ވޯލްޑް ކަޕްގައި ސެކިއުރިޓީ ބެލެހެއްޓުމަށް ޕާކިސްތާނު ސިފައިން ފޮނުވަނީ
23 އޯގަސްޓު 2022 | އަންގާރަ 16:49ޕާކިސްތާނުގެ ބޮޑުވަޒީރު ޝަހްބާޒް ޝަރީފް އަންގާރަ ދުވަހު ވަނީ ގަތަރަށް ދަތުރުކުރައްވާފައި
ސެކިޔުރިޓީ ބަލަހައްޓާ ސިފައިންތަކެއް ހަރަކާތްތެރިވަނީ
މިއަހަރުގެ ފަހުކޮޅު ގަތަރުގައި އޮންނަ ފީފާ ވޯލްޑް ކަޕްގައި ސެކިއުރިޓީ ބަލެހެއްޓުމަށް ޕާކިސްތާނު ސިފައިން ފޮނުވަން އެޤައުމުން އެއްބަސްވެއްޖެއެވެ.
މުބާރާތުގެ ސެކިއުރިޓީ ބެލެހެއްޓުމަށްޓަކައި ޕާކިސްތާނުގެ ސިފައިން ފޮނުވުމަށް ގަތަރުގެ ސަރުކާރުން، ޕާކިސްތާނުގެ ސަރުކާރުގައި އެދިފައިވާކަމަށް ރިޕޯޓުތައް ބުނެއެވެ. އަދި އެއްބަސްވުމުގެ ޑްރާފްޓު ޕާކިސްތާނުގެ ކެބިނެޓުން މިއަދު ވަނީ ފާސްކޮށްފައެވެ. މި އެއްބަސްވުމަކީ ދޯހާ އާއި އިސްލާމްއާބާދް އާއި ދެމެދު ހެދުމަށް ހަމަޖެހިފައިވާ އެއްބަސްވުމެކެވެ.
ދުނިޔޭގެ ގިނަ ޤައުމުތަކުގެ ތެރެއިން ޕާކިސްތާނުގެ ސިފައިން ހޯދުމަށް ޤަތަރުން އެދުނީ ކީއްވެކަމެއް މިހާތަނަށް ހާމަކޮށްފައެއް ނުވެއެވެ. އަދި ސިފައިން ހޯދަނީ ސެކިއުރިޓީގެ ކޮން މަސައްކަތެއް ކުރަން ކަމަށާއި، ސިފައިންގެ އަދަދުވެސް މިހާތަނަށް ގަތަރުގެ ސަރުކާރުން ހާމަކޮށްފައެއް ނުވެއެވެ. ނަމަވެސް ޑްރާފްޓް އެއްބަސްވުން ޕާކިސްތާނުގެ ސަރުކާރުން ފާސްކޮށްފައިވާކަން އެޤައުމުގެ އިންފޮމޭޝަން މިނިސްޓަރު ވަނީ ކަށަވަރުކޮށްދެއްވާފައެވެ.
ޕާކިސްތާނުގެ ބޮޑުވަޒީރު ޝަހްބާޒް ޝަރީފް އަންގާރަ ދުވަހު ވަނީ ގަތަރަށް ދަތުރުކުރައްވާފައެވެ. ޝާރީފް ގަތަރަށް ވަޑައިގެންނެވީ ދެދުވަހުގެ ދަތުރުފުޅެއްގައެވެ. މި ދަތުރުފުޅުގައި، ދޯހާގައި ހުންނަ ސްޓޭޑިިއަމްއަށް ވަޑައިގަތުމަށްވެސް ހަމަޖެހިފައިވެއެވެ.
