ޕެލަސް ކައިރިން އެއްވަރުވި މެޗަށް ފަހު، ލިވަޕޫލް އިން ލީގު ތަށި އުފުލާލައިފި

އިނގިރޭސި ޕްރިމިއާ ލީގުގެ މި ސީޒަންގެ ފަހު މެޗުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން ޗެމްޕިއަން ލިވަޕޫލް އެއްވަރުވެއްޖެ އެވެ.

ލިވަޕޫލްގެ އަމިއްލަ ދަނޑު، އެންފީލްޑުގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޕެލަސް އިންނެވެ. ނަމަވެސް ލިވަޕޫލް އިން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ނުވަ ވަނަ މިނެޓުގައި ޕެލަސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް އެ ލަނޑު ޖަހައިދިނީ އިސްމާއިލާ ސާ އެވެ. އޭނާ އެ ލަނޑު ޖެހީ ޓްރިކް މިޗެލް ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފުގައި ލިވަޕޫލް އަށް އެންމެ ބޮޑު ގެއްލުމެއް ދެއްކީ 68 ވަނަ މިނެޓުގައި އެ ޓީމުގެ ރަޔާން ގްރަވެންބާކް އަށް ދެ ވަނަ ރީނދޫ ކާޑާ އެކު ރަތް ކާޑު ދައްކައި ދަނޑުން ފޮނުވާލުމުންނެވެ. މެޗުގެ ބާކީ ބައި ލިވަޕޫލް އިން ފުރިހަމަ ކުރީ އެއް ކުޅުންތެރިޔަކު މަދު ކޮށެވެ.

މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ލިވަޕޫލަށް ނަތީޖާ ހަމަހަމަ ކޮށްދިނީ މި ސީޒަންގެ ޕްރިމިއާ ލީގުގެ މޮޅު ކުޅުންތެރިޔާގެ އެވޯޑު ވެސް ހޯދި މިޞްރުގެ ފޯވާޑް މުޙައްމަދު ޞަލާޙު އެވެ. އޭނާ އެ ލަނޑު ޖެހީ ކޯޑީ ގަކްޕޯ ތަނަވަސްކޮށްދިން ފުރުސަތެއްގަ އެވެ.

ޕެލަސްއާ ދެކޮޅަށް އަމިއްލަ ދަނޑުގައި ކުޅުނު މެޗަށް ފަހު ލިވަޕޫލް އަށް ވަނީ ލީގު ޗެމްޕިއަން ތަށި ހަވާލު ކޮށްފަ އެވެ. މިއީ ލިވަޕޫލް އިން އެ ޓީމުގެ ތާރީޚުގައި ވެސް އިނގިރޭސި ޕްރިމިއާ ލީގު ކާމިޔާބު ކުރި 20 ވަނަ ފަހަރެވެ. މިފަހަރުގެ ލީގު ކާމިޔާބުކޮށް ލިވަޕޫލް އިން ވަނީ މެންޗެސްޓަރ ޔުނައިޓެޑާ ހަމަ ކޮށްފަ އެވެ.

އަނެއްކޮޅުން މިއީ ލިވަޕޫލްގެ ކޯޗުކަމާ މި ސީޒަންގައި ހަވާލުވި އާން ސްލޮޓްގެ އިރުޝާދުގެ ދަށުން އެ ޓީމުން އުފުލާލި ފުރަތަމަ ތައްޓެވެ.

މިއީ 1990 ވަނަ އަހަރުގެ ފަހުން ލިވަޕޫލް އިން އިނގިރޭސި ޕްރިމިއާ ލީގު ކާމިޔާބު ކުރި ދެ ވަނަ ފަހަރެވެ. މީގެ ކުރިން އެ ޓީމުން ވަނީ 2020 ވަނަ އަހަރު ވެސް ލީގު ޗެމްޕިއަންކަން ހޯދައިފަ އެވެ. އެ ފަހަރު ލިވަޕޫލް އިން ލީގު ކާމިޔާބު ކުރީ 30 އަހަރު ފަހުންނެވެ.