އާ ސީޒަނަށް ރަނގަޅަށް ތައްޔާރުވި އާސެނަލްއިން ލީގުގައި ކުޅުނު ތިންވަނަ މެޗުގައި މާޓިން އޮޑެގާޑް ތަފާތު ދައްކައިފިއެވެ.

3-0 ން ބޯންމައުތް އަތުން މޮޅުވި މެޗުގައި އޮޑެގާޑް ވަނީ ފުރަތަމަ އެގާރަ މިނެޓުގެ ތެރޭގައި ދެ ލަނޑު ޖަހާފައެވެ. އާސެނަލްގެ ފުރަތަމަ ދެ ލަނޑު ޖަހާ ކުރި ހޯދައިދިނީ އޮޑެގާޑެވެ. ދެވަނަ ލަނޑު ޖެހީ ޖިސޫސް ތަނަވަސްކޮށްދިން ފުރުޞަތަކުންނެވެ. އާސެނަލްގެ ތިންވަނަ ލަނޑު ދެވަނަ ހާފްގައި ޖެހީ ވިލިއަމް ސަލިބާއެވެ. މެޗުގައި ޖިސޫސްވެސް މޮޅު ލަނޑެއް ޖެހިއެވެ. އެކަމަކު ވީއޭއާރުން ބެލުމަށްފަހު ނިންމީ އޮފްސައިޑްކަމަށެވެ.

މިއީ 2004-2005 ވަނަ އަހަރުގެ ސީޒަންގެ ފަހުން ލީގުގައި ފުރަތަމަ ތިން މެޗުން އާސެނަލް މޮޅުވި ފުރަތަމަ ފަހަރެވެ. ތިން މެޗުންވެސް މޮޅުވެ އާސެނަލް އެއްވަނާގައި އޮތީ ނުވަ ޕޮއިންޓާއެކުއެވެ.