އެމްޓީސީސީން މަސައްކަތްކުރަނީ ކުރިއަތް އޮތް މަސްދުވަހުގެ ތެރޭގައި ދިއްގަރުގެ ބިން ހިއްކުމުގެ މަޝްރޫއު ނިންމުމަށް: ރައީސް ޞާލިޙް

އެމްޓީސީސީން މަސައްކަތްކުރަނީ ކުރިއަތް އޮތް މަސްދުވަހުގެ ތެރޭގައި މ. ދިއްގަރުގެ ބިން ހިއްކުމުގެ މަޝްރޫއު ނިންމުމަށްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ދިއްގަރު ގޮނޑުދޮށް ހިމާޔަތްކުރުމުގެ މަސައްކަތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، ސަރުކާރުން ވައުދުވީ ރަށުގައި 25 ހެކްޓަރުގެ ބިން ހިއްކުމަށްކަމަށާއި 17 ހެކްޓަރުގެ ބިން ހިއްކައި ނިންމާފައިވާކަމަށެވެ. އަދި އެމްޓީސީސީން ތައްޔާރުވަނީ ރަށުގައި ނުނިމި އޮތް ބިން ހިއްކުމުގެ މަޝްރޫއު ނިންމައި ވީ ވައުދުތައް ފުރިހަމަކުރުމަށް ކަމަށް ރައީސް ވިދާޅުވިއެވެ.

އުދަ އެރުމުގެ ސަބަބުން ދިއްގަރަކީ އެންމެ ބޮޑު ގެއްލުމެއް ކުރިމަތިލާން ޖެހިފައިވާ އެއް ރަށް ކަމަށާއި، ރައްޔިތުންގެ މުދަލާއި ތަކެއްޗަށް ލިބެމުން އައި ގެއްލުމަކީ ރައްޔިތުން ތަހައްމަލުކުރަމުން އައި އެއް ކަންތައްކަމަށް ރައީސް ވިދާޅުވިއެވެ.

ދިއްގަރު ގޮނޑުދޮށް ހިމާޔަތްކުރުމުގެ މަސައްކަތް ނިންމާލެވުނީ އެތައް ބައެއްގެ ބުރަ މަސައްކަތުންކަން ފާހަގަކުރައްވައި ރައީސް ވިދާޅުވީ، މިކަމުގެ ކްރެޑިޓް ލިބޭނީ ރައްޔިތުންނަށް ކަމަށެވެ. ސަރުކާރުން ހިންގާ ޕްރޮޖެކްޓްތައް ކުރިއަށް ގެންދިޔުމަށް އެ ސަރުކާރަކާ އެއްވިސްނުމެއްގައި ތިބުމުން ޕްރޮޖެކްޓްތައް ނިންމަން ފަސޭހަވާނެކަމަށް ރައީސް ވިދާޅުވިއެވެ.

ރައްޔިތުން ހުށަހަޅާ ހުށަހެޅުންތަކަށް އަމަލީ ސިފަ ގެނެސްދޭނެކަމަށް އެހެން ސަރުކާރުތަކުންވެސް ވައުދުވެފައިވާނެ ކަމަށާއި، މިއަދު އެ ދުވަސްވީ ތަކުލީފަށް ހައްލެއް ގެނެސްދިނީ މި ސަރުކާރުން ކަމަށް ރައީސް ވިދާޅުވިއެވެ.

ދުއްތުރާކޮށް ޕްރޮޖެކްޓްތައް ހުއްޓުވުން އެއީ ޚިޔާލު ތަފާތުވުން ނޫންކަމަށާއި، އަދި އެއީ ޕްރޮޖެކްޓްތައް ހުއްޓުވަންޖެހޭ ސަބަބެއް ނޫންކަމަށާއި، މިއަދުވެސް އެކަހަލަ ބައެއް ކަންތައްތައް ދިމަވާވަމުންދާކަމަށް ރައީސް ވިދާޅުވިއެވެ.

ބިން ހެޔޮގޮތުގައި ބޭނުންކުރުމުގެ ޕްލޭނެއް ކައުންސިލުން ތައްޔާރުކުރުމަށް އެދިވަޑައިގެން ރައީސް ވިދާޅުވީ، އިގުތިސާދީގޮތުން، ރަށުގައި ތިބެގެން ރައްޔިތުންނަށް އާމްދަނީ ހޯދޭނެ ގޮތްތަކެއް ހޯދައިދޭން ޖެހޭނެކަމަށެވެ. އަދި މިކަމުގައި އެންމެ މުހިންމު ދައުރެއް އަދާކުރެވޭނީ ކައުންސިލަށްކަމަށް ރައީސް ވިދާޅުވިއެވެ.

1400ށްވުރެ ގިނަ މީހުން ދިއްގަރުގެ ރަޖިސްޓްރީގައި ތިބިކަމަށާއި 1،000ށްވުރެ ގިނަ ރައްޔިތުން ރަށުގައި ދިރިއުޅެމުންދާ ކަމަށްވެސް ވިދާޅުވިއެވެ. އަދި މިހާރަށްވުރެ ރަނގަޅު ބަޖެޓެއް އަންނަ އަހަރު ދިއްގަރަށް ހަމަޖައްސަވައިދެއްވާނެ ކަމަށްވެސް ރައީސް ވިދާޅުވިއެވެ.