ސާފު މަސްވެރިކަމެއް ކުރުމަށް ރާއްޖެއަށް ދިމާވެފައިވާ އެންމެ ބޮޑު ގޮންޖެހުމަކީ ރާއްޖޭގެ މަސްވެރިކަމުގެ ސިނާއަތުގައި ގަވާއިދާ ޚިލާފަށް ބިދޭސީން ހަރަކާތްތެރިވުން ކަމަށް ފިޝަރީޒް މިނިސްޓްރީން ބުނެފިއެވެ.

ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން ފިޝަރީޒް މިނިސްޓްރީގެ ސީނިއަރ ޑިރެކްޓަރ އަހުމަދު ޝިފާޒް ވިދާޅުވީ، ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަކީ މަސްވެރިކަމުގެ ސިނާއަތުގެ އިތުރުން އެހެން ސިނާއަތްތަކަށްވެސް ދިމާވެފައިވާ ބޮޑު ގޮންޖެހުމެއްކަމަށެވެ. އަދި މަސްވެރިކަމުގެ ސިނާއަތުގައި އެގޮތަށް ބިދޭސީން ހަރަކާތްތެރިވުމަކީ ރާއްޖޭގައި އުފައްދާ މަސްވެރިކަމުގެ އުފެއްދުންތައް އިޝްތިހާރުކޮށް ކުރިއެރުވުމަށް ދިމާވާ ގޮންޖެހުމެއްކަންވެސް އޭނާ ވަނީ ފާހަގަކުރައްވާފައެވެ. އެހެންކަމުން އެކަން ހުއްޓުވުމަށް ގައުމީ ފެންވަރުގައި މަސައްކަތްތަކެއް ކުރައްވާނެކަމަށް އޭނާ ވަނީ ވިދާޅުވެފައެވެ.

މީގެ އިތުރުން މަސްވެރިކަމުގެ ގާނޫނުގެ މުހިންމުކަމާ ގުޅޭގޮތުން ވާހަކަފުޅުދައްކަވަމުން އޭނާ ވިދާޅުވީ، ޒަމާނީ މަސްވެރިކަމަށް ރާއްޖެ ގެންގޮސް، މަސްވެރިކަމުގެ އުސޫލުތައް ހަރުދަނާގޮތެއްގެ މަތިން ހިންގުމަށް އެފަދަ ގާނޫނެއް އޮތުން ވަރަށް މުހިންމުކަމަށެވެ. އެ ޕްރޮގްރާމްގައި ވާހަކަދައްކަވަމުން ފިޝަރީޒް މިނިސްޓްރީގެ ސީނިއަރ ކޮމްޕްލެއިންސް އޮފިސަރ ހުސައިން ޒަމީލް ވިދާޅުވީ، މަސްވެރިކަމުގެ އުސޫލާ އެއްގޮތަށް ލައިސަންސް ދޫކުރާ އުޅަނދުފަހަރުގައި އެއްފަހަރާ މަސައްކަތްކުރެވޭނީ ގިނަ ވެގެން ދެ ބިދޭސީންނަށް ކަމަށެވެ. އެހެންނަމަވެސް އެ ބިދޭސީންނަށް ސީދާ މަސްވެރިކަމުގައި ހަރަކާތްތެރިނުވެވޭނެކަން އޭނާ ވަނީ ފާހަގަކުރައްވާފައެވެ.

މަސްވެރިކަމުގެ އާއްމު ގަވާއިދެއް އެންމެ ފުރަތަމަ އެކުލަވާލީ 2020 ވަނަ އަހަރެވެ. މި ގަވާއިދުގައި، މަސްވެރިކަމުގައި ބިދޭސީން ހަރަކާތެރިވާނެ އުސޫލުތައް ވަނީ ބަޔާންކޮށްފައެވެ.