ޒުބިމެންޑީ އާސެނަލަށް ބަދަލުވެއްޖެ

ރެއާލް ސޮސިއެޑާޑަށް ކުޅެމުން އައި ސްޕެއިންގެ ޑިފެންސިވް މިޑްފީލްޑަރު މާޓިން ޒުބިމެންޑީ، އާސެނަލަށް ބަދަލުވެއްޖެ އެވެ.

އުމުރުން 26 އަހަރުގެ ކުޅުންތެރިޔާ އާސެނަލަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން، އާސެނަލާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ.

ޒުބިމެންޑީ ހޯދުމަށް އާސެނަލް އިން ވަނީ 65 މިލިއަން ޔޫރޯގެ އަދަދެއް ސޮސިއެޑާޑަށް ދައްކައިފަ އެވެ. އޭނާ އާސެނަލަށް ބަދަލުވީއިރު، މިއަހަރުގެ މެއި މަހުން ފެށިގެން އާސެނަލް އިން ވަނީ ޒުބިމެންޑީ ހޯދުމުގެ މަސައްކަތް ކޮށްފަ އެވެ.

ޒުބިމެންޑީ އާސެނަލަށް ބަދަލުވީއިރު، އޭނާ ހޯދުމުގެ ބައެއް އެހެން ކުލަބުތަކުން ވެސް މަސައްކަތް ކުރި އެވެ. އެގޮތުން ޖަރުމަނުގެ ބަޔާން މިއުނިކް އަދި އިނގިރޭސި މެންޗެސްޓަރ ޔުނައިޓެޑުން ވެސް ޒުބިމެންޑީ ހޯދުމުގެ މަސައްކަތް ކުރި ކަމަށް މީޑިއާ ތަކުގައި ވަނީ ބުނެފަ އެވެ.

ސޮސިއެޑާޑް އިން ސީނިއާ ކެރިއަރު ފެށި ޒުބިމެންޑީ ވަނީ، އެ ކުލަބަށް ކުޅެދިން 236 މެޗުގައި 10 ލަނޑު ޖަހައިފަ އެވެ. ސޮސިއެޑާޑާ އެކު އޭނާ ވަނީ ކޮޕާ ޑެލް ރޭ ފުޓުބޯޅަ މުބާރާތް ވެސް ކާމިޔާބު ކޮށްފަ އެވެ. އާސެނަލް އިން ދިގު މުއްދަތެއްގެ އެއްބަސްވުމެއްގެ ދަށުން ޒުބިމެންޑީ ހޯދިއިރު، މިއީ އައު ސީޒަނަށް ތައްޔާރުވުމަށް އާސެނަލް އިން ހޯދި ދެ ވަނަ ކުޅުންތެރިޔާ އެވެ.

މީގެ އިތުރުން، ޒުބިމެންޑީ އަންނަނީ ސްޕެއިންގެ ޤައުމީ ޓީމަށް ވެސް ކުޅެމުންނެވެ. އޭނާ ވަނީ މިހާތަނަށް ސްޕެއިންގެ ސީނިއާ ޤައުމީ ޓީމަށް ކުޅެދިން 19 މެޗުގައި ދެ ލަނޑު ޖަހައިފަ އެވެ. ސްޕެއިން އާއެކު އޭނާ ވަނީ ޔޫރޯ ފުޓުބޯޅަ މުބާރާތުގެ އިތުރުން، ޔުއެފާ ނޭޝަންސް ލީގު ވެސް ކާމިޔާބު ކޮށްފަ އެވެ.