ރާއްޖޭގައި އެއްފަހަރާ ބޭނުންކޮށް، އުކާލާ ޕާލްސްޓިކް ބޭނުންކުރުން މަދުކުރުމަށް ގިނަ ފިޔަވަޅުތަކެއް ދަނީ އަޅަމުންނެވެ. އެގޮތުން، 18 އޭޕްރިލް 2023 ވަނަ ދުވަހުން ފެށިގެން "ކުނި މެނޭޖްކުރުގެ ޤާނޫނު" ގެ ދަށުން، ވިޔަފާރިތަކުން ފޯރުކޮށްދޭ ކޮންމެ ޕްލާސްޓިކް ކޮތަޅެއްގެ ފީގެ ގޮތުގައި 2 ރުފިޔާ ނަގަން ވަނީ ފަށައިފައެވެ. މި ފީ ނަގަން ފެށުމުން ގިނަ ބައެއްގެ ކަންބޮޑުވުންތައް ހުރި ނަމަވެސް އެ ބަދަލުގެ ރަނގަޅު ނަތީޖާ މިހާރުވެސް ވަނީ ފެންނަން ފަށައިފައެވެ.

މީގެ ކުރިން ފިހާރައަކަށް ގޮސް ކިތަންމެ ކުޑަ އެއްޗެއް ގަތްކަމުގައި ވިޔަސް އެ ލާން ޕްލާސްޓިކް ކޮތަޅެއް ހޯދައެވެ. ގެއަށް ބޭނުންވާ ކާބޯތަކެތި ގަނެގެން ގެއަށް އަންނަނީ ތިން ހަތަރު ޖަންބޯ ޕްލާސްޓިކް ކޮތަޅު ހިފައިގެންނެވެ. ނަމަވެސް މިއަދު އެ މަންޒަރު ތަފާތުވެއްޖެއެވެ. މިއަދު ވިޔަފާރި ކުރަންދާނަމަ ގިނަ މީހުން ދަނީ ގެއިން ފޮތި ކޮތަޅެއް ހިފައިގެންނެވެ. ނުވަތަ ކޮތަޅަކަށް ނުލާ ގެންދެވޭ ގޮތަށް ހުރި އެއްޗެއްނަމަ ކޮތަޅެއް ބޭނުން ނުކުރެއެވެ.

ގިނަ ވިޔަފާރިތަކުން ޕްލާސްޓިކް ކޮތަޅުތައް ބޭނުންކުރުން އެއްކޮށްހެން ހުއްޓާލައިފިއެވެ. ކައުންޓަރު ކައިރީގައި ކުރިން ފުނި ޖަހާފައި ހުރި ޕްލާސްޓިކް ކޮތަޅުތައް މިއަދު ހުރީ ފޮތި ކޮތަޅުތަކަށް ބަދަލުވެފައެވެ. މީގެ ސަބަބުން ފިހާރައިން އެއްޗެހި ގަނެގެން ކޮތަޅު ނަގާ ފަރާތްތަކުން ވެސް ގެއަށް ގެންދަން ޖެހެނީ ފޮތި ކޮތަޅެވެ. ޕްލާސްޓިކް ބޭނުން ކުރާ މިންވަރު މަދުކުރެވުނީއެވެ.

ޕްލާސްޓިކް ކޮތަޅުން ފީއެއް ނެގުމަށް ޤާނުނަށް އިސްލާހު ގެނައީ ވެސް މި ބޭނުމުގައެވެ. ދިވެހިން ޕްލާސްޓިކް ކޮތަޅާ ދުރުކުރުމެވެ. ޕްލާސްޓިކް ކޮތަޅުން ފީއެއް ނަގަން ސަރުކާރުން ނިންމީ އެއީ އާންމު ދިރިއުޅުމުގެ ތެރޭގައި އުފެދޭ ޕްލާސްޓިކް ކުނި މަދުކުރުމަށް ދުނިޔޭގެ ގައުމުތަކުގައި އެންމެ ކާމިޔާބުކަމާ އެކީ އަމަލުކުރާ އެއް ސިޔާސަތު ކަމަށްވާތީ ވެސްމެއެވެ. ބައެއް ޤައުމުތަކުން ވަނީ ޕްލާސްޓިކް ކޮތަޅު ބޭނުން ކުރުން އެއްކޮށްހެން މަނާ ވެސް ކޮށްފައެވެ.

ޕްލާސްޓިކަކީ އޭގެ ސަބަބުން ތިމާވެއްޓަށާއި އިންސާނުންނަށް ވެސް އެކި ގޮތްގޮތުން ނޭދެވޭ އަސަރު ކުރާ އެއްޗެކެވެ. އެގޮތުން ޕްލާސްޓިކް ކޮތަޅެއް ހަލާކުވުމަށް 30 އަހަރަށްވުރެ ގިނަ ދުވަސް ނަގައެވެ. ރާއްޖޭގެ ގޭބިސީތަކުން އުފައްދާ ކުނީގެ ތެރޭގައި ޕްލާސްޓިކް ކޮތަޅަކީ ވަރަށް ބޮޑު އިންސައްތައެއް ހިއްސާކުރާ އެއް ބާވަތެވެ.

ސިންގަލް ޔޫސް ޕްލާސްޓިކުގެ ބާވަތްތަކުގެ ތެރެއިން 13 ބާވަތެއް ރާއްޖެއަށް އެތެރެކުރުމާއި، ރާއްޖޭގައި އުފެއްދުމާއި، ރާއްޖޭގައި ބޭނުންކުރުން މިހާރު ވަނީ މަނާކޮށްފައެވެ. މި ސިޔާސަތު ތަންފީޒުކުރަން ފެށިތާ އަހަރަކަށްވުރެ ގިނަ ދުވަސް ވެފައިވާއިރު، އަހަރެއްގެ ތެރޭގައި ރާއްޖެ އެތެރެކުރި ޕްލާސްޓިކް ކޮތަޅު، ނިސްބަތުން 50 އިންސައްތަ މަދުކުރެވިފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެސް ވަނީ ފާހަގަކުރައްވާފައެވެ.

ޕްލާސްޓިކް ކޮތަޅުން ފީ ނަގަން ފެށިތާ އަދި މިވީ އެންމެ ދެ މަސްދުވަހެވެ. ބޭނުންވާ ވަރުގެ ނަތީޖާއެއް އަދި ނުފެެނު ނަމަވެސް މި ދެ މަސްދުވަހު ދިވެހިންގެ ވިޔަފާރިކުރުމުގެ އާދަތަކަށް އައި ބަދަލުތަކުން ދައްކުވައިދެނީ އުއްމީދީ މާދަމާއެކެވެ.