ޝިއާއުގެ މަރާއި ގުޅޭ އެއްވެސް ފޮޓޯއެއް ފުލުހުންގެ ތެރެއިން ލީކުވެފައިވާކަމަށް ނުބެލެވޭ: ފުލުހުން
ޝިއާއުގެ މަރާއި ގުޅުންހުރި 3 ފޮޓޯއެއް ދަނީ ދައުރުވަމުން
މީހަކު މަރާލި މައްސަލައިގައި ހައްޔަރުކުރި މީހާ
ހ. ޝީރީންވިލާގައި އަނިޔާވެރިގޮތަކަށް މަރާލާފައި އޮއްވާ ހޮނިހިރު ދުވަހުގެ ރޭ ފެނުނު ޝިއާއު މުހައްމަދު ސައީދުގެ މަރާއި ޅޭ އެއްވެސް ފޮޓޯއެއް ފުލުހުންގެ ތެރެއިން ލީކުވެފައިވާކަމަށް ނުބެލެވޭކަމަށް ފުލުހުން ބުނެފިއެވެ.
ޝިއާއުގެ މަރާއި ގުޅުންހުރި 3 ފޮޓޯއެއް ދަނީ ދައުރުވަމުންނެވެ. އެގޮތުން އޭނާ މަރާލައި، ހަށިގަނޑުގެ ބައެއް ގުނަންތައް ބުރިކޮށްލާފައި އޮއްވައި ފެންނަ ފޮޓޯއަކާއި، ޙާދިސާ ހިނގި ތަނުގައި ލޭތައް ހެދިފައިވާ މަންޒަރު ފެންނަ ފޮޓޯއެއްގެ އިތުރުން، އޭނާ ޙާދިސާ ހިނގިކަމަށް ބެލެވޭ ގޭގެ ތެރޭގައި ހުއްޓައި ފެންނަ ފޮޓޯއެއް ދައުރުވަމުންދާކަމަށް ފޮޓޯ ދުއް ފަރާތްތަކުން ބުނެއެވެ.
އެއީ ފުލުހުންގެ ތެރެއިން ލީކުވެފައިވާ ފޮޓޯތަކެއްކަމަށް އިތުބާރު ހުރި މަސްދަރުތަކާ ޙަވާލާދީ ބައެއް ނޫސްތަކުން ވަނީ ރިޕޯޓު ކޮށްފައެވެ.
އެކަމާ ގުޅިގެން ފުލުހުން ބުނީ، އެ ފޮޓޯތަކަކީ ފުލުހުންގެ ތެރެއިން ލީކުވެފައިވާ ފޮޓޯތަކެއް ކަމަށް ބައެއް މީޑިއާތަކުން ބުނި ނަމަވެސް، އެފަދަ އެއްވެސް ފޮޓޯއެއް ފުލުހުންގެ ތެރެއިން ލީކުވެފައިވާކަމަށް ނުބެލެވޭ ކަމަށެވެ.
އަދި އެ ފޮޓޯތަކަކީ ފުލުހުންގެ ތަހުގީގަށް ނަގައި، ތަހުގީގުގައި ބޭނުންކުރަމުން ގެންދާ ފޮޓޯތަކެއް ނޫންކަމަށްވެސް ބުނެފައިވެއެވެ.
އެހެންނަމަވެސް، ކުށުގެ ވެއްޓަށް ވަދެފައިވާ އެއްވެސް ފަރާތަކުން އެފަދަ ފޮޓޯއެއް ނަގައި، ލީކު ކޮށްފައިވޭތޯ ދިވެހި ފުލުހުން ޚިދުމަތުން އިތުރަށް ބަލަމުން ގެންދާކަންވެސް ވަނީ ފާހަގަކޮށްފައެވެ.
އޭގެ އިތުރުން، އެ ފޮޓޯތަކަކީ އަނިޔާވެރިކަން ފެންނަ، ގިނަ ބަޔަކަށް އެކަމުން އަސަރު ކުރުވާނެފަދަ ފޮޓޯތަކަކަށް ވުމާއެކު، އެކަކު އަނެކަކަށް އެ ފޮޓޯތައް ފޮނުވައި އެކި ވަސީލަތްތައް މެދުވެރިކޮށް ދައުރު ނުކުރުމަށް ފުލުހުން ވަނީ އެދިފައެވެ. އަނިޔާވެރި ގޮތަކަށް ޝިއާއު މަރާލާފައިވާއިރު، އޭނާގެ އާއިލާގެ އެދުމަކަށް، އޭނާއަށް ލިބިފައިވާ އަނިޔާތަކުގެ ތަފްސީލް ހާމަނުކުރަން ފުލުހުން ވަނީ ނިންމާފައެވެ.
