ގްރެންފެލް ޓަވަރުގައި ހިނގި އަލިފާނުގެ ހާދިސާގައި 58 މީހުން މަރުވެފައިވާ ކަމަށް ނިންމައިފި
އިމާރާތުގެ ތެރެއިން ފުލުހުން މިހާތަނަށް ނެރެފައިވަނީ 16 މީހެއްގެ ހަށިގަނޑު
ގްރެންފެލް ޓަވަރ ގައި އަލިފާން ރޯވެ އަނދަނީ
ލަންޑަންގެ ގްރެންފެލް ޓަވަރުގައި ހިނގި އަލިފާނުގެ ވަރުގަދަ ހާދިސާގައި 58 މީހުން މަރުވެފައިވާ ކަމަށް ފުލުހުން ނިންމައިފިއެވެ. އަލިފާނުގެ ހާދިސާ ހިނގި އިމާރާތުގެ އެކިއެކި ފަންގިފިލާތައް ވަކިވަކިން ބަލައި ފުލުހުން ގެންދަނީ މަރުވެފައިވާ މީހުންގެ ހަށިތައް ހޯދުމުގެ މަސައްކަތް ކުރަމުންނެވެ. މިހާދިސާގައި 58 މީހުން މަރުވެފައިވާ ކަމަށް ފުލުހުން ކަނޑައެޅިއިރު، އޭގެ ތެރޭގައި މަރުވެފައި ވަނިކޮށް މިހާތަނަށް ފެނިފައިވާ 30 މީހުންގެ ހަށިގަނޑުވެސް ހިމަނާފައި ވެއެވެ. "ގްރެންފެލް ޓަވަރުގައި ދިރިއުޅޭ މީހުންގެ ތެރެއިން، އަލިފާނުގެ ހާދިސާ ހިނގި ރޭ، ވީނުވީއެއް ނޭނގި ގެއްލިގެން އަޅުގަނޑުމެންނަށް ރިޕޯޓް ކޮށްފައިވަނީ 58 މީހުން. އެހެންކަމުން، ވަރަށް ހިތާމަޔާއެކު ދަންނަވަން، އެމީހުން މަރުވެފައިވާނޭ ކަމަށް އަޅުގަނޑު ކަނޑައަޅަން" ޕޮލިސް ކޮމާންޑަރ ސްޓުއާޓް ކުންޑީ، ނޫސްވެރިންގާތު ވިދާޅުވިއެވެ. ސްޓުއާޓް ވިދާޅުވީ، ގެއްލިފައިވާ މީހުންނާބެހޭ މައުލޫމާތު އިތުރަށް ލިބެމުންދާ މިންވަރަކަށް އަލިފާނުގެ ހާދިސާގައި މަރުވި ކަމަށް ކަނޑައެޅި މީހުންގެ އަދަދަށް ބަދަލު އައުމަކީ އެކަށީގެންވާ ކަމެއް ކަމަށެވެ. ނަމަވެސް އިމާރާތުގެ ތެރެއިން ދިރިހުރި އެކަކުވެސް ފެނުމުގެ އުންމީދެއް ނެތްކަމަށް ވަނީ ކަނޑައަޅާފައެވެ. އިމާރާތުގެ ތެރެއިން ފުލުހުން މިހާތަނަށް ނެރެފައިވަނީ 16 މީހެއްގެ ހަށިގަނޑެވެ. މަރުވެގެން ހަށިގަނޑު ނެރުނު މީހުންގެ ތެރެއިން ފުލުހުން ފުރަތަމަ ދެނެގަނެފައިވަނީ، ސޫރިޔާގެ ރެފިއުޖީއެއް ކަމަށްވާ އުމުރުން 23 އަހަރުގެ މުހަންމަދު އަލްހާޖްއަލީ ނަމަކަށްކިޔާ ޒުވާނެކެވެ. އަލިފާނުގެ ހާދިސާގައި މޮރޮކޯ ރައްޔިތުންގެ 7 މީހުން މަރުވެފައިވާ ކަމަށް މޮރޮކޯ ސަރުކާރުގެ ޚާރިޖިއްޔާއިން ކަށަވަރު ކޮށްދީފައި ވެއެވެ. އަލިފާނުގެ ހާދިސާގައި ފިހިގެން އަނިޔާވި މީހުންގެ ތެރެއިން 19 މީހަކަށް އަދިވެސް ހޮސްޕިޓަލުގައި ގެންދަނީ ފަރުވާ ދެމުންނެވެ. އޭގެ ތެރެއިން 10 މީހުންގެ ހާލު ވަރަށް ސީރިއަސް ކަމަށްވެސް ރިޕޯޓްތައް ބުނެއެވެ. ގްރެންފެލް ޓަވަރު އަލިފާނުގެ ހާދިސާއާ ގުޅިގެން އާންމުންގެ ރުޅިވެރިކަން އިންތިހާއަށް މައްޗަށް ގޮސްފައިވެއެވެ. ބޮޑުވަޒީރު ތެރީސާ މޭއަށާއި، ސަރުކާރުގެ ކަމާބެހޭ ފަރާތްތަކަށް އާންމުންގެ ރުޅިވެރިކަންވެސް އަމާޒުވެފައި ވެއެވެ. ބުދަދުވަހުގެ ހާދިސާއަކީ ބައެއްގެ އިހުމާލުން ހިނގި ހާދިސާއެއް ކަމަށްބުނެ، މިހާދިސާގައި މަރުވި މީހުންގެ އާއިލާތަކަށާއި އަދި ގެދޮރު ގެއްލުނު މީހުންނަށް އިންސާފު ހޯދައިދިނުމަށްވެސް އާންމުން ގެންދަނީ ގޮވާލަމުންނެވެ.
