އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން ޔުއެފާ ޗެމްޕިއަންސް ލީގުން ފުރުސަތު ހޯދުމުގެ އުންމީދު ބޮޑު ކޮށްފި އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ސިޓީން ވަނީ ދެ ލަނޑު ޖަހައިފަ އެވެ. ދެ ވަނަ ހާފުގައި އެ ޓީމުން ތިން ވަނަ ލަނޑެއް ޖެހިއިރު، ބޯންމައުތުން ވަނީ ލަނޑެއް ޖަހައިފަ އެވެ.

މެޗު ފަށައިގެން 14 ވަނަ މިނެޓުގައި ސިޓީ އަށް ލީޑު ނަގައިދިނީ އޮމަރު މާމޫޝް އެވެ. އެ ލަނޑު އޭނާ ޖެހީ މަތެއޯ ކޮވަސިޗް ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން ފުރަތަމަ ހާފުގެ 38 ވަނަ މިނެޓުގައި ބެނާޑޯ ސިލްވާ ވަނީ ސިޓީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އިލްކާއީ ގުންޑޮގާން އެވެ.

މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ސިޓީގެ ތިން ވަނަ ލަނޑު ޖެހީ ނިކޮލަސް ގޮންޒާލޭސް އެވެ. އެއީ މަތެއުސް ނޫނެސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބޯންމައުތުގެ ހަމައެކަނި ލަނޑު ޖެހީ ޑޭން ޖެބިސަން އެވެ.

މޮޅާއެކު ސިޓީ ލީގު ތާވަލްގެ ތިން ވަނައިގައި އޮތީ މިހާތަނަށް އެ ޓީމު ކުޅެފައިވާ 37 މެޗުން 68 ޕޮއިންޓާ އެކު އެވެ. ހަތަރު ވަނައިގައި އޮތް ނިއުކާސަލް ޔުނައިޓެޑާއި، ފަސް ވަނައިގައި އޮތް ޗެލްސީ އަދި ހަ ވަނައިގައި އޮތް އެސްޓަން ވިލާ އަށް ލިބެނީ 66 ޕޮއިންޓެވެ.

ލީގުގައި ދެން ސިޓީ އަށް އޮތީ ރަށުން ބޭރުގައި ފުލަމްއާ ދެކޮޅަށް ކުޅޭ މެޗެވެ. އެ މެޗުން ބަލި ނުވެ ފަރު ޖައްސާލައިގެން ސިޓީ އަށް ޗެމްޕިއަންސް ލީގުގެ ޖާގަ ހޯދުމުގެ ފުރުސަތު އެބަ އޮތެވެ.