ތިން ވަޒީރުން ގަތަރަށް ވަޑައިގަތީ އުރީދޫގެ ފަރާތުން އިންތިޒާމުކޮށްގެން
މިއީ ޤަތަރާއި ރާއްޖެއާއި އެކު އޮންނަ ގުޅުން އިތުރަށް ބަދަހި ކުރުމުގެ ގޮތުން އުރީދޫގެ ފަރާތުން އިންތިޒާމް ކުރި، ރާއްޖޭގެ މިނިސްޓަރުންގެ ދަތުރުފުޅެއް
މިނިސްޓަރ އޮފް އެންވަޔަރަންމަންޓް އާމިނަތު ޝައުނާއާއި، މިނިސްޓަރ އޮފް އެޑިއުކޭޝަން ޑރ ޢާއިޝަތު ޢަލީއާއި، މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫން
އުރީދޫ މޯލްޑިވްސްގެ ޗެއާޕަރސަން ފާތިމާ އަލް ކުވާރީގެ ދައުވަތަކަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޮލޮޖީ، އާމިނަތު ޝައުނާއާއި، މިނިސްޓަރ އޮފް އެޑިއުކޭޝަން ޑރ ޢާއިޝަތު ޢަލީއާއި، މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް، ޔުމްނާ މައުމޫން ޤަތަރަށް ދެދުވަހުގެ ދަތުރުފުޅެއް ކުރައްވައިފިއެވެ.
މިއީ ޤަތަރާއި ރާއްޖެއާއި އެކު އޮންނަ ގުޅުން އިތުރަށް ބަދަހި ކުރުމުގެ ގޮތުން އުރީދޫގެ ފަރާތުން އިންތިޒާމް ކުރި، ރާއްޖޭގެ މިނިސްޓަރުންގެ ދަތުރުފުޅެކެވެ. އެކި ސިނާއަތްތަކުގައި ހަރަކާތްތެރިވާ ފަރާތްތަކުގެ ދިރިއުޅުމުގެ ފެންވަރު، ޑިޖިޓަލް ޓްރާންސްފޯމޭޝަންގެ އެހީގައި މުއްސަނދިކުރުމަށް ގައުމީ ފެންވަރުގައި ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ޤަތަރުގެ މުހިންމު މުއައްސަސާތަކާއެކު ބައްދަލުކުރެއްވުންތަކެއް މި ދަތުރުފުޅުގައި މިނިސްޓަރުން ބޭއްވެވިއެވެ.
މިދަތުރުފުޅުގައި، ޤަތަރުގެ ޤައުމީ ކުތުބުހާނާގެ މަސައްކަތްތަކާއި އިންތިޒާމްތައް މިނިސްޓަރުން ބައްލަވާލެއްވިއެވެ. ޤަތަރު ފައުންޑޭޝަންގެ ކަންކަންވެސް ބައްލަވާލެއްވިއެވެ. މީގެ އިތުރުން އެ ގައުމުގެ ތިމާވެއްޓާއި ބެހޭ ވަޒީރާއި ޓެކްނޮލޮޖީ ވަޒީރާއި، މިނިސްޓަރ ޝައުނާ ބައްދަލުކުރައްވަައި މިދާއިރާތަކުން ގުޅިގެން މަސައްކަތް ކުރެވޭނެގޮތްތަކާއި ބެހޭގޮތުން ވެސް ވަނީ މަޝްވަރާ ކުރައްވާފައެވެ.
