އެމްޑީޕީ ދެ ފަޅިވެގެން ދިޔައީ ކުރީގެ ރައީސް ނަޝީދު އެމްޑީޕީގައި ހުރުމަށް ނޭދޭ ބަޔަކު އެމްޑީޕީ އަށް އައުމުން - ދޮންބިލެތް ހަލީމް
ކުރިމަގު އޮތީ އަދިވެސް އެމްޑީޕީ އާއި އެކުގައި ކަމަށް އޭނާ ވަނީ ވިދާޅުވެފަ
މަޖިލީހުގެ ބިލެތްދޫ ދާއިރާގެ ކުރީގެ މެމްބަރު އަހުމަދު ހަލީމް (ދޮންބިލެތް ހަލީމް)
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ދެ ފަޅިވެގެން ދިޔައީ ކުރީގެ ރައީސް ނަޝީދު އެމްޑީޕީގައި ހުރުމަށް ނޭދޭ ބަޔަކު އެމްޑީޕީ އަށް އައުމުން ކަމަށް ރައްޔިތުންގެ މަޖިލީހުގެ ބިލެތްދޫ ދާއިރާގެ ކުރީގެ މެމްބަރު އަހުމަދު ހަލީމް (ދޮންބިލެތް ހަލީމް) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
އެމްޑީޕީގައި ކުރީގެ ރައީސް ނަޝީދު ހުންނަން ނޭދޭ ބަޔަކު އެމްޑީޕީ އަށް އައުމަށް ފަހު އެ މީހުންގެ މަސައްކަތަކަށް ވީ އެމްޑީޕީން އެމަނިކުފާނު ދުރުކުރުން ކަމަށް ހަލީމް ވިދާޅުވިއެވެ. އެފަދަ މީހުންގެ ތެރޭގައި އެމްޑީޕީ މެދުވެރިކޮށް ރައީސްކަމަށް ކުރިމަތިލާން ބޭނުންވާ މީހުން ތިބި ކަމަށް ވެސް އޭނާ ވިދާޅުވިއެވެ. ކުރީގެ ރައީސް ނަޝީދު އެމްޑީޕީގައި ހުރި ނަމަ އެކަން ވެގެންދާނީ ކުރަން އުނދަނގޫ ކަމަކަށް ކަމަށާއި އެ މަނިކުފާނު ޕާޓީން ދުރުކުރަން ބަޔަކު ބޭނުންވި ސަބަބަކީ އެއީ ކަމަށް ހަލީމް ވަނީ ވިދާޅުވެފައެވެ. އެެހެންކަމުން އެމްޑީޕީ ދެ ބަައިވީ ކުރީގެ ރައީސް ނަޝީދުގެ އެކަނި ރޭވުމަކުން ކަމަށް ބުނެވެން ނެތް ކަމަށް އޭނާ ވަނީ ވިދާޅުވެފައެވެ.
މީގެ އިތުރުން ކުރީގެ ރައީސް އިބްރާހިމް މުހައްމަދު ޞާލިހު އާއި ކުރީގެ ރައީސް ނަޝީދާއި ދެ ބޭފުޅުންނަކީ ވަރަށް ކުޑަ އިރުން ފެށިގެން އެއްކޮށް އުޅުއްވި ބޭފުޅުން ކަމަށާއި، ސިޔާސީ މަސައްކަތުގައި ވެސް ދެ ބޭފުޅުން އުޅުއްވީ އެކުގައި ކަމަށް އެ މަނިކުފާނު ވިދާޅުވިއެވެ. އެ ދެ ބޭފުޅުންގެ ގާތްކަން ސިފަކުރައްވާ ހަލީމް ވިދާޅުވީ ވަލެއްގެ އެއްކޮޅުގައި ކުރީގެ ރައީސް ނަޝީދު ހިއްޕެވިއްޔާ އަނެއްކޮޅުގައި ކުރީގެ ރައީސް ޞާލިހު ހިއްޕަވާނެ ކަމަށެވެ. އެހާވެސް އެ ދެބޭފުޅުންނަކީ އެކުވެރި ދެ ބޭފުޅުން ކަމަށް ހަލީމް ވަނީ ސިފަކުރައްވާފައެވެ. އަދި ވެރިކަމަށް ކުރީގެ ރައީސް ޞާލިހު ގެންނެވުމުގައި ވެސް ކުރީގެ ރައީސް ނަޝީދުގެ ދައުރު ވަރަށް ފުޅާކަމަށް އޭނާ ވަނީ ވިދާޅުވެފައެވެ.
އެމްޑީޕީ އަކީ އަލަށް އަންނަ މީހުންނަށް ވެސް ފުރުސަތު ބޮޑު ޕާޓީއެއް ކަމަށާއި އެމްޑީޕީގެ ޚާއްސަ ކަމަކީ ވެސް އެއީ ކަމަށް އޭނާ ވިދާޅުވިއެވެ. އެހެންނަމަވެސް އެކަން އެހެން އޮތުމުން އެމްޑީޕީގެ އާއިލާގައި ނުހިމެނޭ، އެމްޑީޕީ އުފެއްދުމުގެ މަސައްކަތުގައި ނޫޅޭ ޕާޓީގެ ވިސްނުމާއި ދުރު މީހުންނަށް ކުރީގެ ރައީސް ޞާލިހުގެ އަރިހުގައި ޕާތީ ބައިވި އިރު ތިބެން ފުރުސަތު ލިބުނު ކަމަށް އޭނާ ވިދާޅުވިއެވެ. ހަލީމް އެހެން ވިދާޅުވި ނަމަވެސް އެއީ ކޮން ބައެއްކަން ފާހަގައެއްް ނުކުރައްވައެވެ. އޭނާ ވަނީ އެމްޑީޕީގެ ކުރިމަގާއި މެދުގައި ވެސް ވާހަކަދައްކަވާފައެެވެ. ޕާޓީ އާއި މެދު ހިތްހަމަޖެހިވަޑައިނުގެން އެމްޑީޕީ ދޫކޮށް ދިޔަ ލީޑަރޝިޕްގެ ބޭފުޅުންނާއި، ޕާޓީގެ ނަގާކީ މީހުން އަނބުރާ ޕާޓީ އަށް އަންނަން ޖެހޭ ކަމަށާއި ކުރިމަގު އޮތީ އަދިވެސް އެމްޑީޕީ އާއި އެކުގައި ކަމަށް އޭނާ ވަނީ ވިދާޅުވެފައެވެ.
