ކޮވިޑް-19އަށް ވެކްސިން އުފައްދާ އެއް ކުންފުނި ކަމަށްވާ ފައިޒަރ ގެ ޗީފް އެގްޒެކެޓިވް އޮފިސަރ (ސީއީއޯ) އަލްބަރޓް ބޮރްލާ ކޮވިޑް-19އަށް ޕޮޒިޓިވްވެފައިވާކަމަށް ވިދާޅުވެއްޖެއެވެ.

ހޯމަ ދުވަހު ކޮވިޑަށް ޕޮޒިޓިވްވެފައިވާކަމަށާއި ނަމަވެސް ހާލު އެހާ ސީރިއަސް ނޫންކަމަށް އަލްބަރޓް ވިދާޅުވިއެވެ. ފެންނަނީ އާދައިގެ އަލާމާތްތަކެއްކަމަށް އަލްބަރޓް ވިދާޅުވިއެވެ. އުމުރުފުޅުން 60 އަހަރުގެ އަލްބަރޓް އިތުރަށް ވިދާޅުވީ ކުންފުނިން އުފައްދާފައިވާ ކޮވިޑް-19 އެންޓިވައިރަލް ބޭސް ޕެކްސްލޮވިޑް ބޭނުންކުރައްވަމުން ގެންދަވާ ކަމަށެވެ. އަދި ހުންނެވީ އައިސޮލޭޝަންގައި ކަމަށެވެ.

ފާއިތުވި މަސްތަކުގައި ކޮވިޑް-19އަށް ޕޮޒިޓިވްވެފައިވާ އިސް ބޭފުޅުންނަށް ބަލާލާއިރު އެމެރިކާގެ ރައީސް ޖޯ ބައިޑަން އާއި ބައިޑަންގެ އެންމެ އިސް މެޑިކަލް އެޑްވައިޒަރ ޑރ އެންތަނީ ފައުޗީ ހިމެނިވަޑައިގަންނަވައެވެ.

ބައިޑަން އަށް ވަނީ ދެ ފަހަރެއްގެ މަތިން ކޮވިޑް-19 އަށް ޕޮޒިޓީވް ވެފައެވެ.

އަލްބަރޓް ވަނީ ފައިޒަރ ވެކްސިންގެ ހަތަރު ޑޯޒް ޖައްސަވާފައެވެ.