އެމަރސަން ވެސްޓް ހޭމްއަށް ސޮއިކޮށްފި

ޗެލްސީއަށް ކުޅެމުންއައި އެމަރސަން ޕަލްމިއެރީ، ވެސްޓް ހޭމް ޔުނައިޓެޑަށް ސޮއިކޮށްފިއެވެ.

ރިޕޯޓުތައް ބުނާ ގޮތުން ޗެލްސީން އޭނާ ވިއްކާލީ 13 މިލިއަން ޔޫރޯއަށެވެ. އަދި އޭނާގެ ކުޅުމަށް ބަލާފައި 2 މިލިއަން ޔޫރޯގެ އެޑް-އޮން ދިނުމަށް އެއްބަސްވުމުގައި ހިމަނާފައިވާ ކަމަށްވެސް ރިޕޯޓުތައް ބުނެއެވެ.

2018 ވަނަ އަހަރު ޗެލްސީއަށް ބަދަލުވެ، އެމަރސަން ވަނީ އެޓީމަށް 33 މެޗު ކުޅެދީފައެވެ. އޭގެ ފަހުން މިދިޔަ ސީޒަންގައި އޭނާ ވަނީ ލޯނު އުސޫލުން ލިޔޯންއަށް ކުޅެފައެވެ. ލިޔޯންއަށް ކުޅެދިން 29 މެޗުގައި އޭނާ ވަނީ އެއްލަނޑު ޖަހާފައެވެ.

މިފަހަރުގެ ސަމަރ ޓްރާންސްފަރ މާކެޓުގައި ޗެލްސީން އަންނަނީ ޓީމުގެ ހާލަތު ރަނގަޅު ކުރުމަށްޓަކައި ގިނަ ކުޅުންތެރިންތަކެއް ހޯދުމަށް މަސައްކަތްކުރަމުންނެވެ. މި ޓްރާންސްފަރ މާކެޓުގައި ޗެލްސީގެ މުހިންމު ގިނަ ކުޅުންތެރިންތަކެއް އެޓީމު ދޫކޮށް އެހެން ކްލަބުތަކަށް ބަދަލުވެފައިވެއެވެ.