ހާމައަށް މާރާމާރީ ހިންގާއިރު ބަލައިގެން ވީޑިއޯ ކުރުމުގައި!

ރާއްޖޭގައި މިހާރު ދެ ދުވަހުން އެއް ދުވަހު އަޑު އިވެނީ މާރާމާރީ ހިންގައިގެން އުޅޭ ވާހަކައެވެ. ކޮންމެ ވެސް މީހަކަށް ތޫނު އެއްޗަކުން ނުވަތަ ހަތިޔާރަކުން ހަމަލާދިން ވާހަކައެވެ. މިފަދަ ކަމެއް ހިނގައިފިނަމަ ނޫސްތަކުގެ ފަލަސުރުޙީތަކަށް އެރުމުގެ ކުރިން ސޯޝަލް މީޑިއާގެ ޒަރީއާއިން އެ މަންޒަރު ލައިވްކޮށް ކޮންމެ މީހަކަށް ވެސް ބަލައިލެވެއެވެ. އަނިޔާވެރި އެ މަންޒަރުތައް ވީޑިއޯކޮށް ސޯޝަލް މީޑިއާ ދޫކޮށްލާއިރު ފެނިގެންދަނީ ހިތާމަވެރި މަންޒަރުތަކެކެވެ. އެންމެންގެ ކުރިމަތީގައި ހާމައަށް މީހަކަށް ހަމަލާދޭއިރު އާއްމުން ކުޅި ބަލަން ތިބޭ މަންޒަރެވެ.

ރޯމާ ދުވާލު މަގުމަތީގައި މީހުންނަށް އަނިޔާކުރާ މަންޒަރުތައް ފެންނަ ވީޑިއޯތައް ސޯޝަލް މީޑިއާގައި އާއްމުވަމުންދާއިރު ކޮންމެ ވީޑީއޯއަކުން ވެސް މި މަންޒަރުތައް ފެނެއެވެ. މާރާމާރީ ހިންގާތީ އެ ސަރަހައްދުން އުޅަނދު ދުށްވަން ދަތިވުމުން މަޑުކޮށްލައިގެން ތިބެނީއެވެ. އަނިޔާކޮށް ނިމޭނެ ވަގުތެއްގެ އިންތިޒާރުގައެވެ. އެ މާރާމާރީ ނިމި ޓްރެފިކް ރަނގަޅުވުމުން ދާން ބޭނުންވާ ތަނަކަށް ދެެވޭނެ އިންތިޒާރުގައެވެ. ކުރިމަތިން ފެންނަ މަންޒަރަކީ "އާއްމު" ކަމެއް ކަމަށް ބަލައި އަޅާވެސް ނުލަނީއެވެ. އެއްބަޔަކު މި އިންތިޒާރުގައި ތިބޭއިރު އަނެއްބަޔަކު އަވަސް ވެގަންނަނީ އެ މަންޒަރު އަވަހަށް ވީޑިއޯކޮށް، ސޯޝަލް މީޑިއާއަށް ދޫކޮށްލުމަށެވެ.

މިފަދަ ވީޑިއޯތައް ސޯޝަލް މީޑިއާގައި އާއްމުވުމުން ވީޑިއޯތަކަށް ކޮމެންޓު ކުރާ ފަރާތްތަކުން މަންޒަރު ބަލަން ތިބޭ މީހުންނަށާއި ވީޑިއޯ ކުރާ މީހުންނަށް ފާޑު ކިޔައެވެ. އެފަދަ ލާއިންސާނީ އަމަލެއް ލޯ ކުރިމަތީގައި ހިނގަމުންދާއިރު ހުއްޓުވާނެ މީހަކު ނެތީތޯ ސުވާލު އުފައްދައެވެ. މަންޒަރު ބަލަން ތިބޭ މީހުން ސިފަވަނީ ސިނަމާގައި ފިލްމެއްގެ ވަރުގަދަ ތަޅާލުންގަޑެއް ބަލައިލަން ތިބި ބައެއްގޮތުގައި ކަމަށް ވެސް ބުނެއެވެ.

މިގޮތަށް ކޮމެންޓު ކުރާ ފަރާތްތަކަށް ރައްދު ދޭ މީހުން ވެސް މަދެއް ނޫނެވެ. ރައްދުގެ ގޮތުގައި ގިނަ ފަހަރު ބުނަނީ އެފަދަ ކަމެއް ހުއްޓުވަން އުޅެފިނަމަ ވާނެ ގޮތް އެނގޭތީ އެކަން ހުއްޓުވަން ކައިރިވާން މީހުން ޖެހިލުންވަނީ ކަމަށެވެ. ގިނަ ފަހަރު މިގޮތަށް ހިންގާ މާރާމާރީތަކަކީ ދެ ގްރޫޕެއްގެ ދެމެދުގައި ހިންގާ މާރާމާރީތައް ކަމުން އޭގެ ތެރެއަށް ވަނުމަކީ އެންމެ ބުއްދިވެރި ގޮތް ނޫން ކަމަށް ބުނާ މީހުން ވެސް މަދެއް ނޫނެވެ.

ވީޑިއޯ ކުރާ ފަރާތްތަކަށް ކިޔާ ފާޑުކިޔުމުން ދޭ ޖަވާބުތަކަކީ އެ މީހުން ވީޑިއޯކޮށް، އެ ވީޑިއޯތައް ސޯޝަލް މީޑިއާއަށް ދޫކުރުމުން އެ މާރާމާރީ ހިންގާ މީހުން ހޯދުމަށް ފުލުހުންނަށް ފަސޭހަވާނެ ކަމެވެ. އަދި އަމިއްލައަށް އެކަން ހުއްޓުވަން ނުކެރޭތީ އެހެން ގޮތަކުން އިންސާފު ހޯދައިދޭން ކުރާ ކަމެއް ކަމަށް ވެސް ވީޑިއޯކޮށް ސޯޝަލް މީޑިއާއަށް ދޫކޮށްލާ ފަރާތްތަކުން ބުނެއެވެ. އަދި ވީޑިއޯ ސޯޝަލް މީޑިއާއަށް އާއްމު ކުރުމުން ފުލުހުންގެ ސަމާލުކަމަށް އެކަން އައުން ވެސް މާ އަވަސް ކަމަށް ބައެއް މީހުން ބުނެއެވެ.

ވީޑިއޯކޮށް ސޯޝަލް މީޑިއާއަށް އެ ވީޑިއޯތައް ދޫކޮށްލެވެނީ ހެޔޮ ނިޔަތެއްގައި ކަމަށް ތިމާއަށް ގަބޫލު ކުރެވުނު ނަމަވެސް އެއީ އެފަދަ އަނިޔާވެރި ކަންކަމަށް ލިބޭ ހިތްވަރަކަށް ވެދާނެއެވެ. މިފަދަ މަންޒަރުތައް ފެނުމުން މީހުންގެ މެދުގައި ބިރުވެރިކަން އުފެދުމުގެ ފުރުސަތު ބޮޑުވެ، މާރާމާރީ ހިންގާ ފަރާތްތަކަށް އެކަން ކުރުމުގައި ޖެހިލުން ކުޑަވެގެންދެއެވެ. އެހެން ގޮތަކަށް އިންސާފު ހޯދައިދޭން ވީޑިއޯ ކުރާނަމަ އެ ވީޑިއޯ ސޯޝަލް މީޑިއާއަށް ދޫކޮށްލުމުގެ ބަދަލުގައި އެ ވީޑިއޯ ހަވާލު ކުރަންވީ ކަމާ ބެހޭ ފަރާތްތަކާއެވެ.

ރާއްޖޭގައި މާރާމާރީ "ނޯމަލައިޒް" ކުރެވެނީ އެކަން ކުރިމަތީގައި ހިނގާއިރު ހުއްޓުވާނެ ބަޔަކު ނެތުމުން ކަަމަށާއި ފުލުހުންނަށް އެކަންކަން ހުއްޓުވަން މަސައްކަތް ނުކުރެވޭތީ ކަމަށް ގިނަ ބަޔަކު ދެކެއެވެ.