ރައީސް ބައިޑްން އަށް އޭނާގެ ނައިބަކީ ޓްރަމްޕް ކަމަށާއި، ޔޫކްރެއިންގެ ރައީސް އަކީ ޕޫޓިން ކަމަށް ވިދާޅުވެވިއްޖެ

އުމުރުފުޅުގެ ސަބަބުން އެމެރިކާގެ ރައީސް ޖޯ ބައިޑްންގެ ރިޔާސީ ކެންޑިޑެސީ އާ މެދު ބައިޑްންގެ ސަޕޯޓަރުންނާއި އޭނާގެ ޕާޓީގެ އިސްފަރާތްތަކުގެ މެދުގައި ނުތަނަވަސްކަން އުފެދިފައިވަނިކޮށް ބުރާސްފަތި ދުވަހު ވިދާޅުވި ވާހަކަ ތަކެއްގައި ޖެހިޖެހިގެން ވަރަށް ގިނަ ގޯސްތަކެއް ހެއްދެވިއްޖެއެވެ.

ހުސްވި މަހު އެމެރިކާގެ ކުރީގެ ރައީސް ޑޮނަލްޑް ޓްރަމްޕް އާ އެކު ބައިޑްން ކުރެއްވި ބަހުސްގައި ބައިޑްންގެ ޕާފޯމަންސާ މެދު ފާޑު ކިޔުން އިތުރުވެފައިވާ ދަނޑިވަޅެއްގައި، އުމުރުފުޅުން 81 އަހަރުގެ ބައިޑްން އަށް ވިދާޅުވެވުނު މި ވާހަކަ ތަކާއެކު ޑިމޮކްރަޓިކް ޕާޓީއަށް ނިސްބަތްވާ ބައެއް ސެނެޓަރުން ވަނީ ބައިޑްން އަށް ރިޔާސީ ރޭސް މި ހިސާބުން ނިންމާލައްވަން ގޮވާލާފައެވެ.

ވޮޝިންގޓަން ގައި ބުރާސްފަތި ދުވަހު ނޭޓޯ ސަމިޓްގައި ބައިވެރިވެ ވަޑައިގެންނެވި ގައުމުތަކުގެ ވެރިންނާ އެކު ބޭއްވެވި ނޫސް ކޮންފަރެންސްގައި، ޔޫކްރެއިންގެ ރައީސް ވުލެޑިމިއަރ ޒެލެންސްކީ ތައާރުފް ކޮށްދެވުމުގެ ގޮތުން ޒެލެންސްކީގެ ބަދަލުގައި ބައިޑްން އަށް ވިދާޅުވެވުނީ ޕުޓިން އެވެ.

ބައިޑްން އަށް މި ވިދާޅުވެވުނީ ގޯސް ނަމެއްގައި ވިސްނިވަޑައިގެން އެކަން ރަނގަޅު ކޮށްލެވުމަށް ޒެލެންސްކީގެ ނަން ވިދާޅުވުމަށް ފަހު ވިދާޅުވީ، ރައީސް ޕުޓިން ބަލި ކުރައްވަން އެނާ އަށް މާ ބޮޑަށް ފޯކަސް ކުރެއްވެނީ ކަމަށެވެ.

މިކަން މިހެން ހިނގާފައި ވަނިކޮށް ބުރާސްފަތި ދުވަހުގެ ހަވީރު ބައިޑްން ވަކިން ބޭއްވެވި ނޫސްވެރިންގެ ބައްދަލުވުމެއްގައި، ނޫސްވެރިއަކު ކުރި ސުވާލަކަށް ޖަވާބު ދެއްވަމުން އޭނާގެ ނައިބު ރައީސް ކަމަލާ ހެރިސް ގެ ނަން ވިދާޅުވުމުގެ ބަދަލުގައި ނައިބު ރައީސް ކަމަށް ވިދާޅުވެވުނީ އިންތިޚާބުގައި ބައިޑްން އާ ވާދަވެރި ފަރާތް ކަމުގައިވާ ޓްރަމްޕްގެ ނަމެވެ.

ހަމަ އެ ނޫސްކޮންފަރެންސް ގައި ޗީފް އޮފް ސްޓާފް ވިދާޅުވާން ވަރަށް އުނދަގުލުގައި ބައިޑްން އުޅުއްވި މަންޒަރު ފެނުނެވެ.

އެންމެ ފަހުން ޗީފް އޮފް ސްޓާފް ވިދާޅުވާން އުޅެ ބައިޑްން އަށް ވިދާޅުވެވުނީ ކޮމާންޑަރ އިން ޗީފް އެވެ. ކޮމާންޑަރ އިން ޗީފް އަކީ ޚުދު ރައީސް ބައިޑްންކަން އޮޅި ވަޑައިގެން އޭނާ އަށް ވިދާޅުވެވުނީ އެމެރިކާގެ އަސްކަރިއްޔާ އިން ގެންދަނީ އޭނާގެ ކޮމާންޑަރ އިން ޗީފްގެ ލަފާ ހޯދަމުން ކަމުގައެވެ.