަބުން ބައެއް ހިސާބުތައް ޕްރޮވިންސާއި ބިމުން ވަކިވެފައިވާ ކަމަށް ވަނީ ރިޕޯޓްކޮށްފައެވެ.

ފެންބޮޑުވުމުގެ ސަބަބުން ޗަރސައްދާ ހިސާބުން 180،000ށް ވުރެ ގިނަ މީހުން ގެދޮރު ދޫކޮށް ދާންޖެހިފައިވާ ކަމަށް ޕާކިސްތާނުގެ ޑިޒާސްޓަރ އޮފިޝަލުންނާއި ހަވާލާދީ ރޮއިޓަރސްގައި ބުނެފައިވެއެވެ. އަދި ރައްކާތެރިކަން ހޯދުމަށް އެތައް ބަޔަކު ހައިވޭތަކުގައި ބައެއް މީހުން ގެންގުޅޭ ޖަނަވާރުތަކާ އެކު ރޭ ހޭދަކުރިކަމަށް ވެސް ރިޕޯޓްކޮށްފައިވެއެވެ.

މޫސުމީ ވިއްސާރައިގެ ސަބަބުން ވޭތުވެދިޔަ ހަފްތާއެއްހާ ދުވަހުގެ ތެރޭގައި އެކަމުގެ އަސަރު ޕާކިސްތާނުގެ 30 މިލިއަން މީހުންނަށް ވަނީ އެކިގޮތްގޮތުން ކޮށްފައެވެ. އަދި މިއީ އިންސާނީ ކާރިސާއެއްގެ ގޮތުގައި ކްލައިމެޓް މިނިސްޓަރު ވަނީ ސިފަކުރައްވާފައެވެ.

ފެންބޮޑުވެ ދިމާވަމުންދާ ހާދިސާތަކާއި ގުޅިގެން ޕާކިސްތާންގެ އަސްކަރިއްޔާއިން ވަނީ އެހީތެރިކަން ފޯރުކޮށްދިނުމަށް ނުކުމެފައެވެ.

ފެންބޮޑުވުމުގެ ސަބަބުން އެންމެ ބޮޑަށް އަސަރުކޮށްފައިވަނީ ބަލޮޗިސްތާންގެ ދެކުނުގެ ސަރަހައްދަށެވެ.