ވެކްސިން އަތަށް ނަގައިގެން އުޅުމަކީ ކޮށްގެންވާނެ ކަމެއް ނޫން: ޑރ ރަމީލާ

ރާއްޖޭގައި ހަލުއިކަމާ އެކު ފެތުރުނު އިންފްލުއެންޒާ އެޗްވަންއެންވަން، ރޯގާ އާ ގުޅިގެން ދުނިޔޭގެ ސިއްހަތު ޖަމިއްޔާއިން ތިރީސް ހާސް ވެކްސިން ހަދިޔާކޮށްފައިވާ ކަމާ ގުޅޭ ގޮތުން ދެކެވުނު ވާހަކަތައް އެޗްޕީއޭ އިން ދޮގު ކޮށްފި އެވެ.

ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި ޖަވާބުދާރީ ވަމުން ހެލްތް މިނިސްޓްރީގެ ސްޓޭޓް މިނިސްޓަރ ޑރ އައިޝަތު ރަމީލާ ވިދާޅުވީ، ދުނިޔޭގެ ސިއްހަތު ޖަމިއްޔާއިން 30 ހާސް ވެކްސިން ހަދިޔާ ކޮށްފައިނުވާ ކަމަށާއި އެހެންނަމަވެސް 65 އަހަރުން މަތީގެ މީހުންނަށް ވެކްސިން ދިނުމަށް އެ ޖަމިއްޔާއިން މި ހަފްތާގެ ތެރޭގައި 750 ވެކްސިން ދީފައިވާ ކަމަށް އޭނާ ވިދާޅުވި އެވެ. އެޖަމިއްޔާ އިން ހަދިޔާ ކުރި މި ވެކްސިން ދައުލަތުގެ ބެލުމުގެ ދަށުގައި ތިބި 65 އަހަރުން މަތީގެ މީހުންނަށް ހިލޭ ދެވިގެންދާނެ ކަމަށް ހެލްތް މިނިސްޓްރީން ބުނެ އެވެ.

" އަޅުގަނޑުމެން އިންފްލުއެންޒާ ވެކްސިން މި ޖަހަނީ އެންމެ ރިސްކު ބޮޑެތި ގްރޫޕުތަކަށްވާތީވެ، އެމީހުންނަށް ކޮންމެ ކޮންމެ ތަނެއްގައި ވެކްސިން ދިނުމުން، އެމީހުންނަށް އައިސްދާނެ ރިއެކްޝަނަކުން ސަލާމަތް ވުމަށް އަވަސް ފިޔަވަޅުތަކެއް ނޭޅޭނެ. އެހެންވެ، ކޮންމެ ކޮންމެ ތަނެއްގައި ވެކްސިން ނުދެވެނީ." ރަމީލާ ވިދާޅުވި އެވެ.

ރަމީލާ ވިދާޅުވީ، ރާއްޖޭގައި މިބަލި އުޅޭ ވަރު ދެނެގަނެވުމުގެ މަސައްކަތް ފެށުނީވެސް އާއްމުކޮށް ހުޅުވާލައިގެން ވެކްސިން ފެށުމަށްޓަކާއި ކަމަށާއި މިހާރު ރާއްޖޭގައި މިބައްޔަށް ވެކްސިން ދިނުމުގެ ބޭނުމެއް އޮތްކަން ފާހަގަވުމުން އާއްމުކޮށް ހުރިހާ ރައްޔިތުންނަށް ވެކްސިން ޖެހޭނެ އިންތިޒާމުތައް ހަމަޖެއްސުމުގެ މަސައްކަތް ފަށާފައިވާ ކަމަށެވެ.

ރަމީލާ ވިދާޅުވީ، ރާއްޖޭގައި ރޯގާ ފެތުރުނު ދުވަސް ވަރުގައި އަމިއްލަ ފަރާތްތަކުންވެސް ވެކްސިން ގެންނަ ކަމަށާއި، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ޗެކްކޮށްގެން ބައެއް ފަރާތްތަކަށް ވެކްސިން ދިނުމުގެ ހުއްދަ ދެނުނު އިރު، އެފަދަ ފަރާތްތަކުން ވެކްސިން ގެނެސްފައިވަނީ ކަނޑައެޅިފައިވާ މިންގަނޑުގެ ތެރެއިންކަން ބަލާފަ ވާނެ ކަމަށެވެ.

އެހެން ނަމަވެސް ބައެއް ފަރާތްތަކުން ބޭރު ގައުމުތަކުން އަމިއްލަ ފޮއްޓަށްލައިގެންވެސް ވެކްސިން ރާއްޖެ ގެންނަމުންދިޔަ ކަން ފާހަގަކުރެވުނު ކަމަށާއި އެކަން ދެނެގަނެވިފައިނުވާ ކަމަށް އޭނާ ވިދާޅުވި އެވެ. އަދި ވެކްސިން ހިފައިގެންގޮސް ވެކްސިން ޖެހުމަށް ޑޮކްޓަރުން ކައިރިޔަށް ދިޔަ ކަމަށާއި އެފަދަ ހާލަތްތަކުގައި އެ ވެކްސިންތައް ރިޖެކްޓް ކޮށްފައިވާނެ ކަމަށް އޭނާ ވިދާޅުވި އެވެ.

މެންބަރަކު ދެންނެވި ސުވާލަތަކަށް ޖަވާބު ދެއްވަމުން ރަމީލާ ވިދާޅުވީ، ސޯޝަލް މީޑިޔާގައި ވެކްސިންއާ އެކު ފޮޓޯޓަކެއް އާއްމުވުމުން އެކަން އެ މިނިސްޓްރީން ބެލިކަމަށެވެ. އެގޮތުން އެވެކްސިން ތަކަކީ އެމްއެފްޑީއޭ އިން ކަނޑައަޅާފައިވާ މިންގަނޑުތަކާ އެއްގޮތަށް ނެގެސްފައިވާ ވެކްސިން ތަކެއް ކަމަށް ރަމީލާ ވިދާޅުވި އެވެ. އެއީ ރަގަޅު ކޮންޑިޝަންގައި ގެނެވުނު ވެކްސިންކަމުގައިވީ ނަމަވެސް، އެވެކްސިން އާ އެކު ފޮޓޯ ނެގުމަށް އަތައް ނަގައިގެން އުޅުނު އުޅުމަކީ ކުރެވިގެންވާނެ ކަމެއް ނޫން ކަމަށް އޭނާ ވިދާޅުވި އެވެ.

ރަމީލާ މިކަން ފާހަގަކޮށްފައިވާ އިރު ރައީސް ޔާމީންގެ އަނބި ކަނބަލުން ފާތިމަތު އިބްރާހިމް އިންފްލުއެންޒާ ވެކްސިން ގެންނަކަން ހާމަކޮށް، ރައީސް ޔާމީން ފެކްޝަނުގެ މެންބަރުންވަނީ ވެކްސިން އަޅާފައިވަ ފޮށިގަނޑެއް ހުޅުވައިގެން ތިބި މަންޒަރު ފެންނަ ފޮޓޯ އެއް އާއްމުކޮށްފަ އެވެ.

އިންފްލުއެންޒާ ވެކްސިން އަކީ ވަކި، ފިނި ހޫނު މިނެއްގާ ބަހައްޓަން ޖެހޭ ވެކްސިނަށްވާ އިރު އެ ވެކްސިން ޖަހަންދެން ވަކި މިންގަނޑެއްގައި ބަހައްޓަން ޖެހެ އެވެ.