މަބްރޫކް އިސްތިއުފާ ދެއްވުމުން، އެ މަގާމަށް މިއުވާން އައްޔަންކޮށްފި

ރައީސް އޮފީހުގެ ސްޕޯކްސްޕަރސަންގެ މަޤާމުން މަބްރޫކް އިސްތިއުފާ ދެއްވައިފިއެވެ.

ރައީސް އޮފީހުން ބުނީ އެ އޮފީހުގެ ސްޕޯކްސްޕަރސަންގެ މަޤާމުން މުޙައްމަދު މަބްރޫކް ޢަޒީޒު އިސްތިއުފާ ދެއްވާފައިވާ ކަމަށެވެ. އަދި އޮފީހާއި ސަރުކާރަށް އޭނާ ކޮށްދެއްވާފައި ވަނީ ވަރަށް އިޚުލާސްތެރި، އަދި އަގުހުރި ޚިދުމަތްތަކެއް ކަމަށާއި، އޭނާ ކޮށްދެއްވާފައިވާ ތަޢުރީފު ހައްޤު މަސައްކަތްތަކަށް ޝުކުރު ދަންނަވާ ކަމަށެވެ.

މަބްރޫކް މަގާމުން އިސްތިއުފާ ދެއްވިކަން ހާމަކުރައްވާ އޭނާ ކުރެއްވި ޓްވީޓެއްގައި ވިދާޅުވީ، ރައީސް އޮފީހުގެ ތަރުޖަމާނުގެ މަގާމުން އިސްތިއުފާ ދެއްވާ ކަމަށެވެ. އަދި މަގާމުން އިސްތިއުފާ ދެއްވަން ބޭނުންވެވަޑައިގަންނަވާކަން ރައީސް ސާލިހަށް ވެސް މީގެ މަސްތަކެއް ކުރިން ދަންނަވާ އެމަނިކުފާނުގެ އިރުޝާދާއެކު ކުރިއަށް ވަޑައިގަންނަވަމުން ގެންދެވީކަމަށް މަބްރޫކް ވަނީ ވިދާޅުވެފައެވެ.

މަބްރޫކް ވިދާޅުވީ އުނދަގޫ ދަތި ހާލަތުގައި ރަނގަޅަށް މަސައްކަތްކުރުމުގެ މަގުފަހިވެ، ރާއްޖެއަށް ދިމާވި ކާރިސާގެ ތެރޭގައި މަސައްކަތްކުރުމުގެ ފުރުސަތު ލިބިވަޑައިގެންނެވި ކަމަށްޓަކައި މާތްﷲ އަށް ޝުކުރުވެރިވާކަމަށެވެ.

މަބްރޫކް މަގާމުން އިސްތިއުފާ ދެއްވާފައިވާ އިރު، ރައީސް އޮފީހުގެ ތަރުޖަމާނުގެ މަޤާމަށް މިއުވާން މުހައްމަދު މިއަދު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވަނީ އައްޔަން ކުރައްވާފައެވެ. މިއުވާން މީގެ ކުރިން ހުންނެވީ ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރުގެ މަގާމުގައެވެ.

މިއުވާން ރައީސް އޮފީހުގެ ތަރުޖަމާނުކަމަށް އައްޔަން ކުރެއްވުމާއި ގުޅިގެން މަބްރޫކް ވަނީ މިއުވާނަށް މަރުހަބާ ވިދާޅުވެފައެވެ. އެގޮތުން މަބްރޫކް ވިދާޅުވީ ނޫސްވެރިއެއްގެ ހައިސިއްޔަތުންނާއި ކޮމިއުނިކޭޝަން އޮފިޝަލެއްގެ ގޮތުގައި މިއުވާން ކުރައްވާފައިވާ މަސައްކަތަކީ ނަމޫނާ މަސައްކަތެއް ކަމަށާއި، ތަރުޖަމާނެއްގެ ހައިސިއްޔަތުން ވެސް އޭނާ ރަނގަޅަށް މަސައްކަތް ކުރައްވާނެކަމާމެދު ޝައްކު ނުކުރައްވާ ކަމަށް ވިދާޅުވެފައެވެ.

މަބްރޫކް ވަނީ ރާއްޖޭގެ ނޫސްވެރިންނަށް ވެސް މެސެޖެއް ދެއްވާފައެވެ. މަބްރޫކް ވިދާޅުވީ ނޫސްވެރިންގެ ކޯލްތަކާއި، މެސެޖް އަދި އެންމެ ނުގަޑީގައި ވެސް އަންނަ ކޯލްތަކާއި މެސެޖްތައް މަތިން ހަނދާންވާނެ ކަމަށް ވިދާޅުވެފައެވެ.

އަދި ހިޔާލުތަފާތުވުންތަކުގެ ތެރެއިން ވެސް ސަރުކާރުގެ ކަންކަން ނޫސްވެރިން ރިޕޯޓްކޮށް ކުރެއްވި މަސައްކަތް ފާހަގަކުރައްވާފައިވާއިރު، މިނިވަން އަދި ވަކިއަތަކަށް ނުޖެހޭ މީޑިއާއެއް އަބަދުވެސް އޮންނާނެކަމަށް އުއްމީދުކުރައްވާކަމަށް މަބްރޫކް ވިދާޅުވިއެވެ.

މަބްރޫކް ވަނީ ރައީސް ސާލިހުގެ މެސެޖްތައް އާންމުންނާ ހަމައަށް ފޯރުކޮށްދެއްވުމަށް އޭނާއަށް ކުރެއްވި އިތުބާރަށް ރައީސްއަށް ޝުކުރުއަދާކުރައްވާފައެވެ. އަދި މަސައްކަތް ކުރެއްވި އިރު ލިބިވަޑައިގެންނެވި ތަޖްރިބާއަކީ އަބަދަށްވެސް ދެމިހުންނާނެ ކަމެއް ކަމަށް ވިދާޅުވެފައެވެ.

ނިންމާލައްވަމުން މަބްރޫކް ވަނީ އޭނާގެ ޓީމަށާއި، އާއިލާއާއި ރައްޓެހިން އަދި ހެލްތް އެމަރޖެންސީ އޮޕަރޭޝަން ސެންޓަރުގައި މަސައްކަތް ކުރެއްވި އެންމެންނަށް ޝުކުރު އަދާކުރައްވާފައެވެ. އަދި ލިބިވަޑައިގެންނެވި އެއްބާރުލެއްވުމާއި ބޭނުންވި ކޮންމެ ދަނޑިވަޅެއްގައި އެހީތެރިކަން ފޯރުކޮށްދެއްވި އެންމެންނަށް ވެސް ވަނީ ޝުކުރު އަދާކުރައްވާފައެވެ.