ޖޭއެސްސީއާއި އިންޑިއާއާ ދެމެދު ޝަރުއީ ދާއިރާގެ މުވައްޒަފުން ތަމްރީނު ކުރުމާގުޅޭ އެމްއޯޔޫގައި ސޮއިކޮށްފި
މިއީ ޝަރުއީ ދާއިރާއިން އެއްބާރުލުން ފޯރުކޮށްދިނުމާއި ގުޅޭ އެއްބަސްވުމެއް
ޖޭއެސްސީއާއި އިންޑިއާއާ ދެމެދު ޝަރުއީ ދާއިރާގެ މުވައްޒަފުން ތަމްރީނު ކުރުމާގުޅޭ އެމްއޯޔޫގައި ސޮއިކުރުން
ޖުޑީޝަލް ސަރވިސް ކޮމިޝަން (ޖޭއެސްސީ) އާއި އިންޑިއާއާ ދެމެދު ޝަރުއީ ދާއިރާގެ މުވައްޒަފުން ތަމްރީނު ކުރުމާގުޅޭ އެއްބަސްވުމެއްގައި ސޮއިކޮށްފިއެވެ.
އަންގާރަ ދުވަހު އޮތް ރަސްމިއްޔާތެއްގައި ޖޭއެސްސީގެ ފަރާތުން މި އެމްއޯޔޫގައި ސޮއި ކުރައްވާފައިވަނީ ޖޭއެސްސީގެ ރައީސް ހިސާން ހުސައިންއެވެ. އިންޑިއާ ސަރުކާރުގެ ފަރާތުން ސޮއިކުރެއްވީ އިންޑިއާއިން ރާއްޖެއަށް ކަނޑައަޅާފައި ހުންނަވާ އައު ސަފީރު މުނޫ މަހާވަރުއެވެ.
މިއީ ރާއްޖެއާއި އިންޑިއާއާ ދެމެދު އޮންނަ ނެއިބަރހުޑް ފަރސްޓް ޕޮލިސީގެ ދަށުން އަނެއްކާވެސް ކުރިއަށް ގެންދެވޭ އިތުރު މަސައްކަތެކެވެ. އެގޮތުން އިންޑިއާގެ ކެބިނެޓުން އެކަމަށް ހުއްދަ ދިނުމަށް ފާސްކޮށްފައިވަނީ މިދިޔަ ޖުލައި މަހުގެ ތެރޭގައެވެ.
މި އެއްބަސްވުމުގެ ދަށުން ކޯޓުތަކުގެ މަސައްކަތް އިތުރަށް ޑިޖިޓަލައިޒް ކުރުމާއި، އައިޓީގެ ދާއިރާއިން އިތުރަށް މަސައްކަތްތައް ފުޅާ ކުރެވިދާނެ ގޮތުގެ ތަމްރީނު ފޯރުކޮށްދިނުމަށް ގިނަ ކަންކަން ވަނީ ރޭވިފައެވެ. ޖޭއެސްސީން މައުލޫމާތު ދޭ ގޮތުގައި މި އެއްބަސްވުމުގެ ދަށުން ޖުޑީޝަރީގައި މަސައްކަތް ކުރާ މުވައްޒަފުން ތަމްރީނު ކުރުމަށް ވަނީ ހަމަޖެހިފައެވެ.
އެކަމާ ގުޅޭގޮތުން ޖޭއެސްސީން ބުނީ، އިންޑިއާއިން ކެނޑިނޭޅި ފޯރުކޮށްދެމުންދާ އެހީތެރިކަމަށް ޝުކުރު އަދާ ކުރާކަމަށެވެ. މި އެއްބަސްވުމުގައި ސޮއިކުރުން ވެގެންދާނީ މުޅި ޖުޑީޝަރީއަށްވެސް އިތުރު ފުރުސަތުތަކެއް ފަހިވެގެންދާނެ ކަމަކަށްކަން ޖޭއެސްސީން ފާހަގަކޮށްފައިވެއެވެ.
މި ރަސްމިއްޔާތުގައި ވާހަކަ ދައްކަވަމުން ޖޭއެސްސީގެ ރައީސް ހިސާން ހުސައިން ވަނީ ރާއްޖެއާއި އިންޑިއާ ސަރުކާރުގެ އިސް ވެރިންނަށް ޝުކުރު އަދާ ކުރައްވައި، މިފަދަ އެއްބަސްވުމެއްގެ މުހިއްމުކަމުގެ މައްޗަށް އަލިއަޅުވާލައްވާފައެވެ.
ހިސާން ވިދާޅުވީ، މި އެމްއޯޔޫގެ ސަބަބުން ގިނަ ފުރުސަތުތަކެއް ރާއްޖޭގެ ޝަރުއީ ދާއިރާއަށްވެސް ލިބިގެންދާ ކަމަށެވެ. މިއީ އިންޑިއާއާއެކު މިފަދައިން ވެވުނު ދެވަނަ އެއްބަސްވުންކަންވެސް ހިސާން ފާހަގަ ކުރެއްވިއެވެ.
މި ރަސްމިއްޔާތުގައި ދެއްކެވި ވާހަކަފުޅުގައި އިންޑިއާއިން ރާއްޖެއަށް ކަނޑައަޅާފައި ހުންނަވާ އައު ސަފީރު މުނޫ މަހާވަރު ވަނީ އެ ޤައުމުން އަބަދުވެސް ރާއްޖެއަށް އެހީތެރިކަން ފޯރުކޮށްދޭނެކަމަށް ވިދާޅުވެފައެވެ.
އިންޑިއާއާއި ރާއްޖެއާ ދެމެދު އޮންނަ ނެއިބަރހުޑް ފަރސްޓް ޕޮލިސީގެ ދަށުން އެ ޤައުމުން ގެންދަނީ އެކި ރޮނގުރޮނގުން ރާއްޖެއަށް އެހީތެރިކަން ފޯރުކޮށްދެމުންނެވެ. އެގޮތުން އިންޑިއާގެ "ނެއިބަރހުޑް ފަސްޓް ޕޮލިސީ" އަކީ އެ ގައުމުން ހާއްސަ އިސްކަމެއްދޭ ސިޔާސަތެއް ކަމަށާއި މި ސިޔާސަތުގެ ދަށުންވެސް އެންމެ އިސްކަމެއް ދެނީ ރާއްޖެއަށް ކަމަށް އިންޑިއާ ސަރުކާރުން ވަނީ ބުނެފައެވެ.
އޭގެ އިތުރުން، ރާއްޖެއިން އިންޑިއާގެ އެހީތެރިކަން ބޭނުންވާ ކޮންމެ ދަނޑިވަޅެއްގައި އެހީތެރިކަން ފޯރުކޮށްދިނުމަށް އިންޑިއާއިން އޮންނާނީ ތައްޔާރަށް ކަމަށް އެ ޤައުމުން ވަނީ ބުނެފައެވެ.
