އިނގިރޭސި ޕްރިމިއާ ލީގުގެ މި ސީޒަންގެ އެންމެ މޮޅު ކުޅުންތެރިޔަކަށް، ޗެމްޕިއަން ލިވަޕޫލަށް ކުޅެމުން އަންނަ މިސްރުގެ މުޙައްމަދު ޞަލާޙު ހޮވިއްޖެ އެވެ.

މިއީ ޞަލާޙު އަށް ޕްރިމިއާ ލީގުގެ މޮޅު ކުޅުންތެރިޔާގެ އެވޯޑު ލިބުނު ދެ ވަނަ ފަހަރެވެ. މީގެ ކުރިން އޭނާ ވަނީ 2017/18 ވަނަ ސީޒަންގައި ވެސް ޕްރިމިއާ ލީގުގެ މޮޅު ކުޅުންތެރިޔާގެ އެވޯޑު ހާސިލު ކޮށްފަ އެވެ.

މި ސީޒަންގެ މޮޅު ކުޅުންތެރިޔަކަށް ޞަލާޙު ހޮވުމާ އެކު، އޭނާ ވަނީ ދެ ފަހަރު މި އެވޯޑު ހޯދާފައިވާ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަދި ތިއަރީ އޮންރީ، ނެމަންޖާ މަޓިކް އަދި ކެވިން ޑި ބްރޭނާއާ ހަމަކޮށްފަ އެވެ.

ލިވަޕޫލާ އެކު ސޮއި ކޮށްފައިވާ އެއްބަސްވުން ޞަލާޙު އައު ކޮށްފައިވާއިރު، އަންނަ ސީޒަންގެ މޮޅު ކުޅުންތެރިޔާގެ އެވޯޑު ހޯދައި، ތިން ވަނަ ފަހަރަށް އެ އެވޯޑު ހޯދި ކުޅުންތެރިޔާގެ ޝަރަފު ހޯދުމުގެ ފުރުސަތު އޭނާ އަށް މިހާރު އެބަ އޮތެވެ.

ޞަލާހު ވަނީ މި ސީޒަންގެ ޕްރިމިއާ ލީގުގައި ލިވަޕޫލަށް ކުޅެދިން 37 މެޗުގައި 28 ލަނޑު ޖަހައިފަ އެވެ. ލީގުގެ ފަހު މެޗުގައި އާދީއްތަ ދުވަހުގެ ރޭ ލިވަޕޫލް އިން ކްރިސްޓަލް ޕެލަސްއާ ދެކޮޅަށް ނިކުންނައިރު، ރަން ބޫޓު ހޯދުމުގެ ފުރުސަތު ވެސް ޞަލާޙު އަށް އެބަ އޮތެވެ.

ލިވަޕޫލް އިން މި ސީޒަންގެ ޕްރިމިއާ ލީގު ކާމިޔާބު ކޮށްފައިވާއިރު، ޞަލާޙު އަކީ އެެ ކާމިޔާބީގައި އެންމެ ބޮޑު ހިއްސާއެއް އަދާ ކޮށްފައިވާ އެއް ކުޅުންތެރިޔާ އެވެ.

މި ސީޒަންގެ ނިޔަލަށް ލިވަޕޫލާ އެކު ޞަލާޙު ސޮއި ކޮށްފައި އޮތް އެއްބަސްވުމުގެ މުއްދަތު ހަމަވާން އޮތްއިރު، އޭނާގެ ކުރިމަގާ ގުޅޭ ގޮތުން ވެސް އޭރު ގިނަ ސުވާލުތަކެއް އެފެދުނެވެ. ނަމަވެސް، ގިނަ މަޝްވަރާތަކަށް ފަހު ޞަލާޙު ވަނީ ލިވަޕޫލްގެ އެއްބަސްވުން އައު ކޮށްފަ އެވެ.

ލިވަޕޫލާ އެކު ޞަލާޙު ވަނީ ދެ އަހަރު ދުވަހުގެ އެއްބަސްވުމެއްގައި ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2017 ވަނަ އަހަރުގެ ޖޫން މަހުގެ ނިޔަލަށެވެ.